Doenghbaez miz dah lwgsau youh gvai youh mbouj lau haemzhoj ndeu, coh heuhguh , dwg lwgsau ranz guh naz, naj ndingmaeq lumj duj vadauz ngamq hai, lwgda sawdikdik lumj raemxrij seizcin.

De dajnyib ndei lai lo, daemj man goj dwg daengx lajmbwn mbouj miz bouxlawz daemj ndaej ndei gvaq de. Miz baez ndeu, de daemj baenz fan denzman raiz bak cungj va ndeu, dak youq laj roqvax. Yienghva raiz fat ok rongh, rongh daengz byongh aen mbwn. Duzmbaj raen le, mbin daeuj humx seiqhenz fan denzman, cungj mbouj sij ndaej mbin bae. Gienh saeh neix yaepyet couh cienz ok rog bae lo, vunz gyae’gyae gyawjgyawj cungj rox Dahvang daemj man ak.

Dahvang okmingz lo, hoeng dauq aenvih okmingz deng hux hwnj ndang. Hakdoj yungh gak cungj geiqmaeuz yaek aeu de, baij moizhak bae ranz de cam gvaq haujlai baez. Yahmoiz deng Dahvang ndaq dwk mbouj miz naj hwnj dou moq lo.

Hakdoj mieng naeuz yaek aeu ndaej Dahvang, aeu mbouj ndaej couh haih de dai bae cij hozroengz. Dingjlingz bihaenx mbwn rengx haenq, ndik raemx ndeu mbwn goj mbouj nyienh hawj vunz, gohuq couh yaek doix dai lo. Hakdoj couh ciuq vunzgonq guh, gaj duzgvej daeuj caeq Duzbyaj gouz fwn. Bihaenx caet nyied cibroek, hakdoj gaj dai duzgvej, couh youq henzgyawj ranz Dahvang guh dieg caeq. De laemxsim aeu hawj Dahvang nanzguh, couh anbaiz hawj Dahvang gwn cai. Hakdoj iugouz Dahvang: Aeu sam ngoenz sam hwnz mbouj gwn doxgaiq, ngoenzngoenz youq baihnaj daizcaeq gvih gouz Duzbyaj. Ngoenz daih’it gvaqbae lo, ngoenz daihngeih goj gvaqbae lo, daengz haemh daihsam, hakdoj baij vunz daeuj cazyawj Dahvang guh ndaej baenzlawz yiengh, boux vunz haenx dauq le bauqnaeuz Dahvang guh daengz mbouj gwn saek di doxgaiq dahraix. Hakdoj couh naemj ok aen geiqmaeuz doeg ndeu, hawj mageq de laeglemx daj baihnaj daizcaeq caeg bae duix haeuxcid ndeu. Daengz ngoenz daihseiq ranz- rongh, hakdoj bae baihnaj daizcaeq cazyawj gij doxgaiq caeq Duzbyaj, youq dangqnaj vunzlai luenhlaih Dahvang caeg gwn duix haeuxcid ndeu, danghnaeuz de mbouj nyinh couh aeu heh aen dungx de okdaeuj yawj. De laeglemx baij vunz bae naeuz Dahvang: “Danghnaeuz mwngz nyienh haq hawj hakdoj, de couh mbouj suenq gij coih mwngz. Mboujnex, mwngz couh yaek deng dai lo.” Dahvang sim genq gvaq lik, naeuz: “Gou mbouj miz coih, mbouj yungh hakdoj mienx coih. Hakdoj yaek aeu gou, cijmiz gwnz doem mbouj hwnj rum, gwnz mbwn daengngoenz mbouj ok. Gou mbouj lau dai, gou nyienh heh dungx okdaeuj hawj vunzlai yawj, hawj vunzlai rox miz vunz siengj haih hawj gou dai.” Boux mageq baij bae haenx dauq le lwnh gij vah Dahvang gangj haenx hawj hakdoj dingq, hakdoj hozhwnj dwk gwnz naj nyinz doed okdaeuj, roengz lingh sikhaek heh dungx Dahvang. Vunzmbanj dingqnaeuz hakdoj yaek gaj Dahvang, cungj comz daeuj yawj, gyoengq beixnuengx Dahvang doxcaez bae ra hakdoj, gouz de gaej gaj dai Dahvang, hakdoj cix hat bouxgajvunz doengh fwngz vaiq di. Bouxgajvunz gaj dai Dahvang le, vat dungx saej de okdaeuj baez yawj, ndawde hoengqvang’vang, mbouj miz saek loh. Vunzlai rox Dahvang deng ien’uengj, daej dwk sing ok mbouj ndaej. Seizneix mbwn sawqmwh laepngaungau, rumz bongj fwnhaenq. Caj rumz fwn daengx roengzdaeuj, seihaiz Dahvang goj mbouj raen ngaeuz lo.

Laxlawz seihaiz Dahvang deng rumz bongj bae daengz ndaw gamj goengq bya hung ndeu. Bak cungj roeg daeuj dawzhauq、souj lingz. Duzroeg gumq ndaem guh bouxmo, roeggacak guh goengdauh, duzlaemhraeuj roq laz, roegga、roeggyaeujhau caeuq gyoengq roeg wnq daeuj dawzhauq. Gyoengqde caeq ndaej sam ngoenz sam hwnz, ram seihaiz Dahvang hwnj gwnz aen ronghndwen bae haem. Daj neix hwnj binaengz suenggangq, bak cungj roeg cungj bae caeqbaiq Dahvang, ndigah ngoenzhaenx gizwnq mbouj raen saek aen ngaeuz duzroeg. Vunzlai ne, baez daengz caet nyied ngeihcib ngoenz caeq Dahvang, ranzranz cungj gaj gaeq gaj bit caeq de, lij louz ga gaeq ga bit daengz haemhhaenx seiz ronghndwen ok, cij hawj lwgnyez youq laj rongh ronghndwen doq gwn doq dingq vunzgeq gangjgoj.

Dahvang