Vunz lix youq gwnzbiengz, mbouj miz byawz daj nduj ndei daengz byai, mboujdwg yienghneix mbouj swnhsim, couhdwg yienghde mbouj rimhoz.

Bihaenx yaek daengz cieng, daxboh gou baenz bingh haeuj yihyen bae yw bingh. Daegnuengx mbouj youq ranz, daxmeh cijndei caeuq gou doxlwnz youq yihyen ganqhoh daxboh. Ndaw ranz hong lai, gvaq geij ngoenz daxmeh youh dauq ranz guh gij hong de, gvaq saek song sam ngoenz youh daeuj yihyen caeuq gou doxlawh ganqhoh daxboh, hawj gou yietnaiq saekseiz.

Aen ranzbingh mbouj suenq gvangq, ngamq coux ndaej song aen congzbingh, daxboh ninz aen congzbingh baihndaw, boux daegmbauq he ninz aen congzbingh baihrog.

Daegmbauq ngeihcib bi baedauq, naengnoh hausek, song da ronghrik, baenzmbauq. Sam daeg lwgsai iq bingzbaiz naengh youq henzcongz daegmbauq, daeg he yawj yiengh cibsam seiq bi, lingh song daeg ndaej bet gouj bi baedauq, sam daeg cici caca gangj mbouj dingz. Daengz seiz gwn ngaiz, sam boux couh guhdoih bae baihrog gwn ngaiz, gyoengqde gwn imq couh riuj faenh ngaiz he dauq hawj daegmbauq gwn.

Youq ranzbingh geij ngoenz le, caezgya hix ciemhciemh doxsug lo. Gou cam daegmbauq: “Mwngz baenz maz bingh ne?”

“Saejgungz fazyenz, daeuj yihyen guh soujsuz, geij ngoenz neix couh ndaej okbae lo.” Daegmbauq naeuz.

Gou fwt geiq hwnj daegmbauq ngoenznaengz cijmiz sam daeg lwgsai iq buenx, mbouj raen bohmeh de daeuj yihyen gvaq, swnhbak youh cam naeuz:“Bohmeh mwngz guh maz hong baenz nyaengq, cungj mbouj raen gyoengqde daeuj yihyen ne.”

Gou vah ngamq dingz, daegmbauq song da hoengz lo, cengqgengz cang yiengh riu naeuz:“Gou daj iq bohmeh couh dai lo, cungj geiq mbouj hwnj gij yiengh gyoengqde ne, dwg ndaw mbanj gyoengq beixnuengx ciengx gou hung, sam boux lwgsai daeuj ganqhoh gou neix dwg ranznden gou.”

Seizneix gou gig ienqhoij cihgeij gangj ok gij vah neix, haemz cihgeij bak lai, hoeng vah gaenq gangj ok bak, sou mbouj dauq lo, caiq baenzlawz ienqhoij hix mbouj miz yungh.

Gou gaemdawz cenj raemx he ngaem gyaeuj couh ndoet, mbouj caiq gangj maz. Daegmbauq hix muengh coh gou caeuq daxboh, yaek gangj mbouj gangj, ngaem gyaeuj couh caemz aen soujgih de.

Daxboh ndang byombyengbyeng, naengnoh henjndaem, song aen lwgda mboep haeujbae.

Ngoenzhaenx, canghyw heuh daxmeh bae bangunghsiz damzvah. Canghyw naeuz, gij bingh daxboh danghnaeuz doengh soujsuz hix mbouj itdingh ndei hwnjdaeuj, lauheiq vunz caeuq cienzcaiz cungj loem bae, heuh daxmeh naemj ndei gonq caiq gietdingh.

Yawj gij yiengh daxboh, boux raen boux rox de nanz baenz vunz lo, daegmbauq hix mbouj lai gangj maz, cijdwg riu naeuz:“Mbouj nanz gou okyen lo, daxau hix ndei lo.”

Dingq daegmbauq baenzneix gangj, gou dungx soemjsetset.

Gizsaed, boux vunz he yaek baenz bingh, caeuxcaeux couh yienj okdaeuj lo. Daxboh ndaej seiqcib lai bi seiz, itcig roxnyinh aen dungx getndumj, de laihnaeuz dwg aen dungx fazyenz, bae haw cawx di ywdoj ma baek gwn, mbouj nanz couh ndei lo. Daj baezneix le, daxboh gwn mbouj ndaej geijlai doxgaiq, baez raen raemxyouz caeuq nohbiz couh nywnx, lai gwn di ngaizbyaek aen dungx couh raengbwtbwt mbouj rox siu. Itcig daengz seizneix roxnyinh aen ndang mbouj soeng, daeuj yihyen genjcaz, cij rox bingh bienq naek lo.

Daxboh baenz bingh, gou gig hojgvaq, raemxda gwq youq ndawsim lae. Danghnaeuz cihgeij miz bonjsaeh hung rom ndaej haujlai ngaenz, mbouj hawj bohmeh dwgrengz sinhoj, nanz mbouj nanz bae yihyen genjcaz ndangdaej, roxnaeuz hix mbouj dwg yienghneix lo. Roxnaeuz vunz baenz bingh hix caeuq simcingz ndei yak mizgven, bohmeh ngamq miz gou caeuq daegnuengx, gig gyaezcungh, lij iq lau gwn mbouj imq daenj mbouj raeuj, hung le hix yousim yienghneix yienghde. Dwg mbouj dwg dou mbouj dingqvah, hawj daxboh daxmeh simfanz lai? Daxboh bonjlaiz ndangdaej couh mbouj ndei, dwg dou nyex de fatheiq simfanz cij hawj baenz yienghneix?

Gou gwq ngaem gyaeuj naemj, raemxda gwq youq ndaw gvaengzda baenqlulu, gou muengh ok rogcueng bae, haenqrengz nyaenx dwk mbouj hawj raemxda lae roengzdaeuj.

“Dahcej, gwn naed dangz he van bak, ngoenzneix lajbyonghngoenz gou couh okyen lo.” Daegmbauq doq gangj doq yiengq gou byaij gvaqdaeuj, ndenq naed dangz he hawj gou, ciep dwk youh ndenq dangz hawj daxboh caeuq sam daeg lwgsai iq haenx.

“Goenghoh mwngz ndang ndei okyen.” Gou ciep gvaq naed dangz haenx, cang ok gij yiengh gig vaiqvued, daj gwnznaj nyaenj ok di riu daeuj doiq daegmbauq naeuz.

Gou ndang biz, bingzseiz cungj mbouj gamj gwn gij doenghyiengh van geijlai, cijndei dawz naeddangz cuengq haeuj ndaw daehbuh bae gonq.

Daegmbauq okyen mbouj geij nanz, daxboh hix okyen dauq ranz lo. Mingz rox gij bingh daxboh yw mbouj ndei lo, mboujyawx dauq ranz yietnaiq, ngoenznaengz gwn di yw mbouj hawj ndang in, lai saek ngoenz ndaej raen naj daxboh, lai saek ngoenz ndaej heuh sing daxboh, ngoenzlawz bohlwg doxbiek, hix mbouj ienqhoij geijlai.

Seiq ndwen lai gvaqbae, bihaenx liggaeuq seiq nyied cocaet lajbyonghngoenz it diemj lai, daxboh bae lo. Daxboh mbouj youq lo, uet hawq raemxda, dou aeu laebdaeb ndeindei gvaq roengzbae.

Gou nanz mbouj nanz geiq hwnj daegmbauq haenx, naemj daengz de mbouj boh mbouj meh, mbouj beix mbouj nuengx, mbouj miz saekdi diegbaengh, mbouj rox de seizneix baenzlawz yiengh lo？Baez naemj daengz gijneix, gou couh dawz naed dangz de hawj gou haenx daeuj yawj, sim naemj: Daegmbauq haenx dwg lwggyax, de itdingh gwn gvaq haujlai hoj, hoeng de song da ronghrikrik、sawdikdik, lumj caengz cimz gvaq lajmbwn gij haemzhoj nei. Youq ndawsim lwgmbauq, roxnaeuz de nyinhnaeuz, gwnzbiengz sojmiz gij haemzhoj mbouj suenq maz, cijaeu lijmiz diuz mingh, maz cungj mbouj lau lo……

Seizneix gou youh siengj hwnj gou bonjfaenh, daxboh yienznaeuz mbouj youq lo, gou lijmiz daxmeh caeuq daegnuengx doxbaengh, cijdwg cihgeij diuz loh seiqvunz byaij ndaej miz di mbouj swnh, hoeng cijaeu ngiengx gyaeuj enj aek byaij baenaj, nyinhcaen bae guhsaeh, cungj miz ngoenz ndeu raen ronghsag.

Ndawsim yienghneix naemj, maz cungj mbouj lau lo, gou mbouj caiq baenz hwnz baenz hwnz naemj neix naemj haenx ninz mbouj ndaek, mbouj caiq doeknaiq, mbouj caiq doek raemxda.

Seizgan lumj raemx lae, ndwenngoenz youq ndaw gij nyaengqfoedfoed doxbae mbouj dauq. Ngoenzhaenx, gou bae yienhsingz banh di saeh.

“Dahcej, dahcej!” Sawqmwh, baihnaj miz vunz heuh gou.

Gou swnh sing heuh muengh bae, boux vunzsai he youq baihnaj aen bouqgim byaij okdaeuj, riunyumnyum muengh coh gou.

Gou geiq mbouj hwnj youq gyawz raen bouxsai neix gvaq, yaepyet youh fwt geiq hwnjdaeuj, cingq dwg daegmbauq bide caeuq daxboh youq yihyen caemh aen ranzbingh haenx.

Daegmbauq beij gaxgonq sang di cangq di, naengnoh beij gaxgonq loq ndaem, henzndang de miz boux mehmbwk nohndaem he caeuq song daeg lwgsai iq naengnoh ndaem.

“Daegnuengx, baenzlai bi mbouj raen, mwngz baenzlawz yiengh lo? Geij boux neix dwg……? Gou miz di doeksaet cam.

“Daxheiz ndei!”

Caengz caj daegmbauq han, song daeg lwgsai iq haenx aeu Vahcuengh dongx gou. Mehmbwk haenx hix coh gou riuriu, mbouj gangj maz.

“Dahcej, neix dwg yah gou caeuq song daeg lwg gou. Bihaenx gou daj yihyen okyen le, couh gaen vunz daengz Feihcouh Anhgohlah bae vat gim lo. Aeu ndaej mehyah Feihcouh neix.” Daegmbauq riu naeuz.

Daegmbauq cimcim mehyah, youh naeuz: “Geij bi gonq, dou dauq mbanjranz, youq yienhsingz hai aen bouqgim neix. Daeuj gaen gou haeuj diemq daeuj yawjyawj.”

Daeuj daengz ndaw diemq, daegmbauq daj gwnzdaiz dawz aen buenz coux dangz he ndenq hawj gou naeuz: “Cej, gwn dangz ba.”

Gou bingzseiz mbouj gwn dangz, couh dwg naed dangz baenzlai bi gonq daegmbauq hawj gou haenx lij youq, hoeng seizneix daegmbauq ndenq dangz gvaqdaeuj, gou aeu gwn, aenvih neix dwg dangz van.

Gou gaemh naed dangz he, bok gij ceij suek dangz bae, dawz dangz coq daengz ndawbak, yaeng’yaeng nyaij hwnjdaeuj, roxnyinh naed dangz neix caen diemz, nyaij youq ndaw bak couh diemz daengz ndaw dungx ndaw saej bae.

Caeuq daegmbauq daengx ranz vunz doxbiek le, gou boux ndeu naengh ci dauq ranz, ndawsim gag ngeix, bouxvunz cij aeu miz maqmuengh, cungj miz ngoenz he raen mbwnrongh, saedceij cungj miz ngoenz he diemz lumj dangz.