Sinhvazse Baekging 2023 nienz 12 nyied 31 hauh dienh Bimoq gaxgonq, Guekgya cujsiz Siz Ginbingz doenggvaq Cunghyangh Gvangjbo Densi Cungjdaiz caeuq vangjdoxlienz, gangj le gij vah cukhoh bimoq ngeih lingz ngeih seiq nienz. Lajneix dwg daengx bien faenzcieng:

Caezgya ndei! Doengceiq yiengz seng, geiqciet doxvuenh. Youq mwh gyaeundei coux moq biek gaeuq neix, gou youq Baekging coh caezgya naeuz hohfuk!

2023 nienz, raeuz haenqheiq buekguh、haenqrengz baenaj, ginggvaq le fwn rumz rwed ci, yawjraen le funghgingj gyaeundei, aeundaej le cingzcik ndei. Caezgya geiq ndaej le daengx bi mbouj ngaih, hix doiq coglaeng miz saenqsim lai.

Yamqdin bi neix, raeuz byaij ndaej maenhdwddwd. Fuengz bingh- raq bienq onjdingh, guek raeuz ginghci laebdaeb dauq coh ndei, hwngfat ndei saed baenaj. Aen dijhi canjnieb yendaiva engqgya caezcienz, buek canjnieb yienghmoq gauhdonh- va、 cinwngzva、saekloegvaq ndeu doed hwnj riengjret. Ndaem haeux “laebdaeb ngeihcib baez demsou”, bya heu raemx saw cingzcik engq ndei, saenqhwng lajmbanj langhbaij yiengh moq. Doengbaek cienzmienh saenqhwng raiz biencieng moq, Yungzanh Sinhgih guh ndaej hoengh- hwdhwd, Rangh Ginghci Cangz- gyangh rengzrwdrwd, Yez Gangj Au Davanhgih daihdamj guh baenaj. Cungguek ginghci youq ndaw rumz- langh cangqheiq le aenndang、maenghsaed le ndoknyinz.

Yamqdin bi neix, raeuz byaij ndaej rengzrwd. Ginggvaq dingjmaenh mbouj bienq muzlienh, gij doenghlig cauhmoq、gij rengzhoengh hwngfat Cungguek bongh baenaj fofo. C919 aen feihgih hung saedyienh yinh hek, aen youzlunz hung gozcanj sawqhai baenz, cugranz saenzcou gwnzmbwn cieprengz, “fwndoucej” hauh ndaem daengz dieg ceiq daej. Huq guek ndaej vunzlai haengjgyaez, soujgih moq gozcanj naemj cawx hoj cawx, heiqci nwngzyenz moq、lijdenciz、huq gvanghfuz hawj Cungguek cauh dem- gya saekrongh moq. Cungguek baengh gij cingsaenz buekguh mbouj dingz haenqrengz bin, diegdieg cungj dwg gij dajcauh ngoenz ndei gvaq ngoenz.

Yamqdin bi neix, raeuz byaij ndaej cingsaenz gvaekgvaek. Cwngz- duh Dayinvei、Hangzcouh Yayinvei ndeiyawj dangqmaz, gyoengq boux yindungyenz haenqrengz cauh cingz- cik ndei. Ngoenzgyaj bae youz vunz lai vunz daih, denyingj hawciengz hoenghhwdhwd, “cunhcau”“cunh- vanj” miz rengzhoengh lai, ndwen- ngoenz noix danq cugyamq baenz funghsang, gij heiq ndwenngoenz raeujrub、nyaengqfofo guhhong dauq- fuk, yienh’ok gyoengqvunz gyaepgouz vuenyungz gyaeundei, hix langhbaij le aen Cungguek miz rengzhoengh lailai、nauhyied lailai ndeu.

Yamqdin bi neix, raeuz byaij ndaej engq miz daejheiq. Cungguek dwg aen guek hungmbwk ndeu, cienzswnj gij vwnzmingz hungmbwk. Youq doengh diegdeih neix, damoz hoenzngeu、Gyanghnanz fwn iq, cungj hawj vunz naemj raen lailai、 maq- muengh bae caemz; Vangzhoz gouj baez ngutngeuj、Cangzgyangh bongh laehuhu, cungj hawj vunz gikdoengh raixcaix、gamjcingz rimrwd. Gij rongh vwnzmingz Liengzcej、Wlijdouz, cienzswnj saw Gyazguj Yinhhih, gij dijbauj vwnzva Sanhsinghduih, cienz- swnj faenzmeg Guekgya Banjbonj- guenj……Aen Cunghvaz hungmbwk, lizsij baenzlawz gyaeraez, vwnzmingz baenzlawz hunggvangq, neix dwg gij giek gagsaenq、gij goek rengz raeuz.

Cungguek mboujdan hwngfat bonjfaenh, hix gaenxmaenx gotumj seiqgyaiq, rapdawz gij cwzyin guek hung. Raeuz banh baenz Cungguek—Cunghya Funghvei、Gaiq Daihsam “It Rangh It Loh” Gozci Doxgap Gauh- fungh Lundanz, baenzroix cawjciengz vaigyauh coux gyoengq bouxhek haj cou daeuj. Gou hix cunzcam mbangj aen guekgya, camgya le mbangj aen hoih gozci, raen le haujlai baengzyoux geq、bouxdoih moq, faenyiengj Cung- guek cawjcieng, gyalaeg caezgya doxrox. Saehseiq bienq lai, huzndei hwngfat dauqdaej dwg yaemlwd daeuz, doxgap caez hingz dauqdaej dwg dauhleix geng.

Gwnz roen baenaj, miz rumz miz fwn dwg cingqciengz. Mbangj giyez miz guenjguh atlig, mbangj vunzlai couhnieb、gvaqngoenz bungz hojnanz, mbangj deihfueng miz raemxdumh、rumzluengh、deihsaenq daengj swyenz caihaih, doenghgij neix gou cungj geiq ndaej. Caezgya mbouj lau fwnrumz、doxbang doxcoengh, najdoiq deuq- nyex、gungroengz hojnanz, gou gamj- doengh raixcaix. Bouxguhnaz gaenx guhhong, gunghyinz ngaem gyaeuj buekguh, bouxcauhnieb gamj buek gamj guh, gyoengq bing henhoh guekgya, gyoengqvunz gak hangz gak gyaiq cungj buekguh, moix boux vunz bingzciengz cungj guh’ok le goeng- rengz mbouj bingzciengz！Bouxminz ciengxlwenx dwg gij ingbaengh ceiq hung raeuz hoenx hingz sojmiz hojnanz deuqnyex.

Bicog dwg Cungguek moq laeb- baenz 75 hopbi. Raeuz aeu dingj- maenh mbouj bienq doinyoengx yiengh yendaiva Cungguek, caezcingj、cinjdeng、cienzmienh gvancez aen leixniemh hwngfat moq, gyavaiq cauhlaeb aen gwzgiz hwngfat moq, doidoengh hwngfat ndei saed, dungj- couz ndei hwngfat caeuq ancienz. Aeu dingjmaenh onjdangq baenaj、baenaj aeu onj、laeb gonq buq laeng, gyamaenh caeuq demgiengz ginghci dauq swng coh yiengh ndei, saedyienh ginghci yinhhengz ndaej onj bae gyae. Aeu cienzmienh haeujlaeg gaijgwz haicuengq, caenh’itbouh daezsaenq hwngfat saenqsim, demgiengz gij rengzhoengh ginghci, yungh rengz engq hung banh gyauyuz、hwng gohgi、ganq vunzcaiz. Aeu laebdaeb haeuj- coengh Yanghgangj、Aumwnz fatok gijndei bonjfaenh, youq engq ndei yungz haeuj ndaw daihbuenz guek- gya hwngfat baujmaenh ciengzgeiz hoenghvuengh onjdingh. Guekcoj doengjit dwg lizsij bietyienz, beix- nuengx song hamq aeu dazfwngz caemh diuzsim, caezyungh gij mingz- daeuz hungmbwk minzcuz fukhwng.

Aen moegbiu raeuz hungmbwk raixcaix, hix lauxsaed raixcaix, gangj liux bae couh dwg hawj bouxminz gvaq hwnj ndwenngoenz engq ndei. Ciengx son lwgnyez、bouxcoz couhnieb baenzvunz, bouxlaux ywbingh ciengx- laux, dwg saeh ndaw ranz hix dwg saeh guekgya, caezgya aeu caezcaemh roengzrengz, banh ndei doenghgij saeh neix. Seizneix, aenbiengz hwngfat vaiq lai, caezgya cungj nyaengq hong, guhhong gvaqngoenz atlig hung lai. Raeuz aeu cauh gij heiqfaenh aen- biengz raeujrub huzndei, gya’gvangq gij hoenggan cauhmoq bauyungz hoenghvuengh, cauh gij diuzgen gvaqngoenz bienhleih sangjswd, hawj caezgya simcingz angqyangz、ciuhvunz mizyinx、loqsiengj baenz caen.

Seizneix, gwnz seiqgyaiq lijmiz mbangj dieg hoenxciengq. Bouxminz Cungguek roxyiuj hozbingz dijbauj, raeuz nyienh caeuq daengx seiqgyaiq doxcaez, ngeix gij roenrongh vunz lajmbwn、naemj gij fukfaenh vunz lajmbwn, doidoengh cauhlaeb aen minghyinh caezcaemh vunz lajmbwn, hwnqguh aen seiqgyaiq engqgya gyaeundei.

Seizneix mwhneix, banhaemh daengnding daengloeg, ranzranz ronghsag. Hawj raeuz doxcaez, cuk- nyienh guekcoj mwnhoengh hwng- vuengh、seiqgyaiq hozbingz anningz！Cuknyienh caezgya daengx bi vuenyungz、sim swnh ndang cangq！

Gyo’mbaiq caezgya！