Vahsug gangj: Meh mbouj yiemz lwg ngawz, ma mbouj yiemz ranz gungz. Eiqsei gawq vah neix youq gwnz ndang Bohsam caeuq Mehsam yienhdwkdwk, daegbied Mehsam, vunzmbanj cungj naeuz de huk.

Bohsam bineix ndaej hajcib bi, ndaej samcib sam bi cij aeu ndaej yah, mbouj geij nanz seng miz daeglwg. Byawz rox, seng lwg seiz, aenvih dungxsaw noix, raen’gvangq mbouj lai, youh najmong launyaenq cam vunz, loek gvaq gij seiz ndei seng lwg, bouxlwg dingz youq ndaw dungx bouxmeh daiq nanz, ndoet gwn yangzsuij sanq haeuj ukgyaeuj. Canghyw gienq naeuz:“Ceiqndei mbouj ciengx lo, yangzsuij haeuj uk daiq lai, ngoenzlaeng aiq mbouj rox byaij mbouj rox gangj, mbouj ndaej gag gvaqngoenz.” Mwhhaenx yawj- naek lwgsai, Bohsam baenz laux cij aeu ndaej yah, danghnaeuz daeglwg mbouj lumj canghyw baenzneix gangj ne? Bohsam caeuq Mehsam siengj bae ngeix dauq, lijdwg daiq daeglwg ma ranz ciengx lo.

Ngoenz gvaq ngoenz, ndwen doek ndwen, daeglwg ak gwn rox ninz, yied ngoenz yied hung, yawj hwnjdaeuj caeuq lwgnyez wnq hix mbouj miz maz mbouj doxdoengz, couhdwg mbouj rox riu mbouj rox daej. Bohsam caeuq Mehsam hainduj simgip lo, doq daiq daeglwg daengz aen yihyen Nanzningz guh genjcaz, canghyw gangj gij gezgoj caeuq gaxgonq doxdoengz. Daj ngoenzhaenx hwnj, Bohsam caeuq Mehsam yamq hwnj diuz loh raez- rangrang yw lwg, moix sam ndwen daiq lwg bae caeu lwed swiq uk, moix baez song fanh sam fanh, sai cienz- ngaenz ndaw ranz liux, youh laeng beixnuengx caencik ciq. Bi he gvaqbae lo, daeglwg cawzliux daej, mbouj rox riu hix mbouj rox gangj, lij mbouj rox naengh, bouxvunz lumj duznon mbouj miz ndok nei baiq- buegbueg. Canghyw gienq songde mbouj yungh caiq sai cienzngaenz daeuj yw lo, swnh seiz ba. Mbatneix Bohsam caeuq Mehsam caen daengx.

Couh yienghneix sat la? Caen mbouj miz banhfap la? Daj baezneix hwnj, Bohsam boux dog bae guhhong, Mehsam guh di hongranz, cienmonz buenx lwg guh gij yindung fukcangq. Moix ngoenz haethaemh, cawzliux fwn hung byaj raez, cungj raen Mehsam got lwg lienhbyaij. Daeglwg cib bi ndawde, ndang lij mbaeu, fuz de lienhbyaij mbouj miz maz nanz. Seizneix, daeglwg gaenq ndaej ngeih- seiq haj bi, ndang sang naek gvaq bouxmeh, byaij loh ngeng hoz ngeng gyaeuj, daengx ndang unqnamnam, ndwn hix ndwn mbouj maenh, byaij yamq saemxsax song sam yamq, dwgrengz sinhoj cij miz Mehsam gag rox. Vunzrog lwnhnaeuz:“Gaeu vaiz hwnj faex miz maz yungh?” Cungj rox mbouj miz yungh, hoeng, cijaeu lij miz gaemz heiq, mboujguenj bouxwnq baenzlawz gangj, Mehsam couhdwg dingz mbouj roengzdaeuj, aenvih de cungj ienqhoij, ienq bonjfaenh nguh daeglwg. Couh yienghneix, Mehsam ngoenzngoenz lumj muimeuz gamz lwg nei got daeglwg byaij luengqhongh hwnjroengz seiq haj baez, daeglwg swenjaa mbouj siengj byaij seiz, de couh lumj hat vaiz nei maenj naeuz:“Bae, byaij, mboujndaej dingz.” Doq fok doq nyoengx daeglwg byaij baenaj, aen hwet van lumj gung.

Gwnzbiengz aiq maz cungj dwg gyaj dwg hoengq, hoeng gij gyaez bohmeh dwg caen, ciengxlwenx mbouj bienq. Mboujguenj bouxwnq baenz- lawz gangj, bohmeh daiq lwg daeuj daengz gwnzbiengz, buenx lwg maj- hung, hawj lwg vaiqvued, mboujguenj geijlai dwgrengz sinhoj. Mehsam couhdwg yienghneix, gyaez daengz gizlaeg mbouj rox ienq, cungj sij mbouj ndaej vut lwg, mbouj yiemz lwg caed, gyaez lwg mbouj bienq.