Dahsau cingq ganjhaw. Geij ngoenz gonq denceh deng vunz caeg bae, de haemz dangqmaz. Yienznaeuz mbanj liz haw gyawj, cij miz aen lai goengleix gyae ndwi, hoeng, mbouj miz denceh caen mbouj fuengbienh. Mwngz haiq: Gouh haizvi saekfonx giujsang ndeu, geu vunj saekfonx dinj daengz gwnz hoq, geu buhyungz saekhau dinj daengz saindw, gencueg venj aen daehnaeng ndeu, ndangdaenj baenzneix seizhwng, cix byaij roen bae haw, mwngz naeuz de gwnvi mbouj? Gwnz loh hix miz boux byaij roen ganjhaw, miz, hix cungj dwg bouxgeq.

Daegmbauq gwih denceh daj baihlaeng dahsau hai daeuj: Yi! Dangqnaj dahsau neix sangreux, byoemraez duengq laengmbaq, byaij roen aen hwet niuj bae niuj dauq, lwenzunq lumj duzngwz byaij roen nei. Aen daeh venj gencueg bongzbogbog, ndawde aiq miz huqndei bw! De yawj naj yawj laeng, seizneix mbouj miz vunz ci baedauq, de cim dwk aendaeh.

Daegmbauq fwt caij youzmwnz dep henz ndang dahsau gvaqbae, da raeh fwngz riengj vaz aendaeh.

Fwt miz denceh dep ndang gvaqdaeuj, dahsau doeksaet hung, couhdwg mbat doeksaet neix, aendaeh bibuengq. Aenvih bibuengq, daeg- mbauq vaz mbouj cinj, gaem hoengq lo. De gip cab ci, denceh youq dangqnaj dahsau giz seiq mij gyae dingz. Daegmbauq nyeux gyaeuj dauq: Yi! Dah neix saundei bw. Naj de loh ok saisiu simyak.

Dahsau deng haep, ngawh yaep ndeu couh singj dauq, roxnyinh ok maz saeh lo, sikhaek cienqlaeng buetdeuz.

Daegmbauq vuengluenh couh vut ci bae gyaep dahsau.

Ngamq buet ndaej cib lai mij gyae, daegmbauq couh daengzdawz lo, mwh de iet fwngz cingq yaek dued daeh seiz, dahsau mwh gip baenz gvai gveng daeh bae gizgyae dangqnaj henz roen, gizde dwg diegnya. Aendaeh youq gyang mbwn veh diuz gungsienq ndeu.

Daegmbauq bongh bae ciep daeh, hoeng ciep mbouj ndaej. De bae ndaw nya ra daeh. Ndaw nya miz gumz- namh, de deng loemqgumz, laemx lo. “Ced meh mwngz.” De gangj vah- bamz. Caj de aeu ndaej aendaeh dauq daengz gwnz roen, dahsau caeuq denceh gaenq mbouj raen ngaeuz. “Ej ced meh mwngz.” De youh gangj coenz vahbamz he.

De baet gij nyasoiq nem ndang haenx. Seizneix gwnz loh miz ci baedauq, de mbouj swt gijneix. Dawz nyasoiq gwnz ndang baet seuq le, de deq mbouj gip youh siujsim lili nengh lahlen aendaeh, caengz nengh sat, sawqmwh bongj daeuj raq “rumz- geujgaeq” ndeu, dawz aendaeh geuj bae. Raq “rumz” neix daeuj ndaej “vaiq、maenh、cinj”. De caengz fanjwngq gvaqdaeuj, daeh couh saet bae lo.

De riengz “rumz” yawj bae, yienzlaiz dwg dahsau daenj buhfonx ndeu gwih denceh daeuj dued aeu gaiq “canlibinj” de. Duzbit cug daengz henz bak, lij deng mbin bae! Bouxsai deng mehmbwk “hangz”, de roxnyinh diuqga, couh hozhwnj fofo bae gyaep dahsau. Miz geijlai rengz ok geijlai rengz bae gyaep. Hoeng, denceh hai youq dangqnaj, cungj dwg baujciz gij giliz miz cit gen lai di. Miz geij baez byaifwngz de gaenq dep rieng ci, hoeng, cungj gaem mbouj ndaej.

Gyaep le seiq haj bak mij, daegmbauq baegfofo, menh roengz- daeuj lo.

Liuh mbouj daengz, denceh hix menh roengzdaeuj. De simsoz mbouj gyaep lo, byaij roen. Denceh baujciz youq dangqnaj haj roek mij gyae hai.

Sawqmwh, de raen denceh sug- naj, sijsaeq bae yawj, denceh caen dwg denceh swhgeij dahraix. Caiq sijsaeq yawj dahsau: Yu! Dah neix dwg bouxcawj aen daeh bw, yienz- naeuz seizneix de gaenq duet buhhau bae, cix daenj geu buhfonx demh ndaw, hoeng caen dwg de dahraix.

“Loengh gou? Dawz gou dang duzlingz loengh! Ra dai!” Daegmbauq gangj sat fwt buethoho bae gyaep, lumj duzmax fatheiq nei biu hwnjbae. Denceh siksaek caij youzmwnz.

“Gaej hawj gou gaemhdawz mwngz, mboujnex gou youq gwnz- dungx mwngz coemqceq.” Daegmbauq maenjheuj naeuz.

Daegmbauq vaiq, denceh hix vaiq, daegmbauq numq, denceh hix numq. Yienghneix geij dauq le, daegmbauq baegfofo, doiqyiengh lo, naeuz:“Gou mbouj aeu gij doxgaiq mwngz lo, engq mbouj sienghaih mwngz, cijaeu mwngz ce denceh hawj gou couh baenz lo.” De buet mbouj ndaej lo, cijnaengz byaij riengz ci.

Dahsau mbouj swt, lij dwg baujciz youq dangqnaj de hai bae.

“Mwngz ndaejnyi lwi?” Daeg- mbauq rongx hemq.

Dahsau hix mbouj swt de, laebdaeb hai bae.

“Suenq lo, denceh hix mbouj aeu lo, soengq hawj mwngz ba. Yaep dem, cihung daeuj daemj mwngz dai bae.” Daegmbauq gangj sat naengh gwnz namh yietnaiq.

Dahsau hix daengx denceh, nyeux gyaeuj dauq naeuz:“Mwngz riengz gou bae, daiq mwngz bae giz diegndei ndeu.”

“Bae gizlawz?”

“Bae le, mwngz couh rox lo.”

“Hwhw, yaeuh vunz!”

“Gizde miz saehndei caj mwngz. Daengz de le gou boiz denceh hawj mwngz, gou gangjvah suenq vah.”

Dah bazndauq neix rox miz maz saehndei hawj gou ni? Daegmbauq ndawsim mbouj saenq, hoeng, lumj- naeuz miz fangzdoz nei, de caen bae riengz dahraix. De ngeix aeu ndaej denceh dauq couh baenz lo. Denceh dwg ciq baengzyoux ne.

Dahsau hai ci, daegmbauq byaij riengz. Daengz gyaeujhaw, vunz haemq lai, dahsau nengh raez giliz, seizseiz singjgaeh daegmbauq.

Dahraix, daeg neix fwt gyaep gvaqdaeuj, doq gyaep doq hemq:“Gaemh de, de dwg boux gvaijgai lwgnyez. Gaemh de……”

Caen miz vunz gvaqdaeuj yaek gaemh dahsau. Dahsau daihsing hemq:“Gaej guenj henzsaeh! De dwg gvan gou, de yaek dub gou……”

Songde couh yienghneix youq gyang haw doxgyaep. Daegmbauq naiq daengz da ok ronghrib.

Denceh gvaijvan mbat ndeu, numq roengzdaeuj lo.

Daegmbauq vazdawz ndaej rieng ci, hoeng, de caengz ndwn ndaej maenh, couh deng denceh rag haeuj aen gyang hongh ndeu bae. Denceh fwt ndaep feiz lo.

“Gaeb bouxcaeg! Gaeb boux- caeg!” Dahsau hemq.

Song boux gingjcaz cung okdaeuj: Bouxcaeg youq gizlawz?

Laxlawz gizneix dwg baicuzsoj. Daegmbauq naiq ndaej dava, mbouj haeujsim neix dwg baicuzsoj.

Dahsau vix coh daegmbauq naeuz:“Ne, ndaek neix buenq loh dued aen daeh gou.”

“Aen daeh youq fwngz mwngz, ndeindi’ndi, baenzlawz naeuz gou dued aeu ni?”

Dahsau dawz saehcingz goekbyai lwnh gingjcaz nyi.

“Baengzgawq ni?” Daegmbauq daj laihdai.

Dahsau lah coh gingjcaz, muengh gingjcaz bang de guhcawj. Gingjcaz hix lah coh de.

“Dawz mbouj ok baengzgawq luba?” Daegmbauq daekeiq fwngfwng.

“Mwngz mbouj raen gouhbenj, raemxda mbouj loenq la?” Dahsau dacaengz de, ronghda cungj dwg yiuqsiuj, “gou cam mwngz, denceh neix dwg mbouj dwg aen mwngz?”

“Dwg!”

“Caen dwg?”

“Dangyienz caen. Couh lumj gou dwg bouxsai yienghneix caen. Boiz dauq gou!” Daegmbauq gangj sat, yaek gwih hwnj denceh bae.

“Gaej doengh!” Dahsau haed dingz de. Daegmbauq maegsaeg yawj coh de.

“Gingjcaz dungzci, ndaek neix mboujdan guhdued, lij guhcaeg dem. De caeg denceh gou. Aen denceh neix dwg aen gou!” Dahsau naeuz.

“Mwngz luenh naeuz. Gingjcaz dungzci de vah doeg laih vunz!” Daegmbauq rongx naeuz.

“Geij ngoenz gonq, aen denceh gou deng vunz caeg bae, gou daeuj neix bauqanq gvaq, miz geiqloeg ne.” Dahsau naeuz.

“Denceh neix! Gou dwg ciq baengzyoux ne!” Daegmbauq daih hemq daih swenj.

“Hwhw, siengj laihdai? Siengj ndaej ndei! Ngoenzneix mehmbwm hai da, hawj gou ndaej dauq denceh.” Dahsau naeuz.

“Caen boihseiz!” Daegmbauq nieg lo.

“Baenzneix coz, miz fwngz miz din, mbouj guh saeh cingq, cix guh- caeg, rox mbouj rox saetnaj? Riengz dou daeuj guh geiqloeg!” Gingjcaz naeuz.

“Gou, gou……” Daeg neix sim- vueng lo.