12 nyied 14 hauh daengz 15 hauh, Siz Ginbingz cungjsuhgi gonq- laeng daeuj daengz Gvangjsih Nanz- ningz、Laizbinh daengj dieg, haeujlaeg diuyenz hanghmoeg doiqrog hailangh、segih、lajmbanj、giyez daengj, caemhcaiq gangj gij vah youqgaenj de, daegbied gangj daengz Gvangjsih aeu caezcingj、cinjdeng、cienzmienh gvan- cez aen leixniemh hwngfat moq, gaemndaet gaemmaenh hwngfat youh ndei youh vaiq diuz rap daih’it neix caeuq cauhlaeb aen gapgyaq hwngfat moq diuz rap canloz, aeu gij ndei swhgeij, aeu couqmaenh gij eiqsik caezcaemh Cunghvaz Minzcuz guh sienqmeh, gaijfang swhsiengj、 cauh- moq gouz bienq, coh haij guh’ak、hailangh hwngfat, roengzrengz doi- doengh dieg minzcuz henzguek hwngfat youh ndei youh vaiq, guh’ok saeh engq ndei, mboujduenh hwnqguh aen Gvangjsih gyaeundei yiengh sevei cujyi miz gij daegsaek Cungguek, guh’ok hwngfat moq, haenqrengz raiz’ok biencieng moq Gvangjsih miz yiengh yendaiva Cungguek.

Gij maqmuengh cungjsuhgi caencingz naekna, hawj ganbu vunzlai daengx gyoengq gih raeuz gig saenq- hwnj、roxnyinh gujvuj sim vunz、miz saenqsim lailai. Daihgya foenfoen naeuz, aeu gag rox dawz swhsiengj caeuq hengzdoengh dungjyiz daengz gij cingsaenz gangjvah youqgaenj Siz Ginbingz cungjsuhgi, engq gaenjmaed doxgiet youq henz Dangjcunghyangh aeu Siz Ginbingz dungzci guh haedsim de, riengzlaeng bouxdaiq- daeuz fukhwng hungmbwk roengz- rengz buekguh, aeu seizseiz yiengh- yiengh cungcig giendingh henhoh “song aen dinghlaeb”, baenzlawz cungj aeu saedguh saedyauq guh daengz “song aen henhoh”, ok rengz Gvangjsih bae cienzmienh hwnqguh aen guekgya sevei cujyi yendaiva、cienzmienh doicaenh Cunghvaz Minzcuz fukhwng hungmbwk.

Guh Ndei Biencieng Canj- niebak, Gyavaiq Cauhlaeb Aen Dijhi Canjnieb Yendaiva

Siz Ginbingz cungjsuhgi yinxok, doidoengh Gvangjsih hwngfat youh ndei youh vaiq, aeu guh ndei biencieng guh ok canjnieb ak, gyavaiq cauhlaeb aen dijhi canjnieb yendaiva.

“Dou laebceiq youq ranghdieg Gvangjsih miz gij cienzdoengj cauh- moq haenx, hai diuz roen moq guh dieg minzcuz henzguek gohgi gag’ak miz gij daegsaek Gvangjsih.”Boux dinghcangj Swcigih Gohgidingh Lij Gozcungh naeuz, yaek haeujlaeg guh aen canloz baengh gohgyau hawj Gvangjsih hwnghwnj、aen canloz baengh vunzcaiz hawj Gvangjsih ak- rengz、aen canloz aeu cauhmoq doinyoengx hwngfat, gya’ak hoenx- roengz gij gisuz haedsim youqgaenj de, daemxcengj cauhlaeb aen dijhi canjnieb yendaiva, dajcauh lai aen canjnieb dingxdaeuz ndaej yienh’ok gij daegsaek caeuq gij ndei Gvangjsih、gveihmoz haemq hung caeuq engq ndaej daiqdoengh haenx, gyavaiq guhbaenz swnghcanjliz moq.

Boux dungjswcangj Liujgangh Cizdonz Lij Binh naeuz, Liujgangh Cizdonz dwg bouxbaegonq guh hong- goeng gangdiet Gvangjsih, de yaek gyavaiq giyez cienjhingz swnggaep, hawj giyez gaep engq sang, engq cinwngz, engq saekheu, haenqrengz hwnqguh aen giyez guh gangdiet ak miz gij saedlig doxdax caeuq suijbingz hwngfat daih’it daengj.

Boux fucujyin Swcigih Dangzyez Fazcanjban Yangz Yejcauh gangj, aeu haenqrengz doicaenh cauhmoq gohgi dangznieb, cawjdaeuz haifat swnghcanj gihgai oij guhdangz、genj ganq ceh ndei, gyavaiq dangznieb daezsang cizlieng、gemjnoix cingzbonj、gyalai yauqik, ok gij goengrengz dangznieb Gvangjsih cawjdaeuz bauj- cang gij ancienz gwndangz guekgya.

Laebdaeb Mbe Gvangq Doiq Ndaw Doiq Rog Hailangh, Haeuj- laeg Yungzhab Caez Laeb “It Rangh It Loh”

Siz Ginbingz cungjsuhgi daeg- bied gangj daengz, Gvangjsih aeu laebdaeb mbe gvangq doiq ndaw doiq rog hailangh.

“Gvangjsih dwg dieg baihnaj caeuq conghcueng guek raeuz yiengq Dunghmungz hailangh doxgap de, gij diuzgen、gij ak gaenxmaenx fugsaeh hwnqguh Aen Minghyinh Caezcaemh Cunghgoz-Dunghmungz youh ndei youh yienhda.” Boux fucujyin Swcigih Fazcanj Gaijgwz Veij Nungz Bingh gangj, aeu ciuq gij cingsaenz cijsi Siz Ginbingz cungjsuhgi youqgaenj de, cienzlig doicaenh hwnqguh diuzloh luz haij moq, cienzmienh gyavaiq hwnqguh hanghmoeg sezsih giekdaej doxdam doxdoeng, haenqrengz gung- ganq aen dijhi hamj gyaiq daehyinh vuzliuz, gyavaiq cauhlaeb aen muengx dieghawq、haij、mbwn、muengx“seiq aen itcaez” doxdam doxdoeng ndeu.

Boux cungjcaiz hengzguh Cunghgoz-Dunghmungz Sinsizgangj Gujfwn Youjhan Gunghswh Ganh Ciuhlingz naeuz, yaek nyinhcaenh gvancez guhsaed gij cijsi youqgaenj cungjsuhgi, yiengq Dunghmungz gyavaiq dajcauh gizdieg ginghci susw moq, roengzrengz engq ndei bae hwnqguh sezsih susw doxdam, coengh gijsei Cunghgoz caeuq Dunghmungz doxdam doxdoeng doxyungz, engq ndei fugsaeh Cunghgoz caeuq Dungh- mungz cienzmienh doxgap.

“Siz Ginbingz daegbied gangj daengz aeu caez laeb diuzloh luz haij moq baihsae, guh buek hangh- moeg sezsih giekdaej gyaudoeng youqgaenj, aeu biucinj sang、cizlieng sang bae hwnqguh Diuz Yinhoz Bingzluz.” Boux dungjswcangj Bingz- luz Yinhoz Cizdonz Vangz Gezyinz naeuz, gyoengqde yaek caenhrengz guh gij goengcingz ndei、goengcingz saekheu、goengcingz seuqcingh. Aeu Diuz Yinhoz Bingzluz engq ndei bae“doeng diuz roen”“hailangh congh- cueng”“gyonjcomz canjnieb”, daiq- doengh gij swhyenz ndei henz roen diuz loh luz haij moq baihsae gyavaiq bienqbaenz ginghci hwngfat.

Dingh Gijgvangq Dem Dan- canj, Hawj Engq Lai Binjbaiz Nungzyez “Cihhauh Gvangjsih”Youq Lajmbwn Mizmingz

Siz Ginbingz cungjsuhgi yinxok, yiengh goengcingz giekdaej hwnqguh aen guek nungzyez ak couh baengh saenqhwng lajmbanj, aeu doeksaed gviveh、maenhsaed doicaenh.

Bi 2023, Gvangjsih lai laeb miz 110.4 fanh moux naz biucinj sang, gijgvangq doekceh、gij cungjcanjlieng haeuxliengz laebdaeb seiq bi ndaej“song demlai”. Boux cujyin Swcigih Dangjveij Nungzban、boux dinghcangj Nungzyez Nungzcunh Dingh、boux gizcangj Lajmbanj Saenqhwng Giz Vangz Ciyij gangj, baenzlawz cungj aeu dawz ndei diuz rap ancienz haeuxliengz, dawzyiemz guhsaed haeuxliengz ancienz dangj cwng caez dawzrap, haeujlaeg saedguh “youq dieg yo liengz、aeu gisuz yo liengz”, cienzmienh loengh rox baenzlawz hawj gohaeux haeuxyangz canj ndaej engq lai caeuq baenzlawz lailai daezsang gij dancanj liengzyouz daengj gohuq cawjdaeuz, ceng guh aen swngj miz haeuxliengz lw lai ndeu.

Seizneix dwg sauh caqdangz, 20 aen gih lenzhoz dajsou go’oij Aen Ciennieb Hozcozse Bozswng Nungzgih laeng Vujsenh Yen ngoenzngoenz cungj nyaengq bang bouxndaem’oij dajsou go’oij. Boux lijswcangj hoz- cozse Vuj Gijvei naeuz, cungjsuhgi byaij haeuj dieg go’oij、dangzcangj, haeujsim gij leih’ik bouxndaem’oij, neix hawj de engq miz saenqsim bae lenzhoz daiqdoengh bouxguhnaz、doidoengh nungzyez cienzdoengj cienjhingz swnggaep、 hawj “saehnieb diemzvan” gemjnoix cingzbonj demlai yauqik.

8 bi gonq, bouxcoz Yungzyen Bungz Yenj dauqma ranzmbanj, daj- ndaem 1.08 fanh moux makbugdiengz. De naeuz, cungjsuhgi daegbied dwen daengz aeu hawj engq lai binjbaiz nungzyez “cihhauh Gvangjsih” youq lajmbwn mizmingz, de yaek vihneix roengzrengz buekguh.

Couqmaenh Gij Eiqsik Caez- caemh Cunghvaz Minzcuz, Hawj Minzcuz Doxgiet Baenaj Byaij Youq Daengx Guek Baihgonq

Siz cungjsuhgi daegbied gangj daengz, Gvangjsih guh gak cungj hong swcigih yaek aeu couqmaenh gij eiqsik caezcaemh Cunghvaz Minzcuz guh sienqmeh, guh fueng’yiengq gaenbonj doicaenh hong cauhlaeb minzcuz doxgiet baenaj, gyamaenh hwngfat aen daihbuenz yinzminz gak cuz doxgiet buekguh ndei haenx.

“Dou itdingh geiqmaenh gij vahdaengq cungjsuhgi, fugsaeh ndei vunzlai diegguenj daegbied dwg ‘bouxlaux bouxiq’, fugsaeh ndei giyez diegguenj, hawj segih bienqbaenz aen ranz hung raeujrub doxgiet doxgyaez ndeu.” Boux suhgi dangjveij Nanz- ningz Si Banzlungz Segih Liuz Yenlinz gangj.

Aen mbanj guhyiengh guh minz- cuz doxgiet baenaj daengx guek——Vanzgyangh Mauznanzcuz Swciyen Swh’wnh Cin Mbanjcinzsangh miz cib lai aen minzcuz, boux suhgi dangj- cungjcih ndaw mbanj Veiz Bingjluz naeuz, gyoengqde yaek haeujlaeg “caez guenj hong ndaw dunz、caez guh swnghcanj、doxaeu、caez biujyienj vwnzyi、caez ceihleix ancienz、caez cauh binjbaiz”, doxgiet daiqlingx vunzlai gak cuz daengx mbanj yien fwngz itcaez baenaj.

Boux cujyin Swcigih Minz- cunghveij Lij Cinlinz gangj, yaek lai comz rengz hong minzcuz Gvangjsih “gyawz ndei、gyawz guh、daezswng gyawz、gungroengz gyawz”, gij cwngcwz minzcuz caeuq gij cidu dieg minzcuz gagguenj aendangj youq henz baihnamz guekcoj guh ndaej ndei, neix aeu gangj ndei、 lwnh ndei, youq gij hainduj lizsij moq mbouj- duenh cauhlaeb cingsaenz ranzmbanj Cunghvaz Minzcuz doxcaemh, son- gyauq dazyinx yinzminz gak minzcuz giendingh mbouj bienq gyo’mbaiq aencingz aendangj dingq vah aendangj riengz aendangj byaij, aeu gak minzcuz gvangqlangh doxgyau dox baedauq doxyungz coicaenh hwnqguh caezcaemh Cunghvaz Minzcuz, doi- doengh minzcuz doxgiet baenaj Gvangjsih byaij youq daengx guek baihgonq.

（faenzcieng daj 《Gvangjsih Yizbauq》 genj aeu）