“Deuz! Fangzraq mwngz!” Dahmeiz dacaengz ngaungau rongx sing ndeu, faek fwngz Daegvaz gvaq laeng bae, hujdengdeng lumj mehguk nei.

“Youh fatbag!” Daegvaz doeksaet yat, suk fwngz lumh najaek yah de haenx. Daengx ndang ndatfwdfwd lumj feiz deng mehyah baenzneix “bat raemxgyoet” couh fwt liengz roengzdaeuj lo. Cijndei muengh baihlaeng gyaeundei yah de ndwnj myaiz gywdgywd, hozgaek youh fouznaih.

Daegvaz raen yah de cingq ngeng ndang dacaengz ngaungau diuz gaensei saekhoengz venj youq ndaw gvihbuh haenx, de cij rox yah de vihmaz hozndat lumj fatbag lo.

“Meh bag mwngz, cungj gvaengxgvax gij saeh mbouj miz haenx baenz nanz, mwngz caen mbwq lai lo. Diuz gaensei soengq hawj mwngz neix mwngz caen dacaengz lai couh vut bae. Louz de hoij dangqnaj, ngoenznaengz longh swhgeij simfanz hozndat guh maz？Mwngz mbouj siengj gvaq couh gangj mingzbeg, gaej nyoegnyamx gou baenzlai!” Daegvaz rox yah de simsienh, hoeng gienh saeh neix de cungj gvaq mbouj ndaej bae. Moix baez fatheiq couh lumj dawz rin bya dub haeuj sim de daeuj, vanzlij yied caep yied sang, caep baenz faq ciengz songde cungj hamj mbouj gvaq ndeu.

Gizsaed, Dahmeiz daegdaengq baenzneix guh. Mwh de mbouj siengj hawj gvan de bungq, couh yungh fuengfap neix gik de, nyaux de sim luenh bae, caemh baezbaez cungj baenz, de roengzhoz dangqmaz. Ndigah de cungj mbouj vut diuz gaensei simgyaez youh simnyap haenx. De gaenq daengz cungnienz, caeux couh mbwq Daegvaz gyaj cingz gyaj eiq haenx lo.

Ngeih

Gienh saeh yah ndatheiq neix, hix dwg saeh simnyap de.

Bigonq, mbouj rox bouxlawz baklai, luenhvab yah de, naeuz Daegvaz soengq gaensei hawj meh- mbwk ndeu, diuz gaensei haenx vanzlij lumj diuz de liux bae. Hoeng, Daegvaz cawzliux soengq Dahmeiz diuz gaensei neix, caen mbouj ndaej soengq diuz lawz hawj byawz gvaq, de baenzlawz gejgangj, Dahmeiz cungj mbouj saenq……

Raen Daegvaz dai cungj mbouj nyinh, Dahmeiz sim doek roengz rongznae bae lo. Duenh haenx de simnyap dangqmaz, gwn ninz mbouj onj, dangqnaj cungjdwg gaensei nding coegda haenx, ndangdaej yied daeuj yied mbouj cwxcaih.

Bae yihyen genjcaz, canghyw daezsingj de noix fatheiq, danghnaeuz mbouj haeujsim ndangdaej, haujlai bingh cungj hwnjndang lo…… De roxnyinh daengx ndang lumj ngaiz mehmbwn caeuq deih hung caez nyoegnyamx nei.

“Yawj de mbouj dwg cungj vunz neix, de hix gwn gij ngaiz guekgya, vanzlij dwg daxboh gyoengq lwgnyez mwngz, gaej dwen lo, dinghdingh gvaq ndei saedceij.” Daxmeh Dahmeiz gienq de.

“Meh mwngz gangj ndaej deng, caeuq Daegvaz gvaq ndei saedceij, ndei gvaq meh mwngz youq mbanjranz sinhoj ciengx mou. De youh hawj mwngz dawz cienzcaiz, mwngz sij ndaej doi de ok rog bae hawj bouxwnq lwi? Onj sim ciengx lwg dwg caen.” Mehbaj hix nai naeuz.

“Couhdwg mehbaj mwngz mwhhaenx daiq gou bae gouz ciem, naeuz gou caeuq de gap ndaej ngamj. Seizneix gou ienqhoij dai lo.” Dahmeiz vanzlij nyap gvan de, daejsubsub, gag siengsim uet raemxda.

“Dah huk mwngz, sou gag gangjaeu baenzgya, diuz ciem haenx mboujgvaq dwg nai swhgeij law.” Mehbaj riu naeuz.

Yienznaeuz gyoengqde gangj ndaej miz di dauhleix, hoeng, daj seizde hwnj de cawzliux dawz ndei cienzhong songde, daiq ndei lwg, saeh wnq cungj mbouj swt.

De ciengzseiz daezsingj swhgeij: Gwnzbiengz neix cawzliux bohmeh caeuq mehbaj caensim in de, bouxwnq cungj nanz baengh, aeu doiq bonjfaenh ndei di cij ndaej, gaej hawj bouxwnq yien ndaeng byaij.

Doeklaeng, de baez ndaejhoengq, couh bae diuq foux lienhndang.

Seizneix, Dahmeiz ndang byom youh bienq gyaeu haujlai lo. Gvan de yawj ndaej hozhaenz, siengj got mbat ndeu youh bungq ding lo, simnyap dangqmaz.

Duenh haenx, vihliux hawj Dahmeiz haisim, Daegvaz baez miz baengzyoux doxiu gwn ngaiz gwn laeuj, de cungj muengh yah de daiq lwg caez bae. Hoeng, Dahmeiz sim liengz baenz nanz, caih Daegvaz baenzlawz guh cungj nanz raeuj ndaej dauq lo.

Daegvaz raen baengzyoux cungjdwg gvanbaz doxriengz, ciengzseiz doxgaen, cij lw de boux dog baedauq, lumj vunzgyax nei, doeknaiq dangqmaz, de ienqhoij swhgeij guh saeh mbouj ngamj, hawj yah de siengsim baenz nanz, de vih saeh neix sai uk lai lo.

sam

Ngoenz ndeu, Dahmeiz buenx mehbaj bae diegrog cang yieng baiq baed.

Mehbaj gaenq roekcib lai bi, duenh gonq laemx mbat ndeu, aen uk ok lwed. cingqngamj dah lwg de youq ranz, ndaej soengq bae yw vaiq, cij gip diuz mingh laux dauqma. Seizneix ndang ndei di le, couh siengj bae guh gij saeh neix, gouz ndangcangq gvaq ndaej gyaeu.

Mehbaj miz dahsau caeuq daegmbauq doiq lwg ndeu, dwg lauxbiuj Dahmeiz. Dahsau dang canghyw, daegmbauq dwg gunghvuyenz, doiq lwg de ciengzseiz hwnj ban roengz mbanj cungj nyaengq- foedfoed, mbouj ndaejhoengq gvaq.

Daj iq daengz hung mehbaj hix gig sim’in Dahmeiz, seizneix de youh ngamq ndaej cuengqgyaj, couh haici soengq mehbaj bae lo.

Ngoenzhaenx ngamq dwg liggaeuq ndwencib cibhaj, Bouxcuengh hwnj yieng cungj haengj genj youq moix ndwen liggaeuq coit caeuq cibhaj bae.

Neix dwg cungj conzdungj ndeu, youq liggaeuq coit caeuq cibhaj hwnj yieng dwg cungj sinyangj caeuq fungsug ciuhgeq riuz roengzdaeuj. Banlaux cienzgangj song ngoenz neix miz siensaenz roengz gwnzbiengz daeuj youz, gyoengqvunz miz maz maqmuengh couh bae hwnj yieng gouz baiq, bouxsien rox le, couh haengj ndaej bang de, maqmuengh baenz caen lo.

Dieg haenx dwg aen miuh baengh bya guh baenz ndeu, gungh miz sam caengz, gwnz liengz veh lungz deu fungh, gyaqciq dangqmaz, gya hwnj gij yieng coemh ndaej hoenz mok geujgak, hawj vunz baez daengz couh fwt lumj haeuj daengz diegsien nei, gij saeh simfanz dungxnyap haenx cungj siu liux bae.

“Raeuz caiq bae gouz ciem yawjyawj ba?” Mehbaj hwnj yieng le, naeuz Dahmeiz.

Dahmeiz mbouj haengj saenq gij saeh neix, hoeng, vih hawj mehbaj swnhsim, couh buenx de bae lo.

“Insik vunz dangqnaj, caemh byaij bae daengzcog.” Canghgejciem naeuz, “gvan mwngz mboengqneix miz di nanh, sou gvanbaz aeu caezsim cij yamq ndaej gvaq, mboujnex……” De ngauz- ngauz gyaeuj.

Itloh haici dauqma seiz, Dahmeiz ndawsim mbouj rox vihmaz cungj luenhlablab.

Soengq mehbaj bae ranz le, ngamq dauqma dingz ci ndei, denva Dahmeiz couh lumj rumz hung bongj nei yiengj mbouj dingz. Dwg nuengxbiuj dwk gvaqdaeuj, naeuz gvan de cingq youq yihyen, caz ok simdaeuz miz vwndiz, aeu soengq bae yihyen ndaw si genjcaz, guj aeu guh gij soujsuz dapgiuz……

Dahmeiz naeng gyaeuj baez in, raemxda fwt doek roengzdaeuj. De ganjgip buet bae coh yihyen……

Seiq

“Cejmeiz, diuz gaensei haenx dwg bigonq dahsau bangfuz duisieng gou cawx hawj daxmeh de. Aenvih daxmeh de mbouj fuengbienh ok haw bae aeu, de couh geiq hawj gou, heuh gou ndaejhoengq bang soengq hawj daxmeh de. Mwhhaenx gou nyaengq lai, couh heuh beixgwiz swnh daiq roengzbae hawj de lo. Siengj mbouj daengz dauq hawj sou dem mazfanz lai lo, caen doiq mbouj gvaq bw!” Daegnuengxbiuj Dahmeiz daj mehbaj gizhaenx dingq rox saeh haenx, couh dwk denva daeuj gej naeuz.

Ngoenhaenx, Daegvaz raen Dahmeiz ganj daeuj yihyen, nyaengqfoedfoed buet gwnz buet laj banh haeuj yen, ndawsim raeujrubrub.

Canghyw naeuz, aen soujsuz neix hix miz fungyiemj hung, Daegvaz gig lau mbouj miz gihvei caiq caeuq yah de gangjgoj. Hoeng baez siengj daengz gaensei youh lau Dahmeiz simnyap mbouj leixlangh de……

Yaek bae guh soujsuz seiz, Daegvaz raen gwnz hoz Dahmeiz cingq daiq diuz gaensei de soengq haenx, couh nyaenx mbouj ndaej rag fwngz Dahmeiz naeuz:“Dahmeiz, diuz gaensei……”

“Gaej gangj lo, gou cungj rox lo. Gou youq gizneix caj mwngz vaiqdi okdaeuj, caj mwngz caiq soengq gou diuz ndeu dem……” Dahmeiz rubrub aen gyaeuj Daegvaz riu naeuz, raemxda doek roengzdaeuj lo.