Bouxsai loh gvaq aen bouq gai manzdouz seiz, nyaenx mbouj ndaej daengx din lo.

Aen bouq neix youq byaihaw, bakdou bouq miz aen congz haemq sang ndeu, gwnz de miz aen habceij he, aen neix dwg habhaiz, seizneix dawz daeuj cang ngaenz. Gwnz congz lij miz haujlai bingz gienghduh dem. Henz congz miz aen lozfeiz ndeu, gwnz loz gangq aen cauq he, ndaw cauq miz seiq aen caengq doxdab, gij fwi daj ndaw caengq biu okdaeuj, geu dem geu hopheux youq gwnz caengq, yaepyet couh siubae lo, heiqhom manzdouz raq dem raq biu coh seiqlengq, hawj vunz myaiz rih.

Boux cawjbouq dwg boux goenglaux ndeu.

Bouxsai mup daengz heiqhom manzdouz, hozgyaenh nod hwnj nod roengz, daegbied dwg raen gij ngaenz ndaw hab, sim de nodnuem yaek doengh, aifwngz humznyubnyub.

Doeklaeng, de mbouj aeu ngaenz, swnh goenglaux mbouj haeujsim, de riengjret caeg aeu bingz gienghduh ndeu couh vaiqvid byaij deuz, ndoj youq giz guggeh gwn.

De gaenq sam ngoenz mbouj miz maz doxgaiq gwn roengz dungx lo, seizneix iek ndaej naengdungx doxnem. Hoeng, gwn donq neix heiq donq laeng, baenzlawz guh? Maeh daengz gij ngaenz ndaw hab, de gag naeuz: Dai dangqveiz! De daj baihlaeng yut fagmid okdaeuj cim yaep he, bakmid lwenqmyabmyab, hawj vunz ndangndum, fagmid neix gaj vunz gvaq.

De dawz mid byaij daengz bakdou bouq gai manzdouz, fagmid yo youq ndaw genbuh, ngamq yaek roengzfwngz, cix raen goenglaux cingq cim swhgeij, de miz di simhaw, itseiz mbouj rox baenzlawz guh. Seizneix de ndaejnyi simdaeuz swhgeij diuqbubu, lumj miz duzdouq manz ndeu youq ndaw dungx luenh bungq nei, de boq song amq heiq raezrangh, sikhaek dawz duz neix ap caem, caemh daengq swhgeij aeu damhdingh, caj seizgei caiq roengz- fwngz.

Mwh de yaek baenqndang deuz, cij raen goenglaux yienh song aen manzdouz caeuq bingz gienghduh ndeu hawj de. Bouxsai nyengh dwk……Najgaej liux, dinghdingh ndwn dwk……

Goenglaux raen de mbouj ciep, naeuz: Gwn ba.

Bouxsai yaemhywq yaep he, gaenriengz menhmenh iet fwngz ciep aeu lo.

Yawj aennaj unqswnh goeng- laux, de roxnyinh daengx ndang raeujrub, baez daih’it deng vunz gvansim, de gikdoengh raixcaix. Gyangfwngz gaem gaiqgwn, lij nyengh youq gizhaenx, siengj naeuz coenz song coenz vah gyo’mbaiq, hoeng, mbouj rox daj gizlawz gangj hwnj. De yiengq goenglaux baiq mbat ndeu cix bae lo……

Yawj ngaeuzlaeng bouxsai bae haenx, goenglaux danqheiq naeuz: Byoem raez mumh co, mbouj rox ok maz saeh, baenzneix baihsaiq.

Bouxsai ndoj youq giz mbouj gyae haenx gwnguk, doq gwn doq yawj coh aen bouq, yawj goenglaux, goenglaux byaij daengz gyawz de yawj daengz gyawz, doq gwn raemxda doq rih……

Ngoenz daihngeih banringz, bouxsai youh daengz bakdou bouq gai manzdouz.

Goenglaux raen le ndawsim gag naeuz: Boux neix youh iek lo. De daj ndaw caengq dawz song aen manz- douz okdaeuj, hoeng, cienq gyaeuj dauq seiz, bouxsai haenx mbouj raen lo, yawjyawj seiqlengq, byaihaw hoengqvangvang.

Miz gingjceh hai gvaq, mbouj rox vihmaz, seizneix goenglaux roxnyinh dungxmbouq, lumj yaek miz maz saehhung nei.

Goenglaux soudan seiz, fatyienh laj habceij miz mbaw bauqceij ndeu, hainduj de mbouj dawzhaeujsim, cij liuq da ndeu. Hoeng, couh dwg baez liuq neix, sawj de doeksaet yat: Gwnz de miz mbawsiengq ndeu ciuyinx de, haeujsim baez cim, naenggyaeuj cumh liux, gwnz bauqceij doenggaeb bouxgajvunz gingqyienz dwg bouxsai haenx.

Goenglaux simsoh haenx, lawq le yaep dem yaep——Dauqdaej bauq mbouj bauqgingj? De dawz mbouj dingh cawjeiq……Doeklaeng de dwk denva hawj 110.

Gijneix cungj deng bouxsai haenx yawjraen liux, de ndoj youq giz haemq gyae, yawj gij neix caezcienz.

Mbouj geij nanz, gwnz gai miz lai boux gingjcaz cunzloz, daegbied dwg seiqlengq bouq gai manzdouz engq miz lai boux gingjcaz cunz.

Raen daengz neix, bouxsai mboujdan mbouj buet, cix mbouj gaenj mbouj gip byaij daengz bakdou bouq, cim coh goenglaux, naj laep- saengsaeng, lwgda daengx sohswdswd lumj yaek gwn vunz nei.

Goenglaux raen yienghneix cix mbouj lau saekdi, lij aeu ronghda naeuz hawj de: Miz gingjcaz, vaiq di deuz!

Liuh mbouj daengz, bouxsai dawz mid okdaeuj, vix coh goenglaux, bakmid lwenqmyabmyab, lumj sik- haek yaek aeu minghvunz nei.

Goenglaux mbouj lau, cix damhdingh cim de. Yaepyet, bouxsai cuengq fagmid lo, “gvangdang” sing ndeu, fagmid doek gwnz dieg.

Seiqhenz gingjcaz cung gvaq- daeuj gaemhdai de youq gwnz dieg, doengh mbouj ndaej saek di.

De daengjhoemj youq gwnz namh, song gen ngaiz gingjcaz geuh youq raeblaeng, aen naj ngengq gwnz namh, cienq coh goenglaux.

Yawj aen naj deng gaemh ndaej mbitniuj haenx, goenglaux dungxcieg caemh sim’in.

Gingjcaz saj aendaepfwngz hawj de le, riuj de hwnqdaeuj. Mwh gingjcaz yaek gaemh de bae, de gouz gingjcaz hawj de caeuq goenglaux gangj song coenz vah.

Goenglaux laihnaeuz de yaek ndaq roxnaeuz mieng swhgeij, gaenq guhndei swhsiengj cunjbei. Hoeng bouxsai daengz dangqnaj de, cix dinghcaem dwk naeuz: Bauqceij dwg gou cuengq youq gizhaenx. Gangj sat yiengq goenglaux baiq mbat ndeu cix bae lo.

Byaij ndaej geij yamq, de ngeux gyaeuj dauq, riunyumj coh goenglaux. Sairiu de mbaeumbeng, hawj vunz roxnyinh de maz saeh cungj cuengq roengz liux lo, ronghda de naeuz, gou ndang soeng sim sangj……

Goenglaux fwt mingzbeg gvaq- daeuj, de caiq dawz bauqceij daeuj yawj, baihlaeng bauqceij raiz miz geij hangz saw:

Gou gaenq mbwq gij saedceij ndoj dieg bae dieg lo, mwh gou cingq vih baenzlawz gatgoenq diuz mingh swhgeij dawz mbouj dingh cawjeiq, dwg gij simndei mwngz daj- doengh gou, hawj gou miz damj mienhdoiq yienhsaed, gyo’mbaiq manzdouz mwngz. Sam fanh maenz cienz gawjbauq haenx, dwg gou bauqdap mwngz. Mwngz haengjdingh geizheih, gou vihmaz baenz boux- gajvunz? Lwnh mwngz nyi, ranzvunz gou ciengznienz deng bouxyak hangz, amq heiq neix, gou ndwnj mbouj roengz, cix bae ra boux de “suenqsoq”, doxhoenx seiz, gou loengfwngz dub de dai. Gou gaenq ndoj cib bi lo, cib bi raezrangrang, gij saedceij sim venj ndaw hoz haenx, gou souh gaeuq lo, hix mbwq lo……

Sam fanh maenz cienz gawjbauq, goenglaux mbouj aeu, de laeglemx geiq bae lauzlaep(gamlauz) hawj bouxsai haenx.

Youq ndaw lauzlaep, bouxsai biujyienh ndei, ginggvaq geij bi gaijcau, de ndaej daezgonq oklauz.

Baez okdaeuj, de bae yawj goenglaux gonq, hoeng, mbouj raen goenglaux, baez cam vunz cij rox, goenglaux gaenq gvaqseiq. Gaiq ciubaiz gaeuq haenx, lij venj youq gwnz dou. Aen bouq gai manzdouz neix yienznaeuz dwg aen bouq bingzciengz ndeu, hoeng, dwg aen dieggozgut ciuhvunz bouxsai.

Bouxsai yungh sam fanh maenz haenx, laebdaeb hai aen bouq roengzbae, ciepcienz gij simndei goenglaux roengzbae……