Fanj “humx dwk” baez ngeih,

Fwj laep deih dwglau,

Bya lueg gyuem mokhau,

Hwk vunz lau vunz yiep.

Bing gozginh haeuj bya,

Lumj gyoengqma haeuj mbanj,

Bingyak geij cib fanh,

Roemx gyawz famh daengz gyawz.

Bing hungzginh hoenxciengq,

Cienq gvaq bya youh bya,

Vunzdig da cix va,

Deng yaeuh bya haeuj red.

Fanj “humx dwk” baez sam,

Ban bouxdaeuz rox suenq,

Yien ndaeng vunzdig cuenq,

Nyauz luenh mbouj baenz bing.

Hungz seiq ginh okdaeuj,

Moeb haeuj Vangzanh singz,

Mied vunzdig ndaej hingz,

Geiznding mbinyagyag.

Hungzginh ngeih ginhdonz,

Lumj nda song gyoivenj,

Hungzhuz Siengh’wzbenh（湘鄂边）,

Song denh(giz) baenz lailai.

Gyobaengh boux hojnanh,

Gamhanh boux miz gwn,

Gimq ngaek goengrengz vunz,

Gag caux gwn caux daenj.

Daiq vunzmbanj vunzbya,

Gauj reihnaz gwzming,

Vih leih’ik beksingq,

Dajdingh vuenh aen mbwn.

Cunghyangh Suhcwngfuj,

Ndaej hainduj laebbaenz,

De fatok singyaem,

Lingh caux aen seiqgyaiq.

Hoenxciengq hoenx ndaej hingz,

Fwn dingz mbwn ronghsag,

“Bouxswix” hemqvakvak,

Ciengjcak daeuj guhdaeuz.

（13）