Seizneix, gyoengqvunz gyaez ciengx roeg, hoeng mbouj rox dwg vihmaz?

Laujvangz ciengx miz duz roegvameiz dwggyaez ndeu. Duz roeg neix mboujdan rox gangj, lij rox ciengq go, vanzlij rox diuq foux, engq dwg rox doxhoenx. Raen gvaq duz roeg neix, mbouj miz saek boux gangjnaeuz mbouj maij de, cungj naeuz duz roeg neix dwg duz “roegsaenz”.

Duz roegvameiz neix caeuq duz roeg wnq cungj mbouj doxdoengz. Duz roeg wnq aen ndang itbuen dwg saek henjgeq, laj dungx monghau, gyaeuj、laenghoz caeuq baih hwet miz riz raiz henjgeq, miz diuz gvaengz saek hau ndeu. Hoeng aen ndang duz “roegsaenz” neix cix dwg monghau, laj dungx dwg saek henjgeq. Gyaeuj、laenghoz caeuq baih hwet miz ndik ndangq saekaeuj, miz sam diuz saeklamz gvaengzda nyaeuq. Daengx duz beij roegvameiz wnq iq goeng ndeu, hoeng gij sing heuh de cungj beij roegvameiz wnq aeu hung boix ndeu. Gij sing heuh youh byot youh rwenz, cibfaen ndeidingq, hawj vunz rwz daengj da daengz, caemhcaiq hawj vunz maezgyaez mbouj rox caenh.

Laujvangz ciengx “roegsaenz” mbouj rox baenzlawz cienz okbae? Geij boux vunz diegrog cungj mbouj saenq gienh saeh neix, gyoengqde ciengx roeg ndaej geij cib bi, raen roegvameiz geq mbouj rox liux, coengzlaiz mbouj raen gvaq maz “roegsaenz”. Vih gienh saeh neix gyoengqde couh daeuj ranz Laujvangz “gaujcaz”, doeklaeng gij biujyienh gig mbouj bingzciengz duz roegvameiz neix hawj gyoengqde fug lo. Yiengh- neix gyoengqde doxciengj cawx duz roeg neix, hoeng Laujvangz gangjnaeuz hawj geijlai ngaenz hix mbouj gai. Doeklaeng hix gingdoengh daengx guek boux “vuengz siengqroeg”, gyoengqde naengh feihgih、dap dungceh daeuj “nyinhcingq”.

Miz boux “vuengz siengqroeg” raen duz roeg Laujvangz caen dwg baenzneix daegbied, lij miz di mbouj gamj saenq gij lwgda swhgeij, couh gouz goeng Laujvangz dawz duz roeg neix cuengq okdaeuj yawj dauqdaej dwg yienghlawz? Lauj- vangz hai roengqroeg le, roegvameiz neix sikhaek mbin okdaeuj, douh youq baihnaj boux “vuengz siengqroeg” neix. “Vuengz siengqroeg” iet ok faj- fwngz ndeu, naeuz duz roeg neix:“Daeuj doiqnaj gou! ” Ngamq gangj liux, duz roegvameiz neix couh mbin daengz gwnz angjfwngz de ndwn youq gizde, naj coh de, loq aj fwed, soeng bwn haibak, gij sing yiengjsasa youq henz rwz de heuh:“Angqcoux daeuj daengz!”

“Vuengz siengqroeg” dingq le gikdoengh ndaej raemxda rih, de menhmenh maeuq roengzdaeuj, caemhcaiq dawz “roegsaenz” neix cuengq youq gwnz namh, yienzhaeuh cingj “roegsaenz” neix gonqlaeng baenq bae baenq dauq, duz “roegsaenz” caen dingqgangj, mbouj deuz mbouj mbin. Hawj de heuh de couh heuh, hawj de ciengq go de couh ciengq go; hawj de diuq foux de couh diuq foux. Doeklaeng boux “vuengz siengqroeg” aeu cib lai duz roegvameiz daeuj caeuq “roegsaenz” neix beij goengfou. “Roegsaenz” ciuqyiengh lijdwg “bouxvuengz”, baez yaep da, gyoengq roegvameiz wnq couh cungj deng baih roengzdaeuj. Boux “vuengz siengqroeg” haenh mbouj daengx bak naeuz:“Roegsaenz! ! Caen dwg duz roegsaenz!” De coh mbwn iet hoz danqheiq raezrangrang naeuz:“Ciuhneix yienznaeuz mbouj ndaej gij roeg neix, hoeng ndaej baenzneix yawj, cukgaeuq lo!”

Dingqnyi naeuz, boux “vuengz siengqroeg”neix dauqma le, aenvih hwnzngoenz siengjniemh duz “roegsaenz” neix, doeklaeng gingqyienz daiheiq bae lo.

Daj neix hwnj, duz “roegsaenz” Laujvangz neix riuzmingz lajmbwn.

Laujvangz vih duzroeg neix couh okmingz lo, youh aenvih duzroeg neix, de couh moengj- moengj doengjdoengj daj boux gohyenz bujdungh benz hwnj aen vih fouqgohcangj bae.

Daj Laujvangz byaij mbat seizheiq roeg neix le, gij vunz seiqhenz cungj miz di da’nding de, ndawde ceiq youqgaenj couhdwg gizcangj Laujvangz lo. Gizcangj miz doiq lwgda lumj da duzyiuh nei, hix lumj gyoengq muengx gaeb roeg nei. De daengx ngoenz cim gwnz yangzdaiz duz “roegsaenz” Laujvangz baebae dauqdauq, hoeng aiq aenvih de aeunaj, cungj mbouj gamj bae ranz Laujvangz raen duz “roegsaenz” neix.

Gizcangj siengj duz “roegsaenz” Laujvangz lai lo, lumj ndaej bingh nei. De moix ngoenz cij ndaej daj giz conghcueng swhgeij aeu vang- yenjging yawj duz “roegsaenz” neix, ndawsim siengj baenzlawz cij ndaej loengh daengz duz roeg neix.

Gvaqlaeng, miz haujlai vahrumz riuz daengz henz rwz Laujvangz, gangjnaeuz cijaeu Laujvangz wh soengq duz “roegsaenz” neix hawj gizcangj, de couh ndaej daez hwnjdaeuj, hawj de daj boux fugohcangj neix bienqbaenz gohcangj, aenvih gizcangj hix gig gyaez duz “roegsaenz” neix. Mboujgvaq, Laujvangz ndawsim rox, mboujguenj aen “cienznaeuz” neix dwg gizcangj bonjfaenh caenbak gangj roxnaeuz dwg bouxwnq luenhgangj, cijaeu de soengq duz roeg neix hawj gizcangj, de haengjdingh ndaej gizcangj rex ndang hwnj soh. Gangj lauxsaed, caemz roeg, Laujvangz caen dwg guhcaemz ndwi, soengq duzroeg vuenh aen cingqgoh ndeu canh hung lo. Hoeng de youh rox, duz roeg neix liz de bae le, bietdingh deng dai mbouj miz maz ngeiz. Laujvangz caeuq duz roeg neix doxing doxlix, duz roeg neix gvenq caeuq de gvaqngoenz lo.

Seizneix youh cingq dwg mwh ndaw giz gaujhaed cibgeij boux vunz bouxlawz dang gohcangj, Laujvangz hix mbouj gamj dwnx, de rox daengz maz heuhguh seizgei mbouj ndaej saet, baez saet mbouj caiq dauq. De aeu menhmenh bae dajsuenq, siujsim guh saeh. Hoeng, gij gingcwngh haenqrem dahraix, ndaw giz haujlai doengzsaeh dwg bwnjgoh、yenzgiuswngh, caeuq de doxceng, de cij mbouj gvaq dwg hanzsou daconh ndwi, yaek aeu aen gangjvei gohcangj neix gig nanz, neix couh begfwngz lumj hwnj mbwn nei.

Gaujhaed geizgan, boux daeuj yawj “roeg- saenz” engq lai lo. Laujvangz moix ngoenz cungj youq ndaw angq gij vunz yawj roeg haenx yied gvaq yied simnyap.

Gij bingh ndawsim gizcangj caeuq Laujvangz doxca mbouj miz geijlai. Hoeng Laujvangz mbouj rox gij bingh ndawsim gizcangj naek mbaeu baenzlawz yiengh. Hoeng gij sim’in Laujvangz cix deng gizcangj aeu vangyenjging yawj ndaej raen lo. Roegvameiz moix baez eu fwen caeuq diuq foux cungj gyanaek gij sim’in Laujvangz.

Doiq gizcangj daeuj gangj, de maqmuengh duz “roegsaenz” neix ciengq go engq yied ciengq yied rwenz, diuq foux yied diuq yied gyaez, caiqlij maqmuengh duz roeg hwnzngoenz mbouj daengx doq ciengq doq diuq, cungj ngeix Laujvangz seizlawz soengq duz “roegsaenz” neix daeuj caeuq swhgeij vuenh aen gohcangj cizvu. Vihneix, gizcangj ngoenzngoenz aeu vangyenjging bae yawj, dwkdaengz gij lwgda de cungj gvaengz ok hoengz daeuj.

Vih gienh saeh neix, Laujvangz youq henz roengqroeg boux dog naengh le sam ngoenz sam hwnz.

Gizcangj hix youq ndaw vangyenjging dawz duz “roegsaenz” neix sam ngoenz sam hwnz.

Ngoenzneix, Laujvangz dawz aen roengqroeg roengz yangzdaiz daeuj, cingq yaek hwnj ranz gizcangj bae, duz “roegsaenz” neix ciuz hojlienz coh Laujvangz. Gij sing de hawj Laujvangz youh yaemhywx youh sim’in, itcig youq ndawsim cukcak.

Gizcangj roemj aen vangyenjging, ndaq duz roeg neix naeuz:“Mwngz heuh maz heuh? Yaek heuh daengz ranz gou cij heuh hix mbouj nguh maz, meh mwngz lo, vih mwngz duz roeg neix, gou caj mwngz caj ndaej lwgda foeg liux, gig mbouj yungzheih cij caj daengz seizneix, mwngz dem maz luenh ha, roeg huk!”

（1）