Namzguek seizdoeng raeujrubrub,

Cien duj valup hai hoengzmaeq;

Dangj cungjsuhgi daengz Guengjsae,

Byaraemx ndeimaez(vuenheij) riu mbouj duenh.

Byasang diuq foux diuqyoekyoek,

Raemxhaij laefoed laecangcang;

Lwgminz ciengq go ok sing sang,

Docih cunghyangh soengq fuk daeuj.

2023 caen vuenheij,

Mbanjcuengh daihdeih fwen lairaeuh;

Dangj cungjsuhgi soengq raeuj daeuj,

Baihnaj yied gaeuj(yawj) loh yied gvangq.

De ngamq dauqok Yeznanz ma,

Sikhaek dinga dieb Mbanjcuengh;

Guengjsae duh raeuz caen miz muengh,

Gyoengqraeuz beixnuengx angqvauvau.

Gwnz bya vacwx hoengzlili,

Dangj cungjsuhgi daeuj daengz ranz;

Sai mbwk laux coz duj sim van,

Bouxboux ok ranz daeuj angqcoux.

De youq gaujcaz ndawde gangj,

Gaijfang swhsiengj bae guh saeh;

Cauxmoq gouz bienq yaengj lai ndei,

Yiengq haij guh bae giengz fazcanj.

Haenqrengz bae sij bien faenzcieng,

Yiengh yendaiva Cungguek raeuz;

Guengjsae yied ngoenz yied lai gyaeu,

Haeuj neix baenaj daih mizmuengh.

Cibngeih nyied ngoenz cibsam hauh,

Dauqok Yeznanz daengz ndaw guek;

Nyaengq gij saehcingz buek youh buek,

Nyengh roengz Diegcuengh ma yawjngonz.

Ngoenz cibseiq hauh cibhaj hauh,

De vunz bouxlaux mbouj lau baeg;

Haeuj daengz Namzningz Laizbinh dieg,

Max mbouj dingz gieg(din) guh diuyenz.

Cungguek Dunghmungz Sinsizgangj,

Dwg camh daih’it de yawjngonz;

Soujsien dingq gij veibau gonq,

Yienzhaeuh gangj son hawj gyoengqvunz.

Cungguek Dunghmungz Sinsizgangj,

Guh hangh hong neix cungyau hung;

“It rangh it loh” guh doengzgungh,

Raeuz caeuq Dunghmungz ndaej doxdoeng.

Guengjsae guhsaeh aeu cujdung(cawjdoengh),

Fazveih cozyung gij ceiqdiemj(cihdenj);

Guh sinsizva aeu gyagiengz,

Daezsang gij yiengh guh hailangh.

Docih dangj daeuj gyaq giuzgim,

Hawj raeuz hwnjdin yamq baenaj;

Gak cuz beixnuengx mbaq deb mbaq,

Hwngvuengh Cunghvaz miz maqmuengh.

Gyawj bya cij rox roeg ciengq go,

Gyawj raemx cij rox bya fad giz(fwed);

Haeuj daengz ndaw naz caeuq ndaw rih(reih),

Dangj cungjsuhgi ceiq yinghmingz.

Daeuj daengz Namzningz Liengzging Gih,

Gangj aen vwndiz hawj raeuz nyi;

Cunghvaz Minzcuz gungdungzdij,

Yaek daj segih guh hwnjbae.

Ganbu ginzcung ndaej gujvuj,

Buxbux(bouxboux) ndaw sim raeuj lumj feiz;

Sigloux giet naed got itheij,

Fazcanj roengzbae yaek yungh goeng.

Beixnuengx doengz gungh youq lajmbwn,

Doengz guh hong gwn doengh naz ndeu;

Vunzlai doengz ndoet diuz dah heu,

Bouxboux doengz heux guh mbanjranz.

Dangj cungjsuhgi gyaez bouxminz,

Gangj vah ndaw sim raeuz dungx raeuj;

Gyaeundei Guengjsae baengh fwndou,

Loqsiengj duh raeuz baenz dahraix.

Duzroeg gyaez ndoeng bya gyaez raemx,

Bouxdaeuz ndaw saem(sim) gyaez lwgminz;

Gyaeuj reih gyaeuj naz louz rizdin,

Caeuq lauxbeksingq gangj hongliengz.

Laizbinh dieg neix miz oij lai,

Hawj gou sim hai angqyangzyangz;

Fazcanj gwzgiz lai guh dangz,

Cungqvunz angqyangz miz maqmuengh.

Cuknyienh ndaw mbanj gyoengq beixnuengx,

Gwndaenj mbouj ruengx caez angqyangz;

Ndwenngoenz lumj oij van lumj dangz,

Yienghyiengh hwnj sang bae baihnaj.

Doicaenh Guengjsae dangzyez(guhdangz saeh-

nieb) raeuz,

Fazcanj dingh aeu gauh cizlieng;

Souj ndei “guenqdangz” vunz lajbiengz,

Gyoengqsou ciengzciengz dawz rap naek.

Caenndang byaij haeuj daengz dangzcangj,

De miz vah gangj hawj gyoengqraeuz;

Dangj cungjsuhgi youh caiq naeuz,

Youhsi canjyez yaek guh ak.

Aeu go oij ndeu roengzdaeuj dawz,

Saedyienh “gwn hawq youh caq caenh”;

Gij fu’gyahciz sang lai faenh,

Guh baenz guh haenq gij canjyez.

Guekgya cihciz gij hong sou,

Sou aeu ca ndei gienh saeh neix;

Cien gya fanh hoh cungj vuenheij,

Baengh sou soengq bae gij dangzvan.

Maqmuengh daihgya cungj roengzrengz,

Ceng’aeu hagsib gisuz moq;

Mboujduenh caijyungh gunghyi moq,

Sim oq fazcanj gij dangzyez.

Daezsang cizlieng gyangq cingzbonj,

Caenhliengh gemj sonj(sonjsaet) lai miz rengz;

Mboujduenh iet gvangq canjyezlen,

Hawj vunz baenz benq ndaej souhaeuj.

Dingq cungjsuhgi gangj vah moq,

Daezsang swnghhoz vunz ndaw mbanj;

Coicaenh guh dangz bae fazcanj,

Ndaem oij hix canh ngaenz cienfanh.

Duzguk baengh bya roeg baengh ndoeng,

Beksingq couh baengh dangj daiq ndei;

Lajmbanj hwngvuengh guh hwnjbae,

Saenzcou daihdeih yienghyiengh hoengh.

Gwn raemx mbouj lumz boux vat cingj,

Hingfuz(vuenyungz) mbouj lumz aen dangj raeuz;

Seizneix ndwenngoenz gvaq mbouj you,

Itdingh mbouj lumz boux yinxloh.

Lai ndaem va nywj sim vuenheij,

Lai ndaem gofaex roeg heuh angq;

Dingq cungjsuhgi dawz vah gangj,

Bouxboux sim sangj miz goengrengz.

Fagcax yied muz couh yied raeh,

Ringeiz yied cat yied rongh lai;

Haeujlaeg hagsib Ngeihcib Daih,

Raeuz couh lailai miz saenqsim.

Beijfwen ciengq hawj cungjsuhgi,

Sim vansisi uk ronghsingj;

Mbouj lumz simnduj caeuq sawjmingh,

Raeuz dingh guh hingz Guengjsae moq.

Gingqgyaez bouxdaeuz cungjsuhgi,

Caenndang daengz giz Mbanjcuengh daeuj;

Ngoenz guh fanh saeh vih gyoengqdou,

Bouxboux ndaw sim gig gamjdoengh.

Docih dangj raeuz cungjsuhgi,

Miz siusik ndei cienz gyae’gyawj;

Ok guek dauqma couh daeuj yawj,

Dawz gij raeuj dangj hawj gyoengqraeuz.

Bimoq daeuj daengz miz saenheiq,

Mbanjcuengh daihdeih gizgiz raeuj;

Geiq ndei gij vah bouxdaeuz raeuz,

Yied ngoenz yied daeuj hwnj mbaek sang.

Ndaem va cix gyaez ndaem mauxdan,

Danz gimz couh gyaez bizbaz gim;

Gij vah bouxdaeuz geiq coq sim,

Couh raen rongh gim youq baihnaj.

Ndaw ndoeng duzroeg gyaez duzfungh,

Bya nyauh gyaez lungz youq ndaw haij;

Giendingh mbouj bienq riengz dangj byaij,

Bouxboux gaiqgaiq guh ndaej baenz.

Dangj raeuz sonyinx bengz gvaq gim,

Miz aen miz cingz youq Mbanjcuengh;

Bimoq daeuj daengz gyoengq beixnuegx,

Cuengq sing ciengq go danqhaenh dangj.

Ndaw ndoeng bibi cungj miz rangz,

Namzgva bibi cungj maj go;

Bimoq daeuj daengz heiqsiengq moq,

Riengz boux hai dox bongh baenaj.

Va bungz seizcin va hai hoengz,

Gwnzbiengz daih’onj gyaez ciengq go;

Yamq hung byaij haeuj seizdaih moq,

Nditndongq ciuq doh Mbanjcuenggh raeuz.