Geij bi neix, Linz Giuj itcig roxnyinh bouxgvan Dungj Siuh lumj miz haujlai saeh muenz cihgeij nei, naemj mbouj doeng, hix loengh mbouj doeng.

Daj Linz Giuj caeuq Dungj Siuh doxaeu le, song boux doxndiep doxgyaez, hawj vunz hozhaenz dangq- maz. Dungj Siuh dawz gij cienz ndawranz cienzbouh hawj Linz Giuj guenj, hix yienghyiengh swnh de.

Dungj Siuh ndei dwg ndei, hoeng mboujlwnh baez daengz cietheiq hung roxnaeuz cietheiq iq, roxnaeuz cuengq hanzgyaj sujgyaj, Dungj Siuh cungj dwg boux ndeu mbouj sing mbouj yiengj hai ci okbae, hix mbouj caeuq Linz Giuj gangj bae gyawz, bae banh maz saeh.

Daengz haemh dauqranz, Linz Giuj cam Dungj Siuh ngoenzneix bae gyawz? Dungj Siuh cungj dwg gazgaz gwdgwd gejnaeuz baenz buenq- ngoenz.

Neix hawj Linz Giuj roxnyinh engq geizheih, engq ngeizvaeg lo, gietdingh ngoenzlawz laeglemx gaen- laeng bae ndomqyawj bouxgvan bae guh maz.

Ngoenzhaenx dwg singgeiz roek, dingjlingz dwg bet nyied cibngux, Dungj Siuh haetromh couh hwnq- congz, rubrab gwn song gaemz ngaizromh le, couh gipmuengz okbae. Linz Giuj raen le, couh laeglemx gaenlaeng Dungj Siuh.

Da raen Dungj Siuh hai ci ok siujgih, Linz Giuj hix gipmuengz baenqndang hai aen ci gaenlaeng. Vih hwnjban fuengbienh, Linz Giuj caeuq Dungj Siuh gak boux gag hai aen ciiq he.

Linz Giuj gaenlaeng Dungj Siuh haujlai nanz, liz ndaw singz yied bae yied gyae. Cij raen Dungj Siuh hai ci haeuj aen mbanj he, dingz ci youq baihnaj aen ranz iq he.

Dungj Siuh daj gwnz ci riuj haujlai doxgaiq roengzdaeuj, miz hab bingj he, lij miz haeuxsan、youz duhdoem、nohmou caeuq daeh mak he.

Cij raen ndawranz byaij ok boux naihgeq he. Naihgeq byoem hausak, diuz hwet cungj yaek gungj daengz lajnamh lo.

“Meh, gou nanz mbouj ndaej daeuj yawj mwngz lo, ngoenzneix bet nyieb cibngux, gou daiq di doxgaiq hawj mwngz bouxlaux.” Dungj Siuh riunyumnyum, caeuq naihgeq haenx naeuz, yienzhaeuh daj ndaw daeh- naeng mbon ok dab cienz nanupnup he daeuj, ndenq daengz gyangfwngz naihgeq bae.

“Lwg ha, mwngz ndaejhoengq daeuj yawj gou bouxgeq couh baenz lo, lij daiq baenzlai doxgaiq daeuj, gou naihgeq ciuhneix caen miz fuk, lix daengz banneix hix dij lo.” Naihgeq gangj sat, baenq naj gvaq mbiengj he bae, aeu genbuh uet lwgda.

“Meh, gaej gangj gij vahhek neix, gijneix gou wngdang guh.”

Linz Giuj ndoj youq gizgungx dingq ndaej nyi seuqsak. Dungj Siuh heuh boux naihgeq neix guh meh, de dwg byawz ne? Linz Giuj ndawsim gwq ngeizvaeg.

Linz Giuj gaen Dungj Siuh bae daengz ranzcoj de gvaq, mbouj dwg aen mbanj neix, meh de hix mbouj dwg gij yienghsiengq neix, neix dwg maz saeh ne?

Dungj Siuh haeuj ranz bae, caeuq naihgeq gangjgoj buenq aen cung- daeuz baedauq, couh caeuq naihgeq vadfwngz doxbiek, hai ci bae lo.

Linz Giuj hix gipmuengz hai ci gaenlaeng gyaep bae.

Linz Giuj gaenlaeng Dungj Siuh, song aen ci doxliz mbouj gyae mbouj gyawj.

Youh gvaq aen cungdaeuz ndeu baedauq, cij raen Dungj Siuh hai ci daengz aen haw iq he, youq geh gai gaebgeb he dingz ci, hix riuj haujlai doxgaiq roengz ci.

Cij raen henz gai aen ranz he byaij ok song dahsau, yawj yiengh ndaej cibbet gouj bi, songde yiengh- siengq gyaeugyi’gyi, gig doxlumj, lumj lwg songseng.

Song dahsau neix baez raen Dungj Siuh, angq ndaej saetdiuq swenj hwnjdaeuj, lumj raq rumz nei buet gvaqdaeuj, caeuq Dungj Siuh caez buen doxgaiq haeuj ranz, yienz- haeuh boux youq mbiengj gaemhdawz song cik gen Dungj Siuh, sam boux gangjgangj riuriu caez byaij haeuj ranz bae.

Linz Giuj raen yienghneix, nyengh lo, lumj moegyou nei ndwn youq gizhaenx.

“Dai lo, ndaek ma neix laxlawz dwg vunz yienghneix, caeuq song dahsau baenzneix ndei, baenzneix caenmaed, gou seizneix couh roengz ci bae loengh cingcuj, caemhcaiq lwnh song dah de rox, ndaek ma neix miz gya miz dangq, lij daeuj yoegyaeuh sou.” Linz Giuj ndaw bak gag nammbwdmbwd.

Linz Giuj saet roengz ci daeuj, hozhwnj foedfoed cung haeuj ndaw- ranz bae.

Raen Linz Giuj haeuj ranz daeuj, naj haen dwk, Dungj Siuh doeksaet lo, song dahsau haenx hix doeksaet lo, mbouj rox maz saeh, seiq boux caez doxmuengh dwk, yaepyet hoengheiq lumj cungj giet baenz ndaek nei lo.

Yaepneix, Dungj Siuh sikhaek singjsad gvaqdaeuj, riu naeuz song dahsau:“Dahhaj、Dahroek, neix dwg daxsimj sou, sou baez nduj raennaj.”

“Daxsimj, naengh roengzdaeuj ndoet cenj caz he gonq.” Song dahsau haenx riu coh Linz Giuj byaij gvaqdaeuj, gaemh gen Linz Giuj naengh roengzdaeuj.

Baezneix lwnz daengz Linz Giuj nyengh lo, song da muengh coh Dungj Siuh, roxnyinh najgemj ndatfwgfwg, mbouj dapvah.

“Dahhaj Dahroek song dahsau neix, dwg lwg songseng Lauxgangh song gvanbaz baengzyoux ndei gou, hoeng songde gaenq mbouj youq lo.” Dungj Siuh naeuz Linz Giuj. Dungj Siuh gangj sat, lwgda hoengz lo, ndaw da miz raemxmok yapmyagmyag.

Song dahsau faenbied heuh Dahhaj Dahroek haenx gwnz naj hix daj najriu bienq ndaej doeknaiq hwnjdaeuj, hoeng lij gig haenqrengz daj gwnz naj nyaenj ok di riu daeuj, coh Linz Giuj ngaekngaek gyaeuj.

Dingq Dungj Siuh baenzneix gangj, caiq yawjyawj song dahsau neix, Linz Giuj ndawsim loq dingh roengzdaeuj, hoeng de ndawsim lij fubfed mbouj dingz, mbouj gangj maz.

Haemhhaenx dauqranz, Dungj Siuh gangj gij saehcingz ngoenzneix daj nduj daengz byai hawj Linz Giuj dingq.

Laxlawz, mwhhaenx Dungj Siuh caeuq mehyah nem Lauxgangh song gvanbaz caez youq aen gunghswh ndeu guhhong, baez he lauxbanj anbaiz Dungj Siuh song gvanbaz caeuq Lauxgangh song gvanbaz bae diegrog banhsaeh.

Dungj Siuh caeuq Lauxgangh gyoengqde seiq boux gig swnhleih banh ndei saehcingz. Mwh gyoengqde seiq boux dauqma, youq byongh loh aen ci boek roengz ndaw dah bae. Gyoengqde seiq boux cij miz Lauxgangh rox youzraemx, Dungj Siuh song gvanbaz caeuq mehyah Laux- gangh cungj mbouj rox youzraemx, youq ndawdah cak hwnj cak roengz. Lauxgangh sien youz daengz henz ndang Dungj Siuh, haenqrengz rag dawz Dungj Siuh coh gwnzhaenz youz bae. Dungj Siuh ndang biz, Lauxgangh gig mbouj yungzheih rag Dungj Siuh hwnj gwnzhaenz, goq mbouj ndaej yietnaiq, baenq ndang youh diuq roengz ndaw dah bae ra yah Dungj Siuh caeuq yah cihgeij.

Hoeng Lauxgangh seizneix gaenq rengz sat ndang naiq, caengz youz daengz henz ndang song boux mehmbwk, couh caem roengz lajraemx bae lo.

Lauxgangh gyoengqde sam boux vut mingh ndaw dah, Lauxgangh song gvanbaz vut roengz song dahlwg songseng Dahhaj caeuq Dahroek, songde baenz lwggyax lo.

Dungj Siuh yienznaeuz hix saet bae mehyah, hoeng cihgeij caeuq mehyah doxaeu mbouj geij nanz, caengz miz lwgnyez. Lauxgangh song dahlwg songseng lij iq, lij aeu vunz ganqhoh.

Lauxgangh dwg vunzaen gouq- mingh cihgeij, dwg de aeu mingh vuenh ndaej diuz mingh cihgeij, cihgeij aeu ciuqgoq song dahniq hojlienz haenx, Dungj Siuh naemj.

Daj neix hwnj, Dungj Siuh itcig dawz song dahlwg Lauxgangh dangq lwg cihgeij daeuj ciengx, yienghyiengh gvansim daengz dieg.

“Saehcingz dwg yienghneix law, mwngz soqlaiz mbouj lwnh gou rox gvaq ne.” Linz Giuj najhaen bienq najriu.

“Mbouj dwg lau mwngz dungx- gaeb, naemj mbouj doeng luma.” Dungj Siuh gotdawz aen mbaq Linz Giuj naeuz.

“Dwg gou gvaiq loeng mwngz lo, gvaqlaeng raeuz caez bae yawj Dahhaj Dahroek, songde caen hawj vunz hojlienz.” Linz Giuj.

Yaep he, Linz Giuj lumj naemj hwnj maz nei, gig ngeizvaeg cam:“Mwngz dawz haujlai doxgaiq bae yawj naihgeq haenx ne, de youh dwg byawz?”

“Mwngz dingq gou yaengyaeng gangj gonq.” Dungj Siuh muengh coh Linz Giuj, naeuz.

Laxlawz, daxmeh yahgonq Dungj Siuh cij miz boux dahlwg dog ndeu, daj yahgonq mbouj youq le, Dungj Siuh itcig ciengx mehdaiq, mboujlwnh cietheiq hung cietheiq iq, Dungj Siuh cungj bae yawjngonz mehdaiq.

“A, caen naemj mbouj daengz!” Linz Giuj doeksaet naeuz.

“De bouxgeq hojlienz, mwngz mbouj nyienh raeuz bang de luma?” Dungj Siuh naeuz.

“Nanz ndaej mwngz yienghneix hauqgingq, de bouxgeq dandog, gyanghaemh gyanghwnz bingh le, cungj mbouj miz vunz rox, mboujyawx raeuz ciep de daeuj caeuq raeuz caez youq.” Linz Giuj riunyumnyum naeuz.