“Haj faen buenq ndoi seiq diegbingz, buenq faen bya raemx heux reihnaz”, neix couhdwg Fuconh Yauzcuz Swciyen. Fuconh doenghbaez heuhguh “guekbya”, gij lizsij vwnzva gyaenanz. “Aen Mingzsingz gaeuq ndeu, couhdwg buenq bouh lizsij Lingjnamz”, Mbanjsiusuij、Mbanjfuzhih、Hawsinhboh ndaej bingz guh aen mbanj lizsij vwnzva mizmingz ndeu, Miuhmajyinh caeuq diuz giuz funghyij Veizlanz、Cinghlungz daengj deng bingz guh doengh aen danhvei baujhoh vwnzvuz youq- gaenj guekgya, Fwenmbungqmbaj、foux- gyongngag Yauzcuz dwg guekgya gaep feihyiz daengj. Seizneix raeuz caez bae yawjyawj “giz dieg baenzmiz gyaeundei” neix ba.

Ndij Roengaeuq Siuhho coh baihsaebaek doxbae, liz yienhsingz aiq 30 goengleix yiengh- neix, miz aen mbanj canghyienz gyae’gyae gyawjgyawj mizmingz ndeu——Mbanjsiusuij. Aen de mwh Dangzciuz Gaihyenz laeb mbanj, daengz seizneix gaenq ndaej 1300 lai bi lo. Daj Dangzciuz daengz Cingciuz, mbanj de gungh ok le boux canghyienz ndeu、ngeihcib roek boux cinsw, deng vunz heuhguh “aen mbanj canghyienz”“mbanjranz vwnzgveiz”. Ngamq haeuj daengz aen mbanj gaeuqgeq neix, doq raen “gwnzmbaek gyanghongh ngawhrin heu, yiemhranz hoenzngeu roegenq dauq”, diuz hongh rinbanj raezrangrang, aen gyanghongh cien hoengz vax heundaem, mbouj nauhyied hix mbouj raen vunz baedauq, caenh raen gwnz dingjranz ok hoenz ngeungeu, dinghrwg cwxcaih. Byaij doxbae, dwg aen coengceiz Ranzmauz、aen laeuzcanghyienz、monzlaeuz cinsw、aen daizheiq gaeuq、ranzyouq miz gij daegsaek Mingzciuz Cingciuz, lizsij vwnzva gig naekna, lumjbaenz lij ndaej yawjraen gij nauhyied doenghbaez.

Daj Mbanjsiusuij okdaeuj, caiq bae yawjyawj doengh diuz giuz funghyij Fuconh. Gij roen gaeuq Mbanjyauz, ceiq gyaeu couhdwg gij giuz funghyij. Fuconh raemxrij lai dah cix lai, ndigah giuz funghyij caemh lai. Doengh diuz giuz funghyij lumj diuzdiuz sainyawh ronghyubyab nei, sanq youq gwnz dah Fuconh, hawj vunz byaijroen ndaej baex fwn baex rumz, cang aen biengz Fuconh. Fuconh seizneix miz 27 diuz giuz funghyij gaeuqgeq, cungj dwg youq mwh Mingzciuz Cingciuz hwnq. Ndawde diuz giuz funghyij Veizlanz、Cinghlungz ceiq miz daegsaek. Song diuz giuz neix cungj dwg giuzringienq、diengz gwnzgiuz、bamlaeuz doxgap baenz, gwnzde veh doengh gij veh miz saek, gig miz gij daegsaek Fuconh.

Cawz ok gingj ndei, gij yienghndei minzcuz Fuconh caemh gig naekna. Miz bya couh miz vunz Yauzcuz, miz vunz Yauzcuz couh miz fwen. Fwenmbungqmbaj couhdwg ndawde aen daibyauj ndeu. Cungj fwen neix aiq youq Mingzciuz couh miz. Mwh ciengq ndaej lai haenx, baezbaez cietheiq、guhlaeuj roxnaeuz guhhong sat ndaej hoengq le, ranzcawj couh baij daiz, iu gij canghfwen eu Fwenmbungqmbaj ak haenx, bouxsai mehmbwk gak faen doih, mwngz eu gou ciengq, mwngz cam gou dap, baezbaez eu baenz geij ngoenz geij hwnz, bouxlawz cungj mbouj bex. Ndigah, guhcaemz、doxduenq、gyau baengzyoux、yienq ngaekngeu……Haujlai saeh mizyinx couh buenx Fwenmbungqmbaj cienz baenz goj ndei.

Mbanj gaeuqgeq youz lo, diuz giuz funghyij yawj lo, Fwenmbungqmbaj dingq lo, gaiqgwn Fuconh hix mbouj ndaej lauq bw. Daeuhfouh- haeux dwg gaiqgwn mizmingz Cauzdungh Cin. Cienznaeuz, doenghbaez raemxrongz mued baenz cai, Saenznungzsi heuh vunzlai caep fai dingj raemxrongz, muh haeuxsan le, dwk raemx cawj baenz giengh hawj gyoengqde dienz dungx. Miz ngoenz ndeu, canghdajcawj yawj loek le dawz raemxhoi raix haeujbae cawj, coux haeuj aen raeng bae, yaep ndeu couh giet ngauq lo, doeklaeng vunzlai couh heuh de guh daeuh- fouhhaeux. Vanj daeuhfouhhaeux ndei ndeu, saek hau youh loq henj di, raemxdang sawdik, gij heiq hom coeng caeuq byaekhom ndonj haeuj ndaeng bae, daeuhfouhhaeux cix unq- nubnub, dem di byaeksoemj caeuq lwgmanh, sangjbak dangqmaz. Daj lwgnyez daengz bouxlaux, daih dem daih gwn daeuhfouhhaeux daengz laux, gwnzbiengz cix itcig miz vunz guh daeuhfouhhaeux, daih cienz daih daengz seizneix.

Gwn gvaq daeuhfouhhaeux, caiq cimz di makcizcwngz nyinh hoz cijndaej. Mwhneix cingq deng makcizcwngz ndaej sou, baenz doengh baenz ndoi mak henjrwgrwg. Fuconh dwg “giz dieg makcizcwngz Cungguek”, gij mak dieg de saek ronghsien、nohmak cix oiq cix unq、mbouj miz ceh、 nyaq mbouj lai, youq gwnzbiengz gig mizmingz. Dieg de bibi lij guh “aen ciet makcizcwngz Fuconh”, coenghrengz aen canj- nieb makcizcwngz Fuconh hwngfat youh ndei youh vaiq.

Mwngz ndei ha, gizneix dwg Fuconh. Miz bya doenghbaez, raemx Cunhciuh, roen Cinz- han, mbanj Dangzsung, singz Mingzcing, vunz seizhwng, miz cietheiq minzsug ciuhnduj, fwen foux sengcingz, gaiqgwn feih ndei, feihyiz saenzmaed, lij miz baengz、siuqva Yauzcuz gaeuqgeq caeuq ywdoj Yauzcuz. Vwnzva doenghbaez、yienghndei Yauzcuz、swnghdai gyaeundei、saedceij hoengq soeng, Fuconh youq gizneix caj mwngz daeuj!

（Gij swhliu daj Fuconh Yungzmeiz aeu）