Swcigih Vwnzva Caeuq Lijyouz Dingh mboengqneix goengbouh le aen mingzdan mbanj cungdenj lijyouz saekhoengz buek daih’it, Gveilinz Si Cenzcouh Yen Caizvanh Cin Nanzyiz Cunh daengj 8 aen mbanj ndaej senj haeuj.

Vih coihaeuj saenqhwng laj- mbanj caeuq hwnqguh lajmbanj cing- saenz vwnzmingz, fatok gij goeng- naengz son’gyauq lijyouz saekhoengz, doicaenh lijyouz saekhoengz caeuq lijyouz lajmbanj、lijyouz swnghdai、lijyouz dijyuz daengj mizgven yiengh- saeh caeuq gijgwn、dozninz daengj mizgven canjnieb doxyungz hwngfat, Swcigih Vwnzva Caeuq Lijyouz Dingh guh hong senjleh aen mbanj cungdenj lijyouz saekhoengz Gvangjsih buek daih’it.

Ciuq bauq、saemjhaed caizliuh、dangciengz haedniemh、cunghab bingzngeih、dinghvuvei saemjngeih、goengbouh daengj bouhloh, Gveilinz Si Cenzcouh Yen Caizvanh Cin Nanzyiz Cunh、Gveilinz Si Hingh’anh Yen Vazgyangh Yauzcuz Yangh Dungzyinz Cunh、Bwzswz Si You- gyangh Gih Gai Bwzcwngz Cunghsanh Segih、Gveilinz Si Gvanyangz Yen Sinhhih Cin Hozmuz Cunh、Vuzcouh Si Vansiu Gih Yayingj Cin Fungvangz Cunh、Liujcouh Si Yungzsuij Myauz- cuz Swciyen Yungzsuij Cin Sinhgoz Cunh、Yilinz Si Hinghyez Yen Cwngzvangz Cin Lungzdanz Cunh、Hozciz Si Dunghlanz Yen Vujcon Cin Dunghlij Cunh 8 aen mbanj(segih) ndaej senj haeuj aen mbanj cungdenj lijyouz saekhoengz buek daih’it Gvangjsih. Mizgven bouhmonz caeuq deihfueng yaek cingjhab guhndei gaiq swhyenz seizneix miz, gaenxmaenx haeujcoengh hwngfat aen mbanj cungdenj lijyouz saekhoengz, caemh- caiq fatok gij cozyung daiqdoengh de, bangrengz saenqhwng lajmbanj.

(Loz Vanli)