“Dang dang dang……” Sing cung coux moq byonghhwnz yiengj lo, sing daih’it, sing daihngeih, sing daihsam…… Doengh gij saeh gvendaengz bi 2023 cungj bienqbaenz doenghbaez lo.

Lumj dwg baez mbat lwgfwngz, ci’ndaenj lezceh seizgan couh ringx haeuj bi 2024, bi 2023 couh baenz doenghbaez. Aen lezceh seizgan youh dap raeuz bae aen camh moq baihlaj——bi 2024. Vadvad fwngz, bi 2023 couh yied bae yied gyae; mbehai song gen, bi 2024 couh got haeuj ndaw rungj. Ndwenngoenz dwg ceiq moq, gizhaidin hix dwg ceiq moq, youq bimoq yaek hwnjdin, yienghlawz cungj mbouj rox baenzlawz, bouxlawz hix mbouj rox yaek gvaq ndaej yienghlawz, mbouj simvueng mbouj da laep, gvaq ndwenngoenz baenz cihgeij siengj aeu gvaq haenx, gvaq baenz aen yiengh cihgeij ceiq gyaez haenx, ngoenzlaeng miz maqmuengh.

Dauqngeix seiz doenghbaez lij oiq, “nienz oiq mbouj rox you, nyengh mbouj maij doegsaw. Ngoenzngoenz gvaq ngoenz byouq, fanh saeh guh mbouj baenz.” Moix ngoenz gvaq ndaej simfouz youh simcit, ngoenz doek ngoenz dauq, ndwen gvaq ndwen, caenh rox yawj daengngoenz hwnj youh doek, ronghndwen rongh youh ndaep, yiengh ndeu cungj guh mbouj ndaej baenz. Seizneix vunz daengz cungnienz, gwnz miz bohmeh lauxgeq aeu ciengx, laj miz lwgnding iqet aeu rungx, moix ngoenz lij miz gij hong nyaengqnyat aeu guh, yienghyiengh cungj lumj goengq byasang nei, at ndaej vunz hwet gungj nanz diemheiq. Ndigah seiz fangzhwnz cungj siengj dauq daengz seiz lwgnyez, gvaq cungj ndwenngoenz mbouj you mbouj ngeix: Dungx iek hozhat, miz gij gwn rangfwd daxmeh cawj youq ndaw rek; naetnaiq raninz, miz mbaq bohmeh giengeng daeuj ai. Miz haujlai seiz naetnaiq le, gou cungj laihnaeuz cihgeij lij dwg dahmbwk diuqyetyet youq ndaw gyanghongh, henz ndang miz gyoengq nyezdoih guh’angq gyaep bae gyaep dauq, lij miz daxbuz cingq unqswnh gangj gojgaeq hawj gou, bohmeh gaenxguh mbouj faen hwnzngoenz nyaengq bae nyaengq dauq. Hoeng naetnaiq baez gvaq, gij laihnaeuz couh lumj aen fugfauz ndongqlik youh ronghrib cingq mbin youq laj ndit, baez bungq couh bauq le siusaet bae lo. Gou rox, ndwenngoenz mbouj dwg gojlwgnyez, baenzlawz cungj aeu bae najdoiq gij yienhsaed yaemcit.

Mizseiz hix cungj nyinhnaeuz dwgriu, seiz lij iq dwg lwgnyez, sim cungj siengj vaiqdi majhung, cungj laihnaeuz: Majhung le mbouj yungh gaujsi, hix mbouj yungh raiz cozyez, baenzbaenz cungj miz hong guh ra ndaej cienz; majhung le cihgeij siengj bae guh maz couh bae guh maz, siengj baenzlawz gvaq ndwenngoenz couh baenzlawz gvaq; majhung le couh gag miz gij bonjsaeh hwnj mbwn roengz namh, neix mbouj dwg gig ndei ha! Hoeng caencingq majhung le cij fatyienh ndwenngoenz dwg baenzneix fouzcingz fouznaih, de couh lumj cik fwngzfangz hungmbwk caemhcaiq yawj mbouj raen ndeu, rag mwngz diuq hwnj diuq roengz, saet bae saet dauq. Seiz iq ndaej naed diengzvan couh lumjnaeuz cihgeij gaenq miz gij doenghyiengh gwnzbiengz ceiq ndei, caenh riuhaha sim’angq dangqmaz, seizneix gaenq mbouj roxnyinh gij sim’angq genjdanh seizhaenx dwg baenzlawz yiengh lo. Gij sim’angq doenghbaez, seizneix hix riengz bi ra mbouj ndaej doxdauq lo. Seiz iq gaenq gvaqbae, gwnzbiengz gaenq bienqvaq!

Seizgan fouzcingz, yaep da couh gvaqbae lo. Raeuz baez byaij yamq he cungj ndaej yawjraen gij gingjsaek mbouj doxdoengz. Doeg le haujlai saw ndei, swhsiengj cihgeij menhmenh ndaej daezsang lo. Youq ndaw gij ndwenngoenz hoenghhub neix, gou hag rox caemdingh aen sim, mbouj caiq fat maxlaz, engq mbouj caiq gamj dawz cihgeij beij baenz duzbid, ndoj le sam bi cij vih aen seizhah ndeu. Gou cij rox aeu dawz aen sim cihgeij baij cingq, sim cuengq gvangq, da yawj ndaej hailangh, roengzrengz gaenxguh, aiq ndaej gvaq ndwenngoenz ndaej baenz aen yiengh cihgeij siengj gvaq haenx. Bi 2023, doegsaw, sij cih, ndaem byaek ndaem va, ginggoj dajging, ra youx lauh haw…… Seiz guh hong couh guh hong, seiz ndaejhoengq couh cuengqsoeng cihgeij bae caemz, siengj guh maz couh guh maz. Gou nyinhnaeuz: Dauqdaej gij gyaeundei ndaw biengz lij miz haujlai hawj vunz sim siengj sim muengh, sim’angq simcuk ne.

Dauqyawj bi 2023, mizseiz mbouj swnh, mizseiz siengsim, hix miz simhai sim’angq. Hoeng cijaeu cihgeij haenqrengz guh, netsim caux, hix ndaej mbouj vueng mbouj muengz byaij gvaqbae, mbouj lau mbouj suk, haenqrengz bongj raemxlangh baenaj, nyangz oen couh yunghrengz baet, raen gumz laeg couh dienz. Gij ndwenngoenz gvaqbae haenx, dauqngeix hwnjdaeuj aeu rox lumz bae simnyap simyou, insik duenh seiz simhai sim’angq, cingsaenz couh seizseiz cungcuk, neix couhdwg gij souhaeuj cihgeij caenhrengz bae buekguh, dwg faenh dapgienj ceiq muenxeiq ndwenngoenz bingzciengz.

Seizneix, gaenq dwg bi 2024, soengz youq seiz biek gaeuq coux moq, gou simlangh fanfoed, diuz roen seiqvunz miz haujlai nanz haujlai yiemj, cijaeu riunyumnyum bae najdoiq, couhsuenq gamz dawz raemxda ndawsim hix ndaej hai ok dujva singjsien.

Seiqvunz bouxlawz cungj dwg soemj manh haemz hoj hamz haj cungj feih rangh hwnjdaeuj, danghnaeuz siuj le cungj feih lawz, ndwenngoenz couh caen mbouj miz feihdauh lo. Geiq ndaej miz coenz vah ndeu gangj: Gij haemz mwngz gwn gvaq, gij naiq mwngz souh gvaq, cungj miz ngoenz ndaej bienqbaenz gij rongh ciuq gij roen mwngz ngoenzlaeng byaij baenaj haenx. Ndigah seizneix mwngz naemj maz, seizneix mwngz guh maz, di neix di haenx doxlienz hwnjdaeuj couhdwg gij ndwenngoenz hajsaek, dwg gij ginglig seiqvunz mbouj ndaej siuj. Ginglig seiqvunz miz geijlai na, miz geijlai gvangq, cungj dwg youz mwngz cihgeij daeuj gietdingh. Moix cungj feihdauh cungj wnggai ndaej insik, cungj hawj vunz nanzlumz.

Bi 2024, vih nyangzraen cihgeij engq gyaeundei, goj lai doegsaw, lai lienhndang, lai riunyumj, siuj di simnyap, noix di ngeizvaeg, gvaq ndwenngoenz baenz cungj yiengh cihgeij siengj aeu gvaq de, mbeihung bongh coh naj, mboujguenj gij roen baihnaj dwg daihloh roxnaeuz roennou, hix mboujguenj gwnz roen dwg hai doh vamoq roxnaeuz maj rim gooen.

Gij simyou simnyap cungj ce youq bi 2023, aeu simhai sim’angq daeuj coux bi 2024. Bi 2023 caiqraen, bi 2024 mwngz ndei!