4. Dingzhong Nauh Hoenghhwd

“Haj·samcib” camjanq,

Gyoengq lauxbanj gaj vunz,

Dangq sawqmwh hwnq rumz,

Fwj laep mbwn laep deih.

Gak dieg baez ndaej nyi,

Bouxboux miz dungx heiq,

Vunzrwix daeuj cauxsaeh,

Mbouj ndaej cuengq gvaq de.

Gvangjcouh caeuq Yanghgangj,

Ngeihcib fanh vunzhong,

Bouxboux cungj hozbongz,

Dingzhong nauh hoenghhwd.

Dwng Cunghya(邓中夏) daiqdaeuz,

Yinx raeuz fanj apbik,

De banhsaeh daeklig,

Hen leih’ik vunzlai.

Dangjyenz Suh Caucwngh(苏兆征),

Caemh daeuj daiqlingx raeuz,

De ok geiq ok maeuz,

Lij guhdaeuz guhciengq.

Dingzhong ndwen doek ndwen,

Dangguen ndi guenj ndaej,

Vunzlai baez fatheiq,

Hemq saenq deih saenq mbwn.

Gyoengq vunzfouq vunzrwix,

Deng swiq gaeuq mbouj caengz,

Ngoenzneix bok caengz naeng,

Ngoenzlaeng hit rox mbouj.

Boux gwn vunz fatcaiz,

Siengj ra dai couh daeuj,

Dou mbouj dwg gangj yaeuh,

Dou mbouj gangj guhcaemz.

5. Lajmbanj Rumz Caemh Hwnj

Lajmbanj rumz caemh hwnj,

Mwnqmwnq faenx mbin sang,

Vunz dawz gvak dawz hanz,

Geuh hai cang’yohaeux.

Bakfanh vunzguhnaz,

Doxca moeb dicuj,

Doq luet haeux aeu huq,

Cungj gamj guh gamj dang.

Vunz lailai daihdaih,

Lumj raemxhaij hwnjciuz,

Geq coih cienfanh diuz,

Naeuz mbouj nyiuz mbouj cuengq.

Boux ngaekgwn vunzlai,

Ngaiz dawz bae youzdaeuq,

Mauhceij daep gwnz gyaeuj,

Lij deng saeuj doh ndang.

Ndaek lawz mbouj lauxsaed,

Faexgyaengh moeb riengz laeng,

Gaxgonq byawz ngeix daengz,

Doeklaeng miz ngoenzneix.

Biengz neix baenz biengz maz,

Ciengj daemznaz hoenghhub,

Seiqlengq luenhlublub,

Hakdoj yup gvaq ngoenz.

Fwnrumz geujhumhum,