Gauh’wjgih naeuz:“Gaeqmeh cungj rox gyaez lwg.” Boux vunz youq lajmbwn, gyaez lwg swhgeij、gyaez vunzcaen dwg wngdang, danghnaeuz miz sim gvansim bangcoh vunzbiengz, aen seiqgyaiq neix couh huzndei lai lo. Youq bingzciengz, gou ciengzseiz bungz daengz gij vunz gij saeh yiengh- neix, hawj gou sim raeuj, hawj gou gamjdoengh, hix hawj gou mizsim bae gvansim bangcoh bouxwnq.

Aen Liengj Gyangfwn

Gyanghaet, gou hai conghcueng yawj okbae, raen gwnz mbwn fwj laepcupcup, fwn yaek doek lo. Gou ganjgaenj heuh daeglwg hwnq, bae youwzyenz vaiqdi.

Okdou mwhhaenx, fwn moenqsepsep, hoeng gou mbouj siengj daenj buhfwn, aenvih yaek ganj seizgan, daenj buhfwn git fwngz git din. Daj haeujcin daengz seizneix, gou ciengzseiz dak ndit soen fwn, di fwn moenqditdit neix, gou nyinhnaeuz mbouj miz maz saeh.

Gou doi aen cidendung okdaeuj, heuh daeglwg naengh baihlaeng. De benz hwnj daengq, song fwngz got hwet gou ndaetndingnding, naj diep baihlaeng gou, vah hix mbouj lumj bingzciengz lai.

Gou rox de guh’unj, gou hix maij de gvai yienghneix. Fwnmoenq dangqnaj mbin daeuj, nem hwnj gwnz byoem、gwnz naj、gwnz ndang gou, gou lumj duz gaeqmeh mbe fwed dangj lwg nei, daeglwg ndoj youq baihlaeng gou, fwn soen mbouj daengz de.

Bae daengz youwzyenz, gou soengq daeglwg haeuj gyausiz. Cienqlaeng roengz daengz bakdou it laeuz, laegfwngh raen baihrog fwnhung doeksasa, aen liengj gou cuengq youq gwnz ci, baenzlawz guh? Haujlai bohmeh hix lumj gou nei, ndwn youq bakdou, yawj fwnhung ngauz gyaeuj, mbouj miz banhfap okbae.

Gou ndwn youq bakdou, yawj fwn yied doek yied hung, mbouj rox seizlawz cij dingz, hix yaek daengz seiz hwnjban lo, gou ndawsim gaenjgip raixcaix.

Gou naemj bae naemj dauq, gietdingh cung okbae, buet daengz henz ci. Gou dingj aen daehfwngz dangj gyaeuj, couh cung haeuj gyang fwn bae. Aen daehfwngz iq lai, ngamqngamq ndaej dangj lwgda.

Gou buet daengz henz cidendung. Youq bangx- henz aen ci gou, miz boux mehcoz ndeu daenj buhfwn, de dawz yaekseiz okdaeuj hai ci, baihlaeng de miz bouxlaux byoemhau ndeu, bang de gang liengj cw fwn. Goeng vunzgeq raen gou dingj aen daehfwngz iq ndeu, couh riu naeuz:“Aen daeh mwngz iq lumj faj fwngz nei, dangj ndaej maz le?” Doq gangj doq senj aen liengj gvaq gwnz gyaeuj gou daeuj. Aen liengj iq lai, ngamq ndaej goemq gvaq gwnz gyaeuj gou caeuq mehcoz de, goeng vunzgeq youq rog liengj, fwn soen ndaek gij byoemhau de、gij buh de.

Gou ngamq dawz buhfwn okdaeuj seiz, boux mehcoz de couh hai ci bae lo. Hoeng goeng vunzgeq caengz lizbae, lij ndwn youq dieg gaeuq gang liengj hawj gou, caj gou daenj buhfwn、daenj mauh, caeuq gou gangjgoj. De naeuz, haxbaenh hai ci bae bouxde dwg dahlwg de. De haetromh okdaeuj youz, ndawsim ngeix daeglan vaihseng, couh byaij gvaq baih youwzyenz daeuj. Ngamqngamq byaij daengz youwzyenz, laegfwngh bungz fwn doek, cingqngamj bungz dahlwg de soengq vaihseng okdaeuj, deng fwn soen dawz, de sim’in dahlwg, ganjgaenj buet daeuj gang liengj. De raen gou hix mbouj miz liengj, couh riengzfwngz cw gou dem, mbouj goq ndang swhgeij deng fwn soen ndaek.

“Bohlungz ha, docih mwngz lo, gij buhvaq mwngz ndaek caezcienz lo. Doiq mbouj gvaq lo!” Gou youh gamjdoengh youh mbouj gvaqeiq.

“Mbouj youqgaenj, buh dumz gou ma ranz vuenh couh ndaej, sou bouxcoz youh yaek hwnjban, youh yaek ciuqgoq lwgnyez, mbouj ndaej baenz bingh ha!” Goeng vunzgeq naeuz.

Coenz vah neix hawj gou sim raeujrubrub, gou gamjdoengh ndaej raemxda yaek doek roengzdaeuj lo. Gou mbouj dwg bouxlwg de, hoeng aenvih gou caeuq dahlwg de doengzban, de hix gyaez gou lumj gyaez dahlwg de nei.

Youq ngoenz fwn doek ndeu, goeng vunzgeq byoemhau ndeu, aen liengj cw fwn ndeu, hawj gou gamjdoengh dwg raemxda yaek loenq.

Gaem Nyodgva Gyanghwnz

Miz haemh ndeu, gou caeuq baengzyoux youq gyaeuj haw gwn liengzcaz. Bungz raen boux mehbaj ndeu rap byaekheu gvaqdaeuj gai.

Boux mehbaj neix bwn’gyaeuj hau lumj faiq, naj nyaeuq lumj lwgndiq, ndang byomnyieg, buh vaq gaeuq, yamqdin naeknumq. Rap byaek de aen lamz ndeu cang rim nyodgva, nyodgva miz di reuq, aen lamz ndeu cang makyungz, makyungz aenaen ronghrikrik.

De byaij daengz henz dou dingz, haibak cam naeuz:“Sou aeu nyodgva lwi? Gij byaek neix gou gag ndaem, mbouj cuengq nungzyoz caeuq vafeiz nauq.”

Gou doeksaet yat, cam de:“Mehbaj, gyanghwnz lo, mwngz baenzlawz lw baenzlai byaek ne?”

De naeuz:“Gou soengq byaek hawj bouqhaeux, gyoengqde aeu mbouj ndaej baenzlai, gou cijndei riengz loh gai lo.”

Yawj mehbaj neix, gou siengj hwnj goeng vunzgeq youq gyangfwn bang gou gang liengj de. Mehbaj neix caeuq daxmeh gou nienzgeij doxdoengz, gyanghwnz lo, de lij youq gyaeuj haw buet gwnz buet laj gai byaek, gou sawqmwh gig sim’in, naeuz de:“Mehbaj, gou cawx gaem nyodgva ndeu ba!”

Ngamq gangj sat, gou laegfwngh ngeix hwnj ndaw daeh mbouj miz ngaenzlingz. Mehbaj neix mbouj miz soujgih, de naeuz:“Mehlauxbanj diemq liengzcaz miz ngaenzlingz, mwngz aeu veihsin bae caeuq de vuenh.”

Gou youh ngeix hwnj ngoenzcog mbouj miz vunz youq ranz, gou aeu nyodgva guh maz ne?

Mehbaj raen gou ngeizvaeg, caiq naeuz:“Mwngz cawx gaem ndeu ba, mwngz daiqdaeuz cawx gou couh ndei gai lo.”

Vah gangj daengz gizneix, gou hix mbouj ngeizvaeg lai, hwnqndang bae diemq liengzcaz vuenh ngaenzlingz. Ndaw diemq miz song boux hujgeiq caeuq song boux vunzhek naengh youq gizde, doq gwn caz doq riu yawj dou doxgangj. Gyoengqde raen gou byaij gvaqbae, couh riu naeuz:“Dahnuengx ha, mwngz deng yaeuh lo, yah neix haemhhaemh cungj rap byaekgva daeuj gai, byaek dwg de buenq, mbouj dwg de gag ndaem le, gaem nyodgva de youh geq youh reuq, cij dij sam maenz, de aeu mwngz roek maenz, mwngz gaej aeu lo!”

Gou naeuz:“Gou rox liux, hoeng gou gaenq dapwngq de gvaq, gou muengh de gai sat vaiqdi, ma ranz yietnaiq, gwndaenj mbouj yungzheih ho!”

“Mwngz caen dwg vunzndei lo!” Seiq boux vunz riu gou, hix mbouj caiq gangj maz lai lo. Mehlauxbanj vuenh ngaenzlingz hawj gou, gou dawz hawj yah mehbaj haenx, lij hoh de byaek ndei gai.

Gwndaenj mbouj yungzheih, gou cawx gaem byaek ndeu, de couh gai ndaej vaiq, lai canh di ngaenz!

Buzgeq Ranznden

Song boux vunzgeq youq ranznden laeng ranz gou, caeuq bakdou ranz gou doxdoiq.

Buzgeq ranz de vunz simndei, dinfwngz gaenx, de ciengzseiz gaem sauqbaet baet mbaeklae, gwnz naj cungjdwg riunyumnyum, gangj vah coenz unq coenz van, soqlaiz mbouj riengz vunz doxceng doxndaq.

Buzgeq neix yienznaeuz laux, hoeng de mbouj naengh gwn caj dai. De rox guh haizdemh、haizbaengz lwgnyez, dinfwngz cibfaen lig. De ngoenzngoenz mbouj hoengq saek yaep, gyang- ngoenz caiz baengz ci haizdemh、guh haiz lwgnyez, banhaemh dawz bae bakdou cauhsi roxnaeuz gvangjcangz giz vunz lai baij gai. Gij haizdemh caeuq haizbaengz iq de ndeiyawj, vunz maij cawx. Mbat dou youq gwnz loh bungz de aemq aen baufug hung cang huq bae baijdan, roxnaeuz soudan dauq, cungj bang de aemq aen baufug de ma daengz ranz.

Miz ngoenz ndeu, buzgeq doiqdou ranz gou soengq sam fouq haizdemh gvaqdaeuj, riunyumnyum naeuz:“Gou guh boux fouq haizdemh hawj sou, sou sawq yawj hab mbouj hab din.” Dou ciep gvaqdaeuj, cuengq haeuj ndaw haiz bae sawq, ya, mbouj hung mbouj iq, ngamqngamq hab. Gou dwg mehmbwk, fouq gou couh aeu baengzva ci, fouqfouq cungj ci ndaej lig. Buzgeq neix caen daraeh, lienz gij din dou hung iq, de cungj guj ndaej cinj. Gij haizdemh neix cuengq ndaw haiz, dou daj din raeuj daengz sim.

Bouxgvan gou maij dwkset, moix baez dwk ndaej bya dauq, dou cungj soengq geij duz hawj ranz doiqdou, song bouxgeq doiqdou daj ranzcoj dawz maknganx、makoij、lwgmaenz、haeuxyangz dauq, cungj faen dingz ndeu hawj dou. Dou song ranz mizgwq dox soengq geij aen ceiz, mizgwq dox hawj geij aen mak…… Ranz de miz maz hongnaek, dou couh gvaqbae bangfwngz.

Yaep seiz, cibgeij bi gvaqbae, dou song ranz doxbang doxcoh, doxyouq doxndei. Goenggeq doiqdou dang bing gvaq, guh vunz cingqheiq swnzsienh, song bouxgeq doxndiep doxgyaez, coengzlaiz mbouj miz doxndaq naj hoengz gvaq.

Vunz gwnzbiengz cungj naeuz, youq ndaw singz, boux mbouj roxnaj boux, baez bungz gyaeuj doxdaemj hix mbouj doxdongx. Hoeng cibgeij bi gvaqdaeuj, doiqdou song boux vunzgeq neix, daih dou lumj vunzcaen nei, hawj dou guh yienghndei, song ranz dou mbouj dwg vunzcaen, ndei gvaq vunzcaen.