Bihaenx seizcin, bien Dah- yougyangh goleux va hai hoengz- fwgfwg, fwenleux gyukrwdrwd, dauq- cawq dwg gij heiq angqyangz haenx, hawj vunz simhai.

A si gungh’anhgiz ginghcwngh dadui youq baihgwnz caeuq gag dieg vangjanh（网安）、hingzcinh（刑侦）、dwzgingj（特警）、gicinh （技侦）daengj lai cungj gingjcaz caeuq suivu bumwnz maedsaed boiqhab baihlaj, bae daengz Yinznanz、Gveicouh、Huznanz、Gyanghsuh、Gvangjdungh daengj cib lai aen sengj, ginggvaq sam ndwen lai ngoenzhwnz mbouj yietnaiq, cawzliux aen anq deuz suiq ndeu, gyaep dauq ngaenz suiq 41767043.15 maenz, gaemhdawz vunzfamh 8 boux. Aen anq neix gyau hawj dangdieg genjcaz gihgvanh cawqleix.

Youq gyaepgaemh caz ra aen anq neix ndawde, gyoengq minzgingj mbouj faen ngoenzhwnz, mbouj lau haemzhoj, yienh ok le gij siengqyiengh yinzminz gingjcaz gyaeundei ndeu.

It. Dungjswcangj Okgeiq Guh Saeh Rwix B Gunghswh Gwn Suiq Seiq Cien Fanh

Saeh haidaeuz, bihaenx seiznit ngoenz he, gwnz dou hung B gunghswh hoij miz geij mbaw baengznding, mbaw he gwnzde sij naeuz:“Ngaenz- hangz mbouj cuengq ngaenz, gungh- swh yaek gven dou, cwngfuj mbouj bangcoh, vunzhong yaek dai iek.” Mbaw he gwnzde sij naeuz:“Dieg neix dieg duzguk, duzbyuk gwn duznengz, cwngfuj mbouj okrengz, doxceng mbouj swnhsim.”

Bouxdaeuz A si siveij caeuq sicwngfuj ndaej aen siusik neix, youq mbouj onj saekdi, gyoengqde baenz- lawz hix naemj mbouj daengz B gunghswh guh ok gij saeh neix.

A si gunghyezyenz miz seiqcib lai aen gunghswh, aenaen miz sam cien lai boux vunzhong, B gunghswh yienghneix nauh, gig vaiq couh gingdoengh daengz gij gunghswh wnq bae. Siveij suhgi caeuq sicangj doxyaeng naeuz:“Aeu gibseiz cawqleix ndei gienh saeh B gunghswh neix cij ndaej, mboujnex aenaen gunghswh cungj yienghneix nauh, gij gunghyez aen si raeuz couh luenh lo.”

Sicangj roengz lingh: Gak aen bumwnz doxgven aeu vaiqdi baij vunz daengz B gunghswh bae caeuq boux- daeuz B gunghswh doxyaeng baenz- lawz guh. Roengzbae guh saeh seiz aeu miz leix gangj leix, gyoengqde miz maz iugouz aeu caenhliengh muenx- cuk, hawj gij saeh hung bienqbaenz saeh iq bae, gij saeh iq dangguh saeh hung bae banh.

B gunghswh dungjswcangj Liuz- caet dwg ndaek vunz ndang sang ndeu, de naj seiqcingq, da ndaemndat, cim vunz seiz couh lumj yaek dawz vunz haeb gwn ndip nei. De mbouj rox geijlai saw, dingqnaeuz cij doeg gvaq siujyoz couh okrog dajgoeng lo, seizneix de ngaenz lai hwet geng, gangj vah rengzrwgrwg, gig noix dawz vunz cuengq youq ndaw lwgda. De rox cwngfuj yaek daeuj doxyaeng lo, heuh gunghcangj dingz hong roengz- daeuj, youq ndaw gunghswh baij sam bak lai daiz byaek, sam cien lai boux vunzhong caeuq geijcib bouxdaeuz gunghswh, guhdoih gwn laeuj gwn noh, laebdaeb sam ngoenz hemq- swdswd.

Seizhaenx daengx biengz gaicawx seng’eiq cungj mbouj ndei, ngaenz- cienz souhaeuj mbouj gibseiz, gungh- cangj giyez yungh ngaenz sinhoj, ngaenzhangz cuengq ngaenz, miz cuengq okbae nanz ndaej sou dox- dauq, couh mbouj gamj caiq cuengq. B gunghswh hix doxdoengz, doxgaiq gai mbouj okbae, ngaenzhangz youh mbouj cuengq ngaenz, gunghswh bungz daengz baihndaw doxgaiq daeb rim lumj goengqbya, baihrog ra ngaenz daeuj sai mbouj miz loh. Dungjswcangj Liuzcaet bae ra gvaq cwngfuj, daengx biengz yienghneix, cwngfuj hix mbouj miz banhfap, cij ndei heuh de cajcaj gonq, baez caj couh dwg bi lai gvaqbae, gunghswh couh yaek “goenq saihoz” lo. Liuzcaet nyinhnaeuz mbouj guh di saeh ok da ok naj hawj vunz yawj mbouj ndaej.

Suhgi、sicangj caeuq gij boux- daeuz bumwnz doxgven daengz B gunghswh, Liuzcaet vut naj gvaq henz bae, coenz vah ndeu naeuz:“Dawz saeh banh ndei caiq gangj vah, mbouj banh ndei saeh couh bae caeuq gyoengq vunzhong gwn laeuj guh- angq ba.”

Ngoenzneix Liuzcaet lumj ndaek mabag nei, couh lienz suhgi caeuq sicangj hix mbouj cuengq haeuj ndaw lwgda, gij saeh couh yienghneix yied nauh yied hung, yied nauh yied naek.

B gunghswh dwg aen giyez guh lijhozginh daengx sengj ceiq hung ndeu, dwg aen hanghmoeg buek daih’it daj baihrog yinx haeuj A si daeuj. Gunghswh ciemq dieg ngeihcib lai fanh aen bingzfueng, gij ranz gunghcangj geiz daih’it couh guh liux cibhaj fanh lai bingzfueng. Gunghswh youq gunghyezyenz guhbaenz haihong le, it bi ndaej guh ok lijhozginh bet fanh lai dun, gij lijhozginh B gunghswh hab dawz bae cang ranz- youq、 sanghcangz、binhguenj、diemq- laeuj daengjdaengj, miz sam bak lai giz gai lijhozginh faen youq daengx guek gak dieg, lij gai daengz Yeznanz、Alahboz、Ngozlozswh daengj ngeihcib lai aen guekgya bae. Youq ndaw doengzhangz, gij doxgaiq B gunghswh dwg gai ndaej ceiq okfwngz, B gunghswh daengx bi hix hawj guekgya gyau suiq haj cien lai fanh maenz.

Aen gunghswh baenzneix ndei, baenzlawz yienghneix nauh saeh ni? Baenzlawz yienghneix gamj caeuq cwngfuj sik naj ne? Mizmbangj boux- daeuz naeuz:“B gunghswh dwg duz- max roet lai ndang rengz, bouxvunz ngaenz lai vah geng.”

Mizmbangj bouxdaeuz naeuz:“Cangh lawz cangh mbouj gwn faex, sae lawz sae mbouj gwn namh, gangj mbouj dingh B gunghswh hix guh maz saeh rwix cij miz ngaenz bw.”

Gyoengqvunz yienghneix gangj- riu guhcaemz, A si gyoengq boux- daeuz hix roxnyinh miz dauhleix. Naemj gig vaiq cawqleix B gunghswh gienh saeh neix, aeu vat daengz ndaw dungx ndaw saej de bae cij ndaej. Vah bouxgeq naeuz: Moeb ngwz moeb caet conq, donj nya aeu donj rag.

Ciepdaeuj, A si baij sam boux ganbu suivu bumwnz bae B gunghswh “bang hong”, guhcaeg bae caz B gunghswh, caen dwg mbouj caz mbouj rox, baez caz yaek goenq hoz.

Miz bi ndeu, vih aeu demlai souhaeuj, B gunghswh dungjswcangj Liuzcaet heuh caizvu ginghlij Siuh- roek daengj geij boux daeuj doxyaeng, siengj banhfap baenzlawz gemjnoix sawjngaenz caeuq baenzlawz demlai souhaeuj, Liuzcaet naeuz:“Baezlaeng gij lijhozginh gai okbae haenx, buek lawz ndaej yaem suiq couh caenh- liengh yaem suiq.” Siuhroek ndaej vah dungjswcangj le, haihij youq gwnz bouh gunghswh souhaeuj haenx guh dinfwngz: Gij hek lawz aeu hai biuq, couh doenggvaq canghu gunghswh sou ngaenz, ciuq gij ngaenz ndaw gunghswh canghu bae gyau suiq; gij hek lawz mbouj yungh hai biuq, dawz ngaenz dwk daengz ndaw canghu Lijhaj caeuq Mungzseiq bae, gij ngaenz neix couh mbouj yungh gyau suiq lo.

B gunghswh dauqdaej yaem bae geijlai suiq, aeu miz caensaed soqgawq cij ndaej dingh coih. A si gozgyah suivugiz dawz B gunghswh yaem suiq gienh saeh neix gyau hawj A si gungh’anhgiz ginghcwngh dadui, ginghcwngh dadui ciep anq le, roxnyinh gienh saeh neix daiq naek, mbouj gamj rubrab roengzfwngz. Ginggvaq haihoih gietdingh, gingh- cwngh dadui caiq baij vunz bae B gunghswh caz, caz rox B gunghswh daj moux nienz moux nyied hwnj daengz moux nienz moux nyied ndawde, dungjswcangj Liuzcaet heuh gij vunz gaem soq ndaw gunghswh guh din- fwngz, caemh yaem suiq 41767043.15 maenz. Caz ok B gunghswh miz coih le, ginghcwngh dadui gietdingh ganjvaiq roengzfwngz bae laeh ngaenz caeuq gaemh vunz.

Ngeih. Saehcingz Vang Raeh Doxsan Gwnz Roen Caz Anq Boemz Hoengq

A si gungh’anhgiz daj gingh- cwngh、hingzcinh、vangjanh caeuq gak dieg baicuzsoj senj aeu 50 boux minzgingj gapbaenz aen cuj 110 ndeu, youz ginghcwngh dadui daduicangj Liu Gen guh daeuz. Liu Gen ndang hungsang, naj miz di ndaem, de banhsaeh miz gyaeuj miz rieng, mbouj faen beixnuengx baengz- youx, vunz heuh de guh——gingjcaz najndaem, de youq gungh’anhgiz guhhong ndaej 20 lai bi, doiq gyaepgaemh gak cungj gak yiengh vunzfamh gig miz gingniemh. 110 siujcuj laebbaenz le, lienzhwnz haihoih doxyaeng baenzlawz guh.

Doiq gienh saeh neix gyoengq gingjcaz cungj nyinhnaeuz:“B gungh- swh dwg aen giyez ndaw guek rog guek cungj mizmingz ndeu, gunghswh dungjswcangj Liuzcaet baihgwnz baihlaj baihndaw baihrog cungj miz vunz, de youh mbouj dingq vah bouxwnq, raeuz naemj heuh de gangj saeh cungj sinhoj, seizneix yaek bae lumh caekhaex de, engq nanz ndaej doenghfwngz, daihgya aeu gaemfwngz hwnjdaeuj, daengz gunghswh de bae, caz ra gij soq ndaw gunghswh de, caemhcaiq vaiqdi fung hwnjdaeuj.”

（1）