“Roegsaenz” ciengq go ndeidingq caen hawj Laujvangz sim’in, sim’in ndaej de laebdaeb geij ngoenz caz mbouj ndoet, haeux mbouj gwn, ninz mbouj ndaek, de caiqlij miz di mbouj gamj bae raen duz roeg neix. Vihliux gemjmbaeu gij haemzhoj ndawsim swhgeij, Laujvangz sawq dawz duz “roegsaenz” geiq youq ranz baengzyoux ndei ndeu. De siengj hawj bonjfaenh simcingz soengswt di, couh gag youq ranz yietnaiq. Hoeng geij ngoenz mbouj dingqnyi sing roeg heuh, Laujvangz gig geizheih youh dwglau caeuq simgaenj, lumj saetbae boux baengzyoux ndawsim nei.

Laujvangz bonjlaiz couh miz bingh’ae’ngab, daj de ndaej daengz duz “roegsaenz” neix gij binghae’ngab de couh ndei haujlai lo.

Geij ngoenz neix mbouj raen gij ngaeuz caeuq gij sing’yaem duz roeg de, gij bingh Laujvangz youh famh le, caemhcaiq fat ndaej gig youqgaenj, caiqlij cadi aeu diuz mingh de dem. Bakaek de itcig cungj nyapnyuk, aen aek caeuq simdaeuz de lumjnaeuz miz doxgaiq oet nei, miz haujlai baez caen hawj de ngoebcaw bae. Gij simnyap neix, hawj de haujlai baez siengj mbouj rox vihmaz lae raemxda. Menhmenh, de bienq ndaej hoenz mbouj youq ndang vunz ninz mbouj onj.

Laebdaeb geij ngoenz mbouj nyi “roegsaenz” ciengq go, hix mbouj miz gij ngaeuzingj Laujvangz, ndaw sim gizcangj engq dwg hoengqvatvat, simnyap dangqmaz, lumj hoenz mbouj youq ndang.

Hwnz seizhah dwg aen mbwn ceiq oemq ndeu, duznyungz mbin bae mbin dauq.

Gizcangj swhgeij youq ndaw ranz, mbouj miz saekdi loqninz, de daenj geu vaqdinj, ndwn youq yangzdaiz ngeixniemh duz “roegsaenz”. Mbouj- lwnh duznyungz baenzlawz youq gwnz ndang de luenh haeb, de di ndeu hix cungj mbouj guenj. De ciengx lwed duznyungz haemh caiq haemh, gizcangj mbouj mingzbeg bonjfaenh vihmaz aeu baenzneix simgam cingznyienh bae ciengx nyungz, hoeng cij ndaej yienghneix, gizcangj cij gemj- mbaeu ndawsim de doiq duz roeg neix siengjniemh haemzhoj haenx, de gaenq rox bonjfaenh saedcaih liz mbouj ndaej duz “roegsaenz” neix lo.

Duz “roegsaenz” neix caiq dauq youq ranz Laujvangz gwnz yangzdaiz seiz, gizcangj angq ndaej youq ndaw vangyenjging yawj ndaej song aen lwgda myox caez lo.

Laujvangz youq gwnz yangzdaiz riuj aen roengqroeg siengj, ciuh vunz de couh bungq ndaej duz roeg baenzneix ndei, hoeng youh mbouj ndaej begbeg soengq, mbouj ndaej mingzbeg dawz roeg bae vuenh gohgi cizvei, cijndaej daegdaengq caeuq gizcangj aeu song sam cien maenz daeuj guh ngaenz son ciengx. Mbouj ndaej hix couh suenq, fanjcingq cienz youh mbouj dwg bonjfaenh gizcang de ok, de seizbienh ra maz gyaijbak hawj de daengz ndaw giz caizvugoh bae, caizvugoh couh hawj ngaenz lo, Laujvangz mbouj ndaej caiq yaemhywx lo, aenvih gvaq song ngoenz gohcangj couh aeu roq dingh lo.

Laujvangz soengq roeg hawj gizcangj seiz, gizcangj lumjbaenz yawj mbouj raen Laujvangz nei, song da cijgoq yawj duz “roegsaenz” ndaw roengq, naj bak angq mbouj dingz, lienz singriu cungj daiq miz gij ndaej hingz.

Ngoenz gizcangj ndaej daengz “roegsaenz” haenx, de youq ranz baij daiz byaek ndeu, dandog iucingj Laujvangz. Gwn seiz, gizcangj moix baez caeuq Laujvangz bungqlaeuj, aen sim Laujvangz couh yied in. De itcig mbouj gamj gwn laeuj, de lumjbaenz rox seizneix gwn laeuj yungzheih fiz, hoeng gizcangj cix youq mwh caeuq Laujvangz doxbungq laeuj seiz cij haisim hwnjdaeuj. De youq mwh laeuj caengz fiz seiz, couh ndenq hawj Laujvangz mbaw dan biuq fanh maenz ngaenz ndeu. Laujvangz dauqfanj vih mbaw dan neix daengx ndang cungj fat hanh. De laemxsim daeuj gaem maenh mbaw dan neix, hoeng baenzlawz hix guenj mbouj ndaej fajfwngz de saenzdedded. Gizcangj ngeng gyaeuj bae coh henzrwz Lauj- vangz, laeglemx naeuz:“Laujvangz dungzci, gou mbouj vei daih mwngz ba?”

Laujvangz dingq le gij vah gizcangj, daengx ndang ok hanh liux, lumj laeujbag lae ok gij hanh, hoeng Laujvangz caen lij caengz gwn saek amq laeuj.

Mbouj geij nanz, Laujvangz caen dang ndaej gohcangj lo, de sim’angq ndaej dawz mbaw dan biuq bae caizvugoh aeu cienz, boihseiz dwg boux gaem ngaenz okdou gyae lo, hawj Laujvangz gaenj lumj moed ndaw rek.

“Roegsaenz” bae daengz ranz gizcangj, de haeux mbouj gwn raemx mbouj ndoet, hix mbouj heuh mbouj diuq, simnyap dangqmaz, lumjnaeuz ndwi bae boux caemhsim baengzyoux nei. Gizcangj mbouj raen “roegsaenz” ciengq go, de engq dwg mbouj miz banhfap sim’angq, youq ndaw gvaengx gizcangj gaepbied doxdoengz haenx doxcomz haihoih seiz, de laeuj gvaq le haiz caen vah gangj:

“Mboengqneix gou ndaej duz roegsaenz ndeu, bonjlaiz dwg gienh saeh’angq ndeu, mbouj rox vihmaz, duz lwgndai neix couh mbouj vih gou eu fwen lo!”

“Gij saeh neix ndei banh, mwngz dauqbae aeu lwgmanh mad haeuj caekhaex duz roeg bae, baujcinj de heuh hawj mwngz habhoz……”

“Miz gij saeh neix? ”

“Mbouj saenq mwngz sawqsawq……”

Gizcangj yaengx cenj laeuj gingq hawj boux Yangz gizcangj ok cawjeiq neix, song boux doxyawj riu lo.

Geij ngoenz neix, Laujvangz itcig daj gij cawjeiq mbaw dan biuq haenx, haetneix de cingq yaek bae ra cuznaz, gij dienhvah gwnz daiz sawqmwh yiengj lo.

“Laujvangz gohcangj, cingj daengz ban- gunghsiz gou daeuj!”

Laujvangz dingq sing gangj gizcangj lumj roxnyinh daengz gaenq miz maz saeh fatseng lo, de sawqmwh bienq ndaej lumj boux vunzfamh yaek bae dieggajvunz, ndang saenzriri, yamqdin cungj mbouj cingznyienh byaij haeuj ranzbanhgoeng gizcangj bae. Laujvangz raen duz “roegsaenz” da daengx lo——duz “roegsaenz” senq dai youq ndaw roengq, ndang bienq ndongj fwed doek.

Laujvangz sim saetbwgbwg yawj duz roeg ndaw roengq, sim’in lumj cax gvej daep, de dingq mbouj raen gizcangj caeuq de gangj maz vah lo, gij simcingz de labcab mbouj miz banhfap gangj okdaeuj.

Laujvangz soengq roeg dwg siengj hawj de benz hwnj aen vih gohcangj bae naengh, vanzlij ndaej bit cienz sinhoj ciengx roeg ndeu. Saetbae caeuq ndaejdaengz lij mbouj gib doxbeij, siengj mbouj daengz duz roeg neix couh dai lo.

Laujvangz danqheiq duz roeg neix lizhai de couh dai, hoeng youh ienq duz roeg neix dai ndaej daiq caeux lo. Ndaw fwngz de gaem mbaw biuq, mbouj rox baenzlawz dwg ndei. Laujvangz ngeix ndaej uk luenh le, gwnz ndang de gaenq deng hanhnit cienzbouh cimq dumz. Hoeng de vanzlij ndwn youq gizde doengh mbouj gamj doengh, menhmenh diemheiq, ndaw uk ra gij lohlaeng swhgeij.

“Duz roeg fangz neix, daengz ndaw fwngz gou mwngz mbouj ae bak lawz couh dai lo! Yaek rox yienghneix, gou couh aeu lwgmanh dingjmbwn cat aen gumq mwngz, hawj mwngz vih gou buekmingh ciengq go baez dem hix dij ha!”

Gizcangj yawj duz roeg dai ndaw roengq mbouj gangj saek coenz, ndawsim de caegcaeg gvaiq “roegsaenz” dai ndaej mbouj deng seiz. Naj de seiz nyaeuq seiz heu, gwn ien reh doek reh gij hoenz ien rim ndaw ranz. Laujvangz mbouj ngeix gizcangj baenzlawz siengj, hix mbouj gamj bae ngeix.

“Roegsaenz” dai le mbouj geij nanz, dingqnaeuz Laujvangz deng vuenh ganghvei lo.

Doeklaeng, gyoengqvunz cij mingzbeg vihmaz seizneix vunzlai ciengx roeg baenz aen fungheiq, aenvih seizneix miz mbouj noix bouxdaeuz ciuqyiengh lijdwg gyaez roeg lumj gyaez mingh nei.（2 sat）