Mbwk:

Bohmeh ndiep lwg lai,

Ndiep dai lwg mbouj rox,

Meh ndiep haemz ndiep hoj,

Lwg mbouj rox naeuz cienh.

Sai:

Bohmeh ndiep lwg lai,

Ndiep lumj vaiz ndiep gyaj,

Boh ndiep lwg cix ndaq,

Lwg gvaqlaeng raen cienh.

Mbwk:

Mbouj gwn dungx cix iek,

Gwn dungx cieglinlin,

Gwn haeux lumj gwn rin,

Youq simfanz lele.

Sai:

Ndaem reih caiq ndaem naz,

Ra haeuxdonq yingying,

Lwg naeuz vah mbouj dingq,

Cingq fanzsim bohmeh.

Mbwk:

Meh ndiep lwg cix cingq,

Ndiep lumj rin lumj feiz,

Ndiep ndaw dungx ndaw saej,

Mbouj ndaej daemz okrog.

Sai:

Boh ndiep lwg cix cingq,

Ndiep lumj gim lumj ngaenz,

Boh ndiep lwg cibfaen,

Lumj gimngaenz ndaw daeh.

Mbwk:

Meh ciengx lwg sinhoj,

Meh goq lwg dwgrengz,

Gaej naeuz meh mbouj deng,

Sengciengx mbouj yungzheih.

Sai:

Lwg lij youq ndaw mbuk,

Lwg lij duk ndaw rungj,

Bohmeh muengh lwg hung,

Muengh baenz vunz lumj doih.

Mbwk:

Raen nywj ndiep daengz vaiz,

Raen ngaiz ndiep lwgnding,

Meh ndiep lwg ringring,

Ngoenz ninz mbouj baenz naengh.

Sai:

Boh gwn bingj gwn mak,

Dwk haeuj bak lij haiz,

Ndiep daengz lwg lailai,

Ngaiz mbouj gwn hix nyienh.