Vihliux haidin okbae couh aeundaej swnhleih, 110 siujcuj bing faen sam loh: Loh ndeu 10 boux bae gaen Liuzcaet, bungz daengz couh senq gaemh vunz hwnjdaeuj, mbouj hawj de bae gyae. Loh ndeu 25 boux daengz B gunghswh bae gwn youq, ngoenzhwnz caz gij soq B gunghswh;loh ndeu 15 boux daengz daengx guek gak dieg bae caeuq gij vunz bang B gunghswh gai lijhozginh cazra baengz- gawq.

Liuzcaet diegcoj dwg Gvangj- dungh C si, ndaek vunz neix gig yiucing, daj miz vunz daeuj daengz B gunghswh caz soq seizhaenx hwnj, de couh rox gungh’anh caeuq suivu yaek daeuj ra de aeu saeh lo, de lienz hwnz ndoj deuz, mbouj raen ngaeuz lo.

Bihaenx 12 nyied 19 hauh, daih’it loh 110 siujcuj haidin bae rog sengj, daengz diegcoj Liuzcaet bae ra vunz, Liuzcaet miz saeh youq ndang, mbouj gamj iet hoz, de vunz dauq daengz diegcoj, couh dangq duzguk dauq cuengq haeuj ndaw ndoeng, de baengh swhgeij diegsug, dieg neix youq geij ngoenz, giz- haenx ninz geij haemh, noix haeuj noix ok, gyoengq 110 siujcuj faenbied youq ranz mehyah de、ranz goengda de、ranz bohmeh de caeuq ranz daegnuengx de demq le seiq ngoenz seiq hwnz, mbouj raen ngaeuz Liuzcaet. Gyoengq gingjcaz nyinhnaeuz: Caiq yienghneix demq roengzbae hix mbouj dwg banhfap, gyoengqde gietdingh mbangj vunz laebdaeb demq Liuzcaet, mbangj vunz okbae caz gij saeh gij vunz caeuq Liuzcaet mizgven haenx.

Aen banhfap neix caen ndei, mbouj geij nanz, miz minzgingj caz rox, Liuzcaet youq gwnzhaw miz dah youx ndeu, de doenghbaez baedauq cungj noix mbouj ndaej daeuj daengz ranz dahyoux gwn ninz geij ngoenz, ndaej aen siusik neix le, 110 siujcuj fan dauq henz ranz dahyoux Liuzcaet maeuq dwk.

Aen ranz dahyoux Liuzcaet dwg aen ranz dog, seiqmienh humx miz ciengz sang, sam gan gvangq haj caengz sang, ranz seiqhenz faex hung faex iq raemhrwgrwg.

Song ngoenz song hwnz gvaqbae, aen ranz neix mbouj miz saek boux vunz haeujok, ngoenz daihsam ranz yaek rongh seiz, dingqnyi miz sing haidou, gij minzgingj maeuq youq giz gyawj haenx yawjraen doiq bouxmbwk bouxsai ndeu byaij okdaeuj, gyoengq- de song boux fwngz gaem fwngz coh aen ci baujmaj ndeu byaij bae, minzgingj yawj ndaej ok, bouxsai haenx couhdwg Liuzcaet. Couh yienghneix, ngoenzhaenx Liuzcaet couh deng gaemh dauq A si.

Gaemhdawz Liuzcaet le, gyoengq minzgingj couh saemj de, Liuzcaet mbouj nyinh coih, de naeuz:“Cibgeij bi neix gou youq A si, bibi gyau geij cien fanh maenz ngaenz suiq, sou mbouj dwg mbouj rox, gou cij miz lai gyau suiq, mbouj miz yaem suiq, sou yienghneix mbouj miz baengzgawq couh gaemh vunz, gou aeu gauq sou cij ndaej.”

Gyoengq minzgingj cuj daihngeih daeuj daengz B gunghswh, dawz cwnggen okdaeuj ndenq hawj boux dawz bakdou haenx yawj le, cigsoh byaij haeuj caizvugoh bae, seizneix caizvugoh cij miz bouxmbwk bouxsai song boux yenzgungh, gyoengqde gak boux gak hwnj vangj dwkbaiz guhcaemz, mbouj raen gyoengqde guh maz hong, minzgingj heuh gyoengqde dawz gij caizvu gunghswh okdaeuj yawjyawj, song boux yenzgungh cungj ndwn hwnjdaeuj heuh minzgingj gag caz. Mizmbangj minzgingj daj hai dennauj caz, mizmbangj minzgingj fan sieng biengj gvih caz, daihgya caz le buenq ngoenz, fatyienh gij biuq ok huq、biuq gvaq caengh、biuq gai huq B gunghswh cungj mbouj raen lo, minzgingj youh daengz sam laeuz caizvusiz bae genjcaz, sam laeuz caizvusiz miz caet aen dennauj, minzgingj nyaenj hai dennauj, fatyienh gij dennauj neix cungj mbouj miz yingbanz caeuq fuzvugi. Heuh song boux yenzgungh daeuj cam, yenzgungh naeuz:“Yingbanz caeuq fuzvugi gaenq deng bouxlawz cek bae lo, duenh seizgan neix cungj mbouj ndaej guhhong.”

Sam. Riengz Gaeu Mo Gva Ra Baengzgawq Dennauj Ying- banz Laeh Dawz Dauq

“Sienq” goenq lo, baenzlawz guh ni? Gyoengq cwnghcazyenz laeglemx doxyaeng, gietdingh ra caizvu ginghlij Siuhroek daeuj cam vah. Siuhroek hix dwg vunz Guengjdoeng, samcib lai bi, vunz sang ndang byom, aen naj baihswix laj goek rwz miz aen rei ndeu, gwnz rei hwnj miz geij geu bwn. Minzgingj cam vah, Siuhroek haep bak mbouj gangj, song baih doxmuz ngoenz lai, duicangj Liu Gen raen saehcingz hoj guh, nyinhnaeuz yienghneix roengzbae nguh seizgan lai, gietdingh senq dawz Siuhroek gaemh daengz gungh’angiz bae gyaeng gonq. Caen dwg mbouj raen guencaiz mbouj lae raemxda, daengz gungh’anhgiz le, Siuhroek rox- nyinh saehcingz mbouj ndei, nyinh lo.

Laxlawz, bi gonq ngoenz he gunghswh dungjswcangj Liuzcaet heuh Siuhroek daeuj daengz bangunghsiz, naeuz de:“Mwngz ganjvaiq heuh geij boux yenzgungh daeuj, dawz gij soqmoeg swhliu gunghswh cibgeij bi gvaqdaeuj haeuj cug ndei buen daengz gizwnq bae yo.”

Siuhroek ciep ndaej vah Liuz- caet, lienz hwnz heuh geij boux yenzgungh daeuj, lumj guhcaeg nei muengzfoegfoeg dwk dawz gij soqmoeg swhliu ndaw caizvusiz cang sieng, youh lienz hwnz dawz bak lai sieng soqmoeg caizliu cang daengz gwnz gyaq ci he bae.

Ngoenzlaeng, Siuhroek daengq swhgih Vangzsam dawz ci doxgaiq neix rag bae daengz Gvangjdungh C si gyau hawj Mungzseiq. Mungzseiq sou ndaej “doxgaiq” le, rag daengz ranz daxboh Liuzcaet bae yo.

Bilaeng 1 nyied 13 hauh ban- haemh, Mungzseiq rox gunghswh dungjswcangj aenvih yaem suiq gaenq deng gaemh bae gungh’anhgiz, Mungzseiq rox saeh mbouj ndei lo, lienz hwnz ganj bae Gvangjdungh C si, gag guhcawj dawz gij soqmoeg caizliu B gunghswh yo youq ranz daxboh Liuzcaet rag faenh he okdaeuj, hai feiz coemh bae.

Ndwencieng ngamq gvaq, haj boux minzgingj couh daengz Gvangj- dungh bae ra Mungzseiq, Mungzseiq ndoj neix ndoj haenx, cigdaengz ndwenngeih, Mungzseiq cij deng gaemh dauq B gunghswh.

Vunz gaemh ndaej dauq lo, soqmoeg caizliu cij raen faenh ndeu, yienghneix aen anq neix hix mbouj ndaej caz roengzbae, baenzlawz guh ni? 110 siujcuj nyinhnaeuz: Caensaed soqmoeg caizliu ra mbouj dauq mbouj youqgaenj, ra ndaej dauq dennauj yingbanz hix miz banhfap.

Minzgingj caiq dawz Siuhroek daeuj saemj. Siuhroek nyinh naeuz:

Ngoenz ndeu, Siuhroek ciep ndaej Liuzcaet dienhvah, Liuzcaet heuh de vaiq dawz gij yingbanz ndaw gunghswh gaenq cek roengzdaeuj buen okbae yo. Ngoenzde banhaemh, swhgih Vangzsam couh dawz yingbanz rag daengz ranz dahcej de bae yo. Gvaq song ngoenz, Vangzsam roxnyinh yingbanz yo youq ranz dahcej mbouj daiq onj, youh buen daengz ranzcoj lajmbanj de bae cuengq.

Ndaej aen siusik neix le, gyoengq minzgingj daeuj daengz ranzcoj lajmbanj Vangzsam, daj laj sangz Vangzsam ra ndaej cibhaj gep dennauj yingbanz okdaeuj.

Seiq. Dennauj Yingbanz Raen Caen Soq Gag Ndaek Vunzfamh Cungj Nyinh Coih

Dennauj yingbanz laeh ndaej dauq lo, gyoengq cinghcazyenz mbouj gamj yietnaiq, vaiqdi vaiqdangq caeuq ndaw si soqgawq gamqdingh cungsim lienzhaeh, heuh gyoengq conhgyah dawz gij soqgawq ndaw yingbanz fukhoiz okdaeuj.

Aen gunghswh baenzneix hung, geijcib bi soqgawq, naemj cienzbouh fukhoiz gvaqdaeuj mbouj yungzheih, si soqgawq gamqdingh cungsim haj boux conhgyah caeuq geij boux gisuzyenz ngoenz hwnz mbouj dingz loengh gij yingbanz neix, binq okdaeuj couh miz cibgeij sieng.

Minzgingj heuh Siuhroek daeuj nyinh gij soqgawq neix, Siuhroek naeuz:“Gij soqgawq neix, couhdwg soqgawq swnghcanj、gaicawx cibgeij bi B gunghswh, caemh miz sam diuz lohsoq: Diuz ndeu dwg caensaed soqgawq gunghswh; diuz ndeu dwg guh dinfwngz gemjnoix gvaq, yienghneix guh couhdwg vihliux noix gyau suiq; diuz ndeu guh dinfwngz gya lai gvaq, yienghneix guh couhdwg vihliux yaeuh ngaenzhangz lai aeu daigvanj.

Siuhroek nyinhnaeuz, daj bi x ndwen x daengz bi x ndwen x ndawde, B gunghswh yaem suiq 41767043.15 maenz, miz baengz miz gawq, miz doxgaiq miz soqmoeg, Liuzcaet mbouj ndaej mbouj ngaem gyaeuj nyinhcoih lo, gaengawq mizgven gvidingh, B gunghswh gaenq dwg coihyaemsuiq, Liuzcaet、Siuhroek、Lijhaj、Mungzseiq、Vangzsam daengj bet boux gaenq famhfap……

（2 sat）