Mboengqneix, dou cam mizgven bouhmonz roxyiuj, 2023 nienz daengx guek heiq deihfueng ndei comzyienj yaek youq 12 nyied 1 hauh daengz 8 hauh youq Nanzningz banh, daengz- seiz 50 aen heiqmoeg daj daengx guek 27 aen swngj gih si 35 aen heiqcungj daeuj haenx yaek hwnj daiz yienj, langhbaij heiq deihfueng gij daegsaek gag miz、gij cingzcik gag miz、caezcaemh hwngfat、caezcaemh mwn- hoengh.

2023 nienz daengx guek heiq deihfueng ndei comzyienj camgya lai、neiyungz lai、cawjdaez sienmingz、lai cungj heiq caemh yienj, gizdieg、heiqmoeg caeuq bouxyienj camgya comzyienj lai gvaq bi’gvaq. Cujveijvei daj daengx guek 100 lai aen heiqmoeg bauq ndawde senjleh 50 aen heiqmoeg（cezswjhi） daeuj comzyienj, miz Baekging、Gvangjsih、Sanhsih、Hoz- bwz、Sanghaij、Cezgyangh、Sanhdungh、Ningzya、Gizlinz daengj daengx guek 27 aen swngj、swcigih、cizyazsi 46 aen heiqduenz, miz Cinzgyangh、Yezdiu、Yigi、Gangi、Minjgi、Yunghgi、Gveigi、Yezgi、Vahgujhi daengj 35 aen heiq- cungj heiq deihfueng, Cezgyangh Yezgi 《Caencawdap·Gingdap》、Gvangjsih Caijdiugi 《Liuz Sanhcej·Fwen Buenz》、 Sanhsih Cingi 《Sueng Lungz Loengh Bet Sien》、Gyanghsih Gangi 《Henzdah Iu Youx》 daengj 50 aen heiqmoeg（cezswjhi） yaek gap- baenz 10 daiz cienciengz yienjok caeuq haimuqsik baeqmuqsik yienjok.

Ciuq cam rox, baez hozdung neix dingjmaenh aen cunghcij yisuz vih lwgminz, fei yienjok yaek cienzmienh doenggvaq aen bingzdaiz “Gvangjsih Vwnzva Leih”, gai fei gyaqcienz daemq, bouxyawj ndaej doenggvaq bingzdaiz cawx fei caemh yiengjsouh gij youhvei seiz siuhfei “Cou Doeng youz Gvangjsih”, daengz Gvangjsih Minzcuz Giyen heiqciengz yienhciengz yawj heiq. (Cinz Vwnz)