(3) Byawz At Cungj Mbouj Lau

Hawj Vunzhong guh daeuz,

Raeuz yaek laeb gunghvei,

Doucwngh ndaej swnhleih,

Baengh daengxheij okrengz.

Vunzhong Anhyenz ak,

Mbwn lak mbouj fug saw,

Biengz neix byawz lau byawz,

Duzgaw lij saw max.

Ginghhan loh dingzhong,

Vunz doxcomz mbeifag,

Dingjcengq daengz gatsat,

Byawz at cungj mbouj lau.

Byawz laepda luenh gangj,

Vunzhong dangq buenz sa,

Seizneix vunz byaengq da,

Sa giet gau giet ndaek.

Gungcanjdangj gijliz,

Lumj diet diz gang couq,

Mienhdoiq cax raemj gyaeuj,

Cungj mbouj yiep mbouj lau.

Gadah gvangq youh gvangq,

Raemxlangh dauz sanaez,

Linz Siengzgenh laemx bae,

Vunzlai caez dingj hwnj.

Cawzhah raemxrongz hung,

Cung roengz rij roengz dah,

Biengz gwnzgwnz lajlaj,

Raq doek raq fwnrumz.

Sanghaij Yiz sahcangj,

Gyoengq lauxbanj sim bwn,

Ndoet caenh lwedhanh vunz,

Mbouj guenj mwngz dai lix.

Vunzlai mbouj fug haemz,

Caez gaen Gungcanjdangj,

Bae doiqdingj lauxbanj,

Cauhfanj mbouj guhhong.

Swhbwnjgyah hozgaek,

Ep sikhaek fukhong,

Gaj dai Gu Cwnghungz,

Lwed lae roengz gwnz deih.

Vunzhong vijsij lai,

Lumj duzvaiz duzmax,

Youq bide ndwenhaj,

Deng gaj geijlai vunz.

（4）