Diemq faenjlauxyoux dwg gij hoenz diuz honghgai Namzningz, hawj vunz Namzningz cungj dauqngeix gijgwn feih neix.

Mwh gou ngamq daengz Namzningz guhhong doengzsaeh couh naeuz roengzban daiq gou bae sup faenj. Gou caen dingq mbouj rox dahraix, mwnh- saengx youq gizde. Doengzsaeh riuhaha bongx mbaq gou, naeuz sup faenj couhdwg gwn faenj, caeuq “sup” mbouj doengz, vunz Namzningz naeuz “sup” dwg caeuq Begvah yaem doxdoengz. Vahgun Begvah doxcab gangj, dwg vunz Namzningz gangjvah daegbied caeuq dieg wnq mbouj doxdoengz. Doengzsaeh mizsim gaisau, dou byaij haeuj Roen Gencwng aen diemq iq venj gaiq baiz “Bouqdiemq Gijgwn Gencwng” ndeu.

Aen bouq iq gaebgeb raezrangh, song henz gyawj haw, gag faen baenz baihnaj cungqgyang baihlaeng sam giz. Aen bouqdiemq baihnaj bauhswj manzdouz gienghduh; bouqdiemq baihlaeng gai faenj caeuq mienh: Faenjcawj、faenj(mienh) laux- youx、faenjcauj doengh gijneix; aen daizgvih cungqgyang sou cienz gai biuq. Bouxhek youq daizgvih cawx ndei canhbyau saekhoengz saekloeg cangz ndeu、song cangz、sam cangz dij cienz mbouj doengz, couh bae baihlaeng baengz biuq cawj faenj. Daj mbiengj muengxsa caeuq mienhgingq guhbaenz gekduenh haenx yawj, ndaej yawjraen gyoengq mehmbwk vunzhong daenj buhguhhong saekhau、daenj mauh hau, youq ndaw ranzdajcawj roengz liuh、cawj faenj.

Bouxhek nyoeg mbaw canhbyau hwnj gwnz gep benj iq youq baihnaj conghcueng byaek, gwnz benj gyaeujding deihyaenzyaenz sij miz soqhauh, couh ndaej cwxcaih caj ranzdajcawj hemq hauh. Daj conghcueng aeu ndaej vanj faenj ndatfwdfwd le, naengh youq henz daizngaiz, gouh dawh nip faenj, doq byoq doq sup faenj haeuj bak bae, gwn liux baez uet bak cienq laeng byaij deuz.

Neix dwg gou ciuhvunz baez daih’it gwn faenjlauxyoux.

Mienhgingq gekduenh gyaeuj de, boux meh- mbwk guhhong riengjret dwk nyem rangzsoemj ndeu roengz ndaw rek bae cauj baez ndeu, ciep dwk lauzmou、suenq soiq、daeuhseih、lwgmanh cauj rangfwtfwt, caiq dwk nohmou roxnaeuz nohcwz baez cauj couh gya raemxdang, raemx goenj le dwk faenjcawj roengzbae, buenq faen cung daek roengz ndaw vanj bae, vanq di coeng ndeu, vanj faenj lauxyoux ndeu couh cawj baenz lo.

Manh hoengz、coeng heu、rangz henj、daeuhseih ndaem、faenj hau, gya di nohgep unqnem raeuzred, raemxdang henjsi youzyaed, vanj faenjlauxyoux baenzneix ndeiyawj baenzgwn, vunz baenzlawz mbouj ngah ne? Cimz gaemz raemxdang ndeu, soemj manh heiq noengz, hawj vunz myaiz rih bae; sup gaemz faenj ndeu, faenj siep gaeuq raemxdang le, unqnemnem raeuzrwdrwd, ndeigwn dangqmaz, lienz diuz linx cungj yaek haeb gwn roengz dungx bae.

Dangyienz, neix dwg boux doengzsaeh daiq gou bae sup faenj haenx baenzneix lwnh gou gij ndeigwn hawj vunz ndwnj myaiz, hoeng gou gwn gaemz daih- it, sien roxnyinh daengz heiq rangfwtfwt, cungj faenj neix aeu rekdiet cawj、aeu feizhaenq cij cawj ok gij heiq rang cawj ndaej baenz gijgwn habbak neix.

Cungj faenj neix caeuq cungj faenj ronq hawq ranzcoj gou mbouj doengz, caeuq faenjhaeux Gveilinz、faenjlwgsae Liujcouh、faenjsoemj Binh- yangz、faenjcaq Buzmyau doengh gij faenjhaeux neix cungj mbouj doengz, cungj faenj neix heiq soemj、manh、hamz、sien、rang gig daegbied, gou gvaqlaeng gwn lai le roxnyinh daengz caemhcaiq menhmenh hwnjyinx.

Faenjlauxyoux raemxdang heiq rang youh noengz、ndeigwn habbak. Seizhah gwn, sepdungx gaij nywnx; seizdoeng sup vanj faenj ndat ndeu, daengx ndang raeujrubrub. Vanj faenjlauxyoux dangq ndaej hwnj cingqcung, doiq boiqliuh iugouz engq daegbied, meiq aeu genj Namzningz bonjdieg gag guh, daeuhseih aeu genj Hawgaeuq Yangzmeij guh, rangzsoemj aeu cawx Lungzanh iepguh. Yienghlawz cawj gonq yienghlawz cawj laeng mbouj ndaej boekbyonj: Rangzsoemj cauj hawq, rek youz cauj suenq soiq hom、daeuhseih、lwgmanh, feizhaenq cauj nohmou (nohcwz), noh loq bienq saek sikhaek gya raemx, raemx goenj couh dwk faenj roengzbae. Faenjlauxyoux mbouj ndaej cawj nanz lai, cawj ndaej habngamj gak cungj boiqliuh cij ndeigwn, heiq lauxyoux singjsien rangfwt、youh soemj youh manh cijndaej supyinx bouxhek daeuj gwn, sim’angq dauqbae.

Dingqnyi aen goj ndeu, faenjlauxyoux daj mienhlauxyoux daeuj. Gij laizyouz mienhlauxyoux aen goj de dwg baenzneix gangj: 19 sigij cogeiz, goeng laux ndeu ngoenzngoenz daeuj aen bouqcaz heuhguh Couhgi Cazgvanj ndeu ndoet caz, miz geij ngoenz de baenz binghdwgliengz mbouj ndaej bae, boux lauxbanj Couhgi gig yousim, couh aeu suenq soiq、daeuhseih、lwgmanh、rangz soemj、nohcwz soiq、mbahuzciuh doengh gijneix cauj hom le caeuq mienh cawj baenz vanj mienh ndat ndeu, bae daengz ranz soengq hawj boux baengzyoux neix gwn. Vanj mienh cawj dang manhswd soemjset youh rangfwt neix goenglaux ngah gwn dangqmaz, gwn sat daengx ndang hanh dumz liux, binghdwgliengz hix ndei lo. Goenglaux gamjgik raixcaix, sij gaiq baiz “Baengzyoux Doxcomz” ndeu soengq hawj boux lauxbanj Couhgi. Aen mingz mienhlauxyoux couh daj neix daeuj, caemhcaiq menhmenh riuz doh Gvangjsih. Doeklaeng vunzlai ciuq cungj fap neix cawj faenj, lij an aen mingz ndeidingq ndeu: Faenjlauxyoux.

Gangj daengz faenjlauxyoux dwg baenzlawz daeuj, lij miz geij aen goj gizyawz ca mbouj lai doxdoengz, aenaen goj cungj miz yiengh ndeu, ndaw goj cujyau dwg gangj faenjlauxyoux miz cozyung daegbied, hawj vunz simdoengh dwg baengzyoux cingzngeih naekna.

Fueng dieg ndeu ganq ok cungj vunz ndeu, daj gijgwn feih deihfueng daihgaiq yawj ndaej ok gij singqcingz gyoengqvunz benq dieg neix. Miz cingz miz eiq、simndei bang vunz roxnaeuz couhdwg vunz Namzningz sengcingz couh baenzneix simsienh. Cungj simndei neix cauxbaenz gij cingsaenz aensingz Namzningz “ndaej bang couh bang, gamj guh baenz saeh”, cungj cingsaenz neix, lauheiq couh hamz miz goj faenjlauxyoux youq ndawde.

Bi 2008, faenjlauxyoux haeujsenj Buek Daih- ngeih Swcigih Gaep Feihvuzciz Vwnzvaz Yizcanj mingzloeg, baenz cungj faenj vunz Namzningz gig maij daiq daegyoux dahyoux bae gwn ndeu. Ngoenzneix, gij faenjlauxyoux ciuq ciuhgeq yiengh- gaeuq guh neix hawj vunz myaiz rih, caemhcaiq sawq gya makcengz soiq、makyungz soiq hawj faenjlauxyoux heiq soemj engq habbak, dungxndaw nohmou、dungxndaw nohcwz、byagungq ndaw haij hawj faenjlauxyoux miz lai cungj lai yiengh boiqliuh ndaej genj, ciuyinx engq lai hek bouxcoz.

Geij bi gonq “Bouqdiemq Gijgwn Gencwng” gvendou, aen diemq gaij lawh baiz lienzdaemh gai gvaq faenjlwgsae、byasizgoh, lij gai gvaq nohgangq. Moix cungj gaicawx lumjnaeuz nauhyied saek mboengq, youh laeglemx vuenh baenz ranz wnq. Dangyienz, Roen Gencwng mbouj giepnoix diemq faenjlauxyoux, gizsaed, Namzningz mboujguenj diuz honghgai lawz, ceiq mbouj giepnoix couhdwg diemq faenjlauxyoux. Doengh aen diemq faenjlauxyoux neix dwg gij hoenz diuz honghgai Namzningz, gyoengqvunz Namzningz cungj ndaejgeiq cungj faenj ndeigwn neix, gyoengqde naeuz, “geij ngoenz mbouj gwn faenjlauxyoux, couh lumj hoenzngaeuz mbouj youq ndang nei”.

Fanzdwg gij vunz youq Namzningz youq roxnaeuz guhhong gvaq, dingzlai cungj miz gvaq sam ngeih boux baengzyoux simsangj sim’angq doxiu youq diemqfaenj henz roen sup faenjlauxyoux. Mizseiz dwg gyaban daengz byonghhwnz, mizseiz dwg haetromh doxbungz. Cungj gijgwn feih aenvih cingzngeih mizok neix, mboujdan dwg gijgwn feih ndaejgeiq gij goj Namzningz, engq ndaej hawj vunz simraeuj sim’onj.

Mboengqgonq, baengzyoux ranzcoj daeuj Namzningz banh saeh. Ngaizhaet gwn faenjlauxyoux le, fat saenqsik hawj gou ienq naeuz:“Faenj- lauxyoux mbouj baenzgwn, lij dwg faenj ranzcoj ndeigwn.”

Gou baez yawj sikhaek hoizfuk, hawj faenj- lauxyoux cingqmingz:“Mwngz haengjdingh gwn mbouj deng faenjlauxyoux cingqcung. Suhgi、Fuzgi、Nanzyen、Yunghvei……doengh aen diemq neix, mwngz haeuj ranz lawz bae gwn, cungj dwg ndeigwn.”Fat liux ngeix baez ndeu, gou youh sikhaek bouj diuz ndeu: “Mwngz youq gizlawz? Gou sikhaek bae ra mwngz, daiq mwngz bae gwn vanj faenjlauxyoux youh ndeigwn youh cingqcung ndeu!”

Roxyiuj、sugrox benq dieg ndeu roxnaeuz aen singz ndeu miz haujlai cungj fuengfap, cimz gijgwn feih dangdieg couhdwg ndawde cungj ndeu. Ndigah, baezbaez miz baengzyoux diegrog baez daih’it daeuj Namzningz, gou itdingh heuh gyoengqde: “Bae, gou cingj mwngz sup vanj faenjlauxyoux ndeu.” Aenvih neix lauheiq dwg haujlai vunz diegrog hainduj roxdaengz Namzningz cungj fuengsik ceiq cingqdeng ndeu.