Mboengqneix, cek saw 《Seiswz Mizmingz Cunghvaz(Sawgun Saw- cuengh Doiqciuq)》 okbanj, cek saw neix dwg Gvangjsih Minzcuz Yijvwnz Yenzgiu Cunghsinh comzvunz bien- raiz, Gvangjsih Gyauyuz Cuzbanjse okbanj fathengz. Aen hanghmoeg neix ndaej haeuj aen hanghmoeg gviveh okbanj gaiq okbanj cungdenj guekgya “cibseiq haj” caeuq baenz- roix vwnzyen mizmingz couqmaenh gij eiqsik caezcaemh Cunghvaz Minzcuz.

Seiswz mizmingz Cunghvaz dwg gij gaiqdap youqgaenj vwnzva cienz- doengj maenhndei Cunghvaz, hix dwg gij cingsaenz caizfouq gak minzcuz caezcaemh cauh, geiqloeg gij dauq- ngeix caeuq cingzgamj gak minzcuz caezcaemh. Vih bangcoh bouxdoeg Bouxcuengh baengh cihsaw minzcuz bonjfaenh, cinjdeng bae roxyiuj seiswz mizmingz Cunghvaz, cimz gij cingz yinx de, roxyiuj gijndei de, roxnyinh gij yinxdaeuz, doengzseiz hix aeu faenzbonj moq daegbied hawj bouxdoeg minzcuz wnq, Gvangjsih Minzcuz Yijvwnz Yenzgiu Cunghsinh gaenjndaet hopheux couqmaenh gij eiqsik caezcaemh Cunghvaz Minzcuz, senjleh 100 hot seiswz mizmingz Cunghvaz bien hoiz baenz《Seiswz Mizmingz Cunghvaz(Sawgun Saw- cuengh Doiqciuq)》, doengh gij seiswz neix dwg senj daj gij saehsaed sengdoengh Senhcinz daengz Cingh- cauz, dwg naeuz gij lizsij baenaj gak cuz lwgminz caezcaemh cauh aen guekcoj hungmbwk、langhbaij gak minzcuz doxcunz doxgyau doxyungz. Seiswz senj okdaeuj cungj miz yaemlwd daegbied caeuq neihanz lai, gangjnaeuz danqhaenh byadah gyaeundei guekcoj、minzcuz doxndei doxcunz caeuq vwnzva cienzdoengj maenhndei、gyoengq vunz gyaez guek miz ceiqheiq daengj, langhbaij gij cingz gyaez guek gyaez ranz canghraiz.

Ciuq cam rox, aen hanghmoeg neix daj senjleh seiswz、faen loih、fanhoiz cingjleix、loegguh sing’yaem, caiq daengz bienhaed okbanj, ging- gvaq 3 bi. Daengx cek saw aen cungjgangh dwg couqmaenh gij eiq- sik caezcaemh Cunghvaz Minzcuz, daj aen gwzgiz hung vwnzva Cungh- vaz Minzcuz lai yiengh doxcaemh haidin, moix hot seiswz souloeg haenx, cungj miz Sawgun caeuq Sawcuengh doiqciuq fanhoiz, caemh- caiq boiq miz sing yungh Vahgun Vahcuengh doeg dem.

(Veiz Munglingz)