Daeglwg gou heuh guh Daeghau, de sam bi mwhhaenx, miz ngoenz ndeu banhaemh, gou caeuq de bae laj gofaex guhcaemz. Gij roeg gwnz faex doxdam mbin ma rongz, gwnz faex haujlai roeg heuh gi’gi gyadgyad.

“Daxmeh, ndaw rum miz duz roeglwg ndeu!”Daeghau lwgfwngz vix byozrum baihnaj hemq naeuz.

Gou riengz faj fwngz de yawj bae, cij raen diegrum loegsuemsuem, roeg- lwg youq gizlawz ha? Dauq dwg gwnz faex miz geij duz roeglaux diuq hwnj diuq roengz, hemq gya’gya gyadgyad.

“Ndaw diegrum neix caen miz roeglwg dahraix ha, daxmeh daeuj vaiq di!” Daeghau bwq gvaqbae le, gou hix vaiqvid gaenlaeng bwq bae.

Bwq daengz byozrum laj gofaex, gou cij raen cingcuj, caen miz duz roeglwg ndeu boemz youq gyang rum, duz de gig iq, cengdi deng rumsang hoemq liux lo.

Gou goengzyongq roengzdaeuj, duz roeglwg doeksaet, hemq gidgid song bak, mbe fwed siengj mbin, hoeng de iq lai, rengz mbouj gaeuq, ngamq mbin ndaej cik sang, youh caiq doek roengz gwnz loh bae.

“Daxmeh gaej gaemh de ha!”Daeghau muengz heuh gou.

“Daxmeh mbouj gaemh de law, daxmeh siengj bang de lo!”Gou naeuz.

Duz roeglwg neix caen hojlienz lai lo, ngamq daj ndaw rongz gwnz faex doek roengz laj namh daeuj, geij duz roeglaux youq gwnz faex diuq bae diuq dauq, hemq dwk sing yaek goenq, hix mbouj miz gijmaz banhfap gouq duz roeglwg neix.

“Raeuz bangcoh de no!”Gou naeuz Daeghau. Daeghau ngaekngaek gyaeuj.

Gou youh caiq goengzyongq roengzdaeuj, aeu song fwngz gop duz roeglwg hwnjdaeuj. Duz roeglwg baeg gvaq, bamzhoemj youq gyang fwngz gou, ndang saenzdedded, cak mbouj doengh lo.

Dou youq laj gofaex ngiengx gyaeuj yawj, siengj ra aeu rongz duz roeglwg youq gizlawz. Hoeng gofaex baenzneix lai, gogo mwn- cobcob, gij roeglaux de youh diuq bae diuq dauq, dou caen mbouj rox aen rongz roeg youq gwnz gofaex lawz.

“Yienghneix, raeuz cuengq duz roeglwg neix youq gwnz nga gofaex, hawj daxboh daxmeh de daeuj gouq de ha!”Gou riengz Daeghau doxyaeng. Daeghau ngaekngaek gyaeuj.

Gou ndiengq din soengq duz roeglwg hwnj gwnz nga go faexhung bae. Duz roeglwg saenzriengrieng, boemz youq gwnz nga, hix mbouj miz rengz cak lai lo, cibfaen hojlienz.

Cuengq ndei duz roeglwg, gou caeuq Daeghau doiq laeng geij mij, siengj yawj roeglaux baenzlawz daeuj gouq duz roeglwg. Dou mbouj gamj byaij gyae, lau duz roeglwg youh caiq doek roengzdaeuj, engq lau gyoengq lwgnyez sai yawjraen, gaemh de bae boenz.

Danhseih dou song mehlwg youq laj gofaex caj haujlai nanz, cungj mbouj raen roeglaux dawz duz roeglwg bae.

“Baenzlawz guh?”Gou cam Daeghau, hix cam gou swhgeij. Gou caen siengj mbouj ok miz maz banhfap ndei, cij ndaej bangcoh duz roeglwg neix ma ranz, youh mbouj sienghaih daengz de.

Ce duz de youq gizde ma, gou lau de dai iek, roxnaeuz doek roengzdaeuj dai; gyoengq lwgnyez sai manzgyaengj, gyoengqde maij gaemh roeg, langh gyoengqde raen lwgroeg neix, itdingh mbouj cuengqgvaq de……Langh dawz de ma ranz, dou mbouj rox gaemh non, hawj de gwn gijmaz ne? Langh de dai iek, dou mbouj dwg engq nanzgvaq?

Dou siengj bae siengj dauq, siengj mbouj ok gijmaz banhfap ndei. Mbwn yaek laep lo, gou cijndei dawz duz roeglwg roengzdaeuj, cuengq youq gwnz daihloh, hawj roeglaux yawjraen de cingcuj. Dou song mehlwg souj youq bangxhenz, mbouj gamj liz gyae.

“Daxmeh ha, duz roeglwg caen hojlienz lai lo!”Gvaq haujlai nanz, Daeghau danqheiq naeuz.

Gou mbouj rox hoiz de gijmaz ndei. Iet fwngz got de haeuj rungj daeuj.

Mbwn ciemhciemh laep lo, dou souj duz roeglwg neix, souj diuz sengmingh iq neix, muengh mbouj daengz roeglaux daeuj gouq de, dou sim gip, youh mbouj rox baenzlawz guh cijndei.

“Raeuz daiq de baema ranz no.”Gou naeuz.

“Caen ndei lai lo! Ngoenzcog raeuz bae gaemh non hawj de gwn!”Daeghau lumj senq caj coenz vah neix nei, de angq dangqmaz.

Gou mbat daihsam dawz duz roeglwg hwnj gyang fwngz daeuj, de mbouj heuh hix mbouj cak lai, aen gyaeuj baenq bae baenq dauq.

Duz roeglwg neix bwn’gyaeuj mboujcaengz maj caez, gokbak lij miz song hop naenghau. Song aen lwgda luenzndin di, lumj song naed duh- ndaem. Bwn gwnzndang gwnzfwed hix mboujcaengz maj mwn. Song diuz ga legriengrieng, hoengzmaemae, ndwn hix ndwn mbouj maenh.

“Duz roeg iq neix caen dwggyaez lai lo, lumj duzcing doek roengz lajmbwn daeuj nei!”Daeghau haenh naeuz.

“Duzroeg ha, mbouj ngah lau, daxmeh daiq raeuz ma ranz lo!”Daeg- hau rub duz roeglwg naeuz.

Duz roeglwg lumjnaeuz dingq rox gij vah Daeghau, mbouj caiq saenz- riengrieng, dingh youq gyang fwngz gou.

Gou mbouj rox naeuz dawz duz roeglwg neix ma ranz deng mbouj deng, danghnaeuz ciengx de mbouj lix, gou baenzlawz riengz Daeghau gangj? Youh baenzlawz doiq gvaq liengzsim? Hoeng seizneix, gou mbouj miz gijmaz banhfap engq ndei. Mingh duzroeg caemh dwg mingh, youq lajmbwn, moix diuz mingh cungj wnggai bingz- daengj, cungj hab lix roengzbae.

Daeghau lij iq, gou hix siengj hawj de rox daengz in gij doenghduz lajmbwn, couh dwg in raeuz vunzloih swhgeij, vunz caeuq doenghduz wng- gai dox aeueiq、 doxhuz doxndei.

Gou lij siengj hawj Daeghau rox daengz, “bangcoh bouxwnq”coenz vah neix, mbouj dwg venj youq gwnz bak, dwg guh youq gwnz fwngz.

Caj de menhmenh majhung, de itdingh rox aen sim daxmeh.

Ma daengz ranz, Daeghau ra aen loengxceij daeuj, hawj gou cuengq duz roeglwg haeujbae, youh aeu aen duix iq ndeu cang raemx, aen duix iq ndeu cang haeuxfiengj, cuengq roengz loengxceij bae hawj duzroeg gwn. Doeksat caiq buen aen daengq iq daeuj, naengh youq henz souj duz roeglwg, coi duzroeg gwn haeux gwn raemx.

Duz roeglwg caen iek gvaq lo, duzde daengx aen lwgda luenz- ndingnding, aen gyaeuj baenq bae baenq dauq, raen mboujmiz yiemj, cij iet gyaeuj gwn amq raemx ndeu, youh dot naed haeux ndeu.

“Ndei lai lo! Duzroeg nyienh gwn haeux lo!”Daeghau daj fwngz riu naeuz.

“Raeuz ciengx duz de ndei, caj de bwn hwnj caez lo, raeuz couh soengq de ma ranz ra daxmeh de.”Gou naeuz.

“Duz roeg iq ha, gwn haeux vaiq di, caj mwngz majhung le, gou son mwngz dwkgiuz na!”Daeghau angq hemq.

Dou muengh duz roeglwg ndaej ndangcangq majhung, caj daengz de bwnfwed maj raez, dou itdingh soengq de mbin hwnj gwnz gofaex bae ra daxmeh de, soengq de mbin hwnj gwnzmbwn bae, caih de angqyangz gvaengxgvax.