Bonjbauq siusik（gicej Maj Veiyungz）11 nyied 18 hauh, Aen Hoih Yenzdauj Yozsuz Minzcuz Yijvwnz Gvangjsih Bi 2023 youq Nanzningz haiguh. Aen hoih neix dwg Gvangjsih Minzcuz Yijvwnz Yenzgiu Cunghsinh cawjbanh, daengx gih doengh boux ganbu minzcunghveij (minzyijveij) gij bouhmonz mizgven de、conhgyah yozcej gvendaengz minzcuz yijvwnz Gvangjsih gungh 75 vunz camgya.

Gwnz hoih, gyoengq conhgyah yozcej gak lwnh aen gunghcwngz baujhoh vahdeihfueng Vahgun、Gvangjsih bungq daengz aen gihvei lai cungj vah caeuq yijyenz diujcan、gij gvanhaeh Vahcuengh Vahgun caeuq couqmaenh gij eiqsik caezcaemh Cunghvaz Minzcuz、dienjcang vwnzva yijyenz siujsoq minzcuz、baenzlawz gohyoz baujhoh caeuq cienzciep vah siujsoq minzcuz、gij nyinhdoengz Cunghvaz vwnzva laeng ndaw sawgeq Bouxcuengh、youq seizdaih susw baenzlawz guh ndei hong minzcuz yijvwnz daengj. Gij vunz camgya aen hoih lij lwnh baenzlawz gohyoz baujhoh swhyenz siujsoq minzcuz yijyenz gih raeuz caeuq cienzciep vwnzva cienzdoengj ndei minzcuz. Gyoengqde ok cawjeiq naeuz lawz- yiengh guh ndei hong yenzgiu baujhoh ciengjgouq gij swhyenz saw vah siujsoq minzcuz、hoiz minzcuz yijvwnz、biensij sawhongdawz caeuq swhliu hag saw vah siujsoq minzcuz.

Baez hoih neix aeu couqmaenh gij eiqsik caezcaemh Cunghvaz Minzcuz guh sienqmeh, haeujlaeg hagsib guhsaed gij cingsaenz Ngeihcib Daih Aendangj caeuq gij cingsaenz hoih hong minzcuz Cunghyangh, caiq coicaenh minzcuz yijvwnz yozsuz gih raeuz doxgyau doxgap, ok siengjfap、yawjfap、fuengfap moq bae doidoengh hong minzcuz yijvwnz gih raeuz youq seizdaih moq cauhmoq hwngfat.