Youh yaek daengz cieng lo, Nungz Yenh Mbanjfaexlimh sim vanswdswd. De gaenq haujlai nanz mbouj nyaenx sim soeng sim sangj lo.

Haetneix daihcaeux Nungz Yenh couh ciep ndaej dienhvah, heuh de daiq cwnggen bae lingx ngaenz bouj- ciengx. De angqfwngfwng, gag buenz- suenq lingx ndaej ngaenz le lai suek geij aen faengx, lai guh di nohlab, lai loengh geij yiengh byaek ndei, aen cieng neix yaek beij binaengz gvaq lai fungfouq di. Gij saeh de ndaej baenz lo, caensiengq ndaej biengj okdaeuj, cig ndaej angqhoh ha!

Bet nyiet cibhaj haemh gonq, Nungz Yenh couh ndaej dauqranz nem lwgyah “doxcomz” lo, hoeng de itcig cungj angq mbouj hwnjdaeuj.

Mwh Nungz Yenh ndaej dauqma ngamq byaij haeuj Mbanjfaexlimh, gyangsim de cix lumj fag ndoi gyae haenx deng gyuemq hoenzmok, hoed mbouj sanq baet mbouj deuz. De miz di doeksaet, ngamq gvaqbae bi lai, Mbanjfaexlimh couh bienqvaq nyaenx daih. Diuz roen haeuj mbanj nyuenz gaebgaeb gebgeb gumzgumz gamx- gamx caenh ndaej byaij soujfuz, song bi gonq gyo de ok ngaenz coihgaij gya’gvangq dienzbingz cij ndaej doeng heiqci, baez yaepda, mbouj rox seizlawz bu suijniz lo. Ndaw mbanj luengq ranz gehhongh gizgiz cungj ancang le lohdaeng daiyangznwngz, ranzranz doengjit dajcang ndaej ciengz hau vax rongh, gyaqciq raixcaix. Gizdieg gunghgung cangzsoj gaiq senhconzlanz miz saw miz doz, gyaeu lumj vehbauq. Baihgwnz coij biudaez “hengzguh aen canloz saenqhwng lajmbanj, doicaenh yendaiva nungz- yez” camz haeuj da haeuj naj, baihlaj gij sawcih iq baenz benq deihdwddwd, de fouzsim yawj roengzbae.

Baenz foengq baenz foengq va- nding vahenj angj hai ndaw ranghdieg ndaemnywj, swnh rumz ngauzyedyed; baenz gyoengq duzroeg youq gwnz nye doengh gofaex mwncup humx mbanj ditdit diuqdiuq heuh cici cetcet. Mbouj rox dwg angqcoux de ndaej okdaeuj roxnaeuz riu de mwhgonq guh “saehhuk” deng haeujbae?

Diuz vengzfuk baengznding doiq- saek ndeu bongj rumz doenghfubfub, coij saw de lij raen caencaen yienh- yienh: “Giengiet dwkhoenx boux guh- yak, henhoh cingqheiq gwnzbiengz!” Nungz Yenh baez saenqdaenh, daengx ndang mbouj cwxcaih, lumj loek gwn gaiquq rueg mbouj ok.

Nungz Yenh haidaeuz hix gaenx- maenx haeujcoengh aen hozdung “baet yak cawz rwix”, de gig haemz boux hengzmanz, maqmuengh guh neix ndaej hawj vunzbiengz doxhuz guh gwn, vuenyungz gvaqngoenz. Hoeng baenzbaenz ngeix mbouj daengz, doeklaeng de dauqfanj cix deng gaemh haeujbae.

Bi’gyai Nungz Yenh bae Mbanj- nazrenh bau ndoi raemj faex. Ngoenz de cang faex hai ci okma, song ndaek hauxseng nyumx byoem nding cab henj daeuj laengz roen, hemq naeuz:“Diuz loh dou guh hai, gvi dou mai dou hah, byawz byaij gizneix gvaq, ajaeu(yaekaeu) ngaenz cawx roen.”

“Gyangngoenz caemh yienghneix guh? Sou mbouj rox yienghneix guh famhfap?” Nungz Yenh naeuz.

Ndaek “byoemcab” he naeuz:“Dou mbouj rox maz dwg famhfap, caenh rox byawz byaij diuz loh dou couh deng gyau ngaenz hawj dou.”

“Sou yienghneix guh couhdwg caegbokloh!”

“Bokloh youh baenzlawz yiengh? Youq deihbuenz dou, dou gangj baenzlawz couh baenzlawz.”

Nungz Yenh rox gangj lai mbouj miz yungh, naemj banhfap duetdeuz vaiqdi cij dwgsoq. “Seizneix gwnz- ndang caengz miz ngaenz, hawj gou gai ndaej ci faex ndeu le haetcog menh hawj, baenz lwi?”

“Lox lwgnyez sam haet ha? Mbouj miz ngaenz couh ce ci faex roengzdaeuj!” Ndaek “byoem- cab” ndeu swenj naeuz.

“Yienghneix gou daj dienhvah heuh vunz soengq ngaenz daeuj.” Nungz Yenh baenq gvaq mbiengj ndeu bae mbon soujgih okdaeuj bued hauh.

“Batlat!” Ndaek “byoemcab” ndeu fwt cung gvaqdaeuj ciengj aen soujgih Nungz Yenh haenqrengz boemz roengz gwnzdieg bae. “Hw, siengj dwk dienhvah heuh vunz? Dwk vei!”

Nungz Yenh deng nyex hozgaek lo, de yunghrengz nyoengx ndaek “byoemcab” laemx gwnznamh, rongx naeuz:“Ndaek lwgndai mwngz boiz aen soujgih hawj gou!”

Ndaek “byoemcab” sikhaek daj gwnznamh hwnqdaeuj, mbon ok caxsoem, lingh ndaek “byoemcab” caemh yot cax buet daeuj coengh, song fag cax ndongqvaengj caez dongj coh Nungz Yenh.

Cingzgvang yungyiemj, suk- siemj couh dai, mwhneix Nungz Yenh laxlak fagcanj gaenzraez bangx ci daeuj vang moeb soh moeb, moeb ndaej song ndaek “byoemcab” gyaeuj dek ok lwed deuz dai deuz lix……

Nungz Yenh deng dawz bae baicuzsoj lo.

Gwnz dingz saemjbuenq, Nungz Yenh deng ceijgauq daegdaengq moeb sieng vunz, “vunzcingq” “huqcingq” caezcienz, de euq mbouj gvaq, deng buenq naenghlauz bi ndeu lingz roek ndwen.

Ienuengj ha! Nungz Yenh ndaw dungx raemxhaemz raix mbouj ok.

De bae ndaw yangh ra baicuzsoj、veizvwnjban、swhfazban gangjmingz deng ienuengj, iugouz bingzfanj, cungj mbouj saek aen bouhmonz souhleix. De cij ndei naemj bae ra baihgwnz!

Nungz Yenh bae ra gungh’angiz ndaw yienh, gungh’anhgiz boux ciz- ban ciepdaih de, naeuz ndaw giz itdingh caiq guh diucaz, heuh de dauqranz deq dapfuk.

Buenq ndwen gvaqbae, baihgwnz soengq faenh sawdapfuk ndeu daeuj, naeuz baihgwnz ginggvaq fukcaz, naeuz aen anqgienh neix caeux gaenq gietanq lo, vunzcingq huqcingq cungj caezcienz, mbouj miz vwndiz.

Raen “lauz mbouj haeuj raemx”, Nungz Yenh cij ndaej laebdaeb bae ra lingh aen bouhmonz, de siengsaenq, lajmbwn itdingh miz giz gangj dauh- leix.

Ngoenz fwn doeksebseb ndeu, gwnz gai yienhsingz vunz gwih dienhci daenj buhfwn baebae dauqdauq, geiznding geizhenj gak saek gak yiengh bongj rumz mbinfidfid, vengzfuk byauhyij cihgim yienhda raixcaix——“Genhciz Cunghcij Aen Dangj, Cienzsim Cienzeiq Fugsaeh Lwgminz” “Gaijfang Swhsiengj, Saedsaeh Gouz Seih, Caeuq Seizdaih Caez Baenaj, Hailoh Cauhmoq” “Angqhoh Luegmuengh Yienh Daih Cibbet Baez Dangjdaivei Ciuhai”.

Nungz Yenh roengz ci cengq liengj yaek byaij. Sawqmwh song boux minzgingj humx gvaqdaeuj daiq de hwnj ci soengq dauqma baicuzsoj ndaw yangh, naeuz ndaw yangh miz gvidingh, mwh ndaw yienh hai dangj- daivei geizgan, byawz cungj mbouj bae gaujcauj baihgwnz. Goeng Couh sojcangj naeuz de:“Laujnungz ha, mwngz couh gaej sai nyaenxlai cinglig bae fonj gij saeh neix lo, mbouj miz yungh. Mboujyawx lauxsaed guhhong, ndeindei guh gwn. Danghnaeuz mwngz siengj ra faenh hong ndeu guh, gou caenhliengh coengh mwngz anbaiz gaijgez.” Nungz Yenh mbouj guhsing, baenq ndang couh deuz.

Nungz Yenh gvaq bakdou cunh- veij Mbanjfaexlimh, raen gizde baij aen daizbanhgoeng ndeu, geij boux vunzmbanj humx comz gangjgoj, gwnz daiz gep cozbaiz sij miz “guvwn faplwd roengzmbanj” geij cih saw. De caemh dep haeujbae geqgangj gij saeh de, cam boux lizswh yaek baenzlawz guh. Boux lizswh lwnh de naeuz:“Cungj saeh neix deng bae lienzhab doenghboux souhhaih caez guh caiz- liuh doxcaeuq gauq cij ndaej, ceiq ndei bae ra gijgenj genhcaz gih- gvanh……”

Nungz Yenh mbouj lau dwgrengz, mbanj gvaq mbanj bae ra doengh boux haeuj baih Mbanjnazrenh daeh faex deng haep aeu ngaenzcawxroen gvaq haenx, doxciuz caez gauq. Nyaengq bae baenz ndwen, guh ndaej faenh caizliuh miz ngeihcib geij boux vunz ciemcoh naenx yaenqfwngzmeh ndeu.

Nungz Yenh caeuq boux doengz- doih ndeu daiq caizliuh caez haeuj singz bae ra gijgenj genhcaz gihgvanh. Ngamq baengh soujgih daujhangz ra ndaej daengz bakgvaengh si gijgenj veijyenzvei, aen gingjceh ndeu couh gyaep daeuj riengzlaeng, geij boux daenj buh gingjcaz roengz ci daeuj yaek giengzhengz rag Nungz Yenh songde hwnj ci. Nungz Yenh songde mbouj fug, caklinlin, seizneix gijgenj genhcaz veijyenzvei boux gunghcoz yinzyenz ndeu caeuq geij boux baujan byaij gvaqdaeuj cam:“Fatseng maz saeh?”

“Dou miz saeh yaek ra gijgenj genhcaz gihgvanh, gyoengqde laengz mbouj hawj dou daeuj……” Nungz Yenh ciengj hemq naeuz.

Boux daenj buh gingjcaz guh- muengz gej naeuz:“O, dou dwg minzgingj Luegmuengh Yienh Nazbaiz Baicuzsoj, song boux neix dwg vunz yazgih dou, ngoenznaengz mbouj haengj anfaenh, dou lau songde daeuj neix nauh saeh, yaek soengq songde bae ranz.”

Boux gunghcoz yinzyenz haenx naeuz:“Gijneix couh mbouj yungh sou dwgrengz lo, dou miz baujan, gag ndaej hen ndei ancienz.” Gangj le couh yinx Nungz Yenh songde haeujbae cam vah.

Ngoenz hawndaep, iengj daeng- ngoenz ronghsag, mbwn raeujrub, ndaw haw vunz lai vunz daih, oengj- ywdywd, daegbied baenz haw. Vunz lajmbanj ngoenz hawndaep mbouj haengj bae nazreih, cungj bae cet haw “gai rwznuk”.

Nungz Yenh bae baizdoiq fei byoem, yaek siengj vuenh aen yiengh- siengq moq haeuj ndwencieng. Aen bouqdaeqgyaeuj soqlaiz deng vunz heuh guh “saenzsied cungsim” neix, song aen daengqraez vunz naengh rimsad. Gyoengqvunz mwngz coenz gou coenz gangjgoj siegsieg.

“Dingqnyi naeuz goeng Mbanj- faexlimh haenx ndaej bingzfanj lo.”

“Geij ndaek Mbanjnazrenh haenx ngoenzbonz deng gaemh lo, lienz goeng lauxbiuj de guh baicuzsoj sojcangj haenx cungj deng gijliz saemjcaz lo.”

“Yienghneix cij ndei, baezlaeng lauxbanj buenq faex haenx haeuj baih Mbanjnazrenh bae aeu faex couh mbouj yungh gyau ngaenzcawxroen lo.”

“Goeng Nungz Yenh haenx, guekgya deng boiz bit ngaenz ndeu hawj de, mbatneix de ndaej an’onj gvaq cieng lo.”

……

Nungz Yenh caenh rox dingq mbouj guhsing, bang vunz gangj saenzsied haenx hix mbouj roxnaj de.