11 nyied 18 hauh, Fuconh Yauzcuz Swciyen banh aen hoih angqhoh, angqhoh swciyen laebbaenz 40 hopbi. Daengx Guek Yinzda Minzveij、Guekgya Minzveij cukhoh- duenz, Swcigih daiqbiujduenz、Hocouh Si daiqbiujduenz caeuq gak baih hekgviq caeuq Fuconh gak cuz ganbu ginzcung caezcaemh angqhoh aen hoih.

Daengx Guek Yinzda Minzveij、Guekgya Minzveij cukhohduenz donz- cangj Fungz Cangzhaij haengjdingh caeuq cukhoh gij cingzcik swciyen laebbaenz 40 hopbi aeundaej haenx. De naeuz, Fuconh Yauzcuz Swciyen 40 bi doxdaeuj gij cingzcik hungloet, cungfaen yienh’ok le gij minzcuz cwngcwz dangj caeuq aen cidu dieg minzcuz gagguenj guh ndaej deng, neix cingqmingz, Cungguek Gung- canjdangj lingjdauj dwg gij baujcingq gaenbonj dieg minzcuz hwngfat mwn- hoengh, diuzroen cingqdeng Cungguek miz daegsaek gaijgez aen vwndiz minzcuz ndei raixcaix, aen gungh- doengzdaej Cunghvaz Minzcuz miz rengz gietcomz hung’ak dangqmaz. Maqmuengh Fuconh Yauzcuz Sw- ciyen nyinhcaen gvancez gij swhsiengj youqgaenj mizgven gyagiengz caeuq gaijndei hong minzcuz Siz Ginbingz cungjsuhgi caeuq baenzroix cingsaenz cijsi youqgaenj de naeuz hong Gvangjsih haenx, laegdaeuq roxyiuj gij eiqngeih gietdinghsingq “song aen dinghlaeb”, giengiet guh daengz “song aen henhoh”, aeu couqmaenh gij eiqsik caezcaemh Cunghvaz Minzcuz dangguh diuz sienqmeh gak hangh hong daengx yienh, haenqrengz hai- cauh Fuconh aen gizmen moq hwngfat ndei saed, vih hwnqguh aen guek ak、minzcuz fukhwng guh’ok goengrengz engq hung.

Swcigih daiqbiujduenz donz- cangj, Swcigih Dangjveij cangzveij、Dungjcanbu bucangj Vangz Sinhfu daiqbiuj Swcigih Dangjveij、Swcigih Yinzda Cangzveijvei、Swcigih Yinz- minz Cwngfuj、Swcigih Cwnghez、Gvangjsih Ginhgih caeuq beksingq gak cuz daengx gih, cukhoh beix- nuengx gak cuz Fuconh. De naeuz, 40 bi doxdaeuj daegbied dwg Cibbet Daih Dangj doxdaeuj, Fuconh miz bienqvaq hungloet doenghbaez caengz miz gvaq, ginghci saedlig onjyamq daez- swng, lajmbanj hwngfat hwngfwdfwd, ndwenngoenz beksingq ngoenz ndei gvaq ngoenz, saekloeg hwngfat cingzcik yienhda, minzcuz doxgiet laebdaeb gyamaenh. Maqmuengh Fu- conh gak cuz ganbu ginzcung dingj- maenh aeu aen swhsiengj sevei cujyi miz gij daegsaek Cungguek seizdaih moq Siz Ginbingz guh dazyinx, cienzmienh doeksaed gij cingsaenz Ngeihcib Daih Dangj, haeujlaeg gvancez doeksaed baenz- roix cingsaenz cijsi youqgaenj Siz Ginbingz cungjsuhgi naeuz hong Gvangjsih haenx, gaengaenj boux- lingxdaeuz haenqrengz buekguh, dingjmaenh caeuq gyagiengz dangj cienzmienh lingjdauj, dingjmaenh aeu couqmaenh gij eiqsik caezcaemh Cunghvaz Minzcuz guh sienqmeh, dingjmaenh caezcingj、cinjdeng、cienzmienh gvancez aen leixniemh hwngfat moq, dingjmaenh hengzguh aen hwngfat swhsiengj aeu beksingq guh cungsim, doinyoengx gak hangh saehnieb hwnj mbaek lae moq, vih haenqrengz raiz bien faenzcieng Gvangjsih yiengh yendaiva Cungguek okrengz.

Gwnz hoih, Daengx Guek Yinzda Minzveij、Guekgya Minzveij cukhoh- duenz daiqbiuj Swh Yungjlieng doeg mbaw hohdienh Daengx Guek Yinzda Minzveij、Guekgya Minzveij. Swcigih daiqbiujduenz fudonzcangj、Swcigih fucujsiz Lij Cangzgvanh doeg mbaw hohdienh Swcigih. Swcigih daiqbiuj- duenz soengq mbaw baizbienj cukhoh hawj Fuconh caemhcaiq biengj baiz dem. Swcigih daiqbiujduenz fudonz- cangj, Swcigih Yinzda Cangzveijvei fucujyin Liuz Youjmingz、Swcigih Cwnghez fucujsiz Vangz Cinvaz、Gvangjsih Ginhgih saucieng fuswhling Cuh Yenzsai camgya aen hoih angqhoh. Aen hoih sat le banh aen langhbaij cingzcik swciyen laebbaenz 40 hopbi、vunzlai yienjheiq caeuq aen vanjvei angqhoh laeb yienh daengj baenzroix hozdung, langhbaij aen sim giendingh swciyen gak cuz ganbu ginzcung gyo’mbaiq aen dangj dingq dangj gangj riengz dangj byaij、 haenqrengz couqmaenh gij eiqsik caezcaemh Cunghvaz Minzcuz.

Ngoenzhaenx, lij banh Aen Hoih Yaenglwnh Swciyen Laebbaenz 40 Hopbi Ginghci Sevei Hwngfat dem. Vangz Sinhfu daegbied gangj daengz, aeu laebdaeb haeujlaeg gvancez gij cingsaenz Ngeihcib Daih Dangj, ciuq Swcigih Dangjveij、Cwngfuj gezcwz baijbouh, yawj cingzcik、caen bae guh、ca doeksaed, guh cawjdaez gyauyuz biucinj sang ndei bae, haenqrengz doinyoengx ginghci sevei hwngfat ndei saed, haenqrengz doicaenh lajmbanj cienzmienh saenqhwng, laebdaeb gyalai gij fukfaenh ndwenngoenz beksingq, giendingh mboujbienq couqmaenh gij eiqsik caezcaemh Cunghvaz Minzcuz, mboujduenh gyagiengz dangj cienz- mienh lingjdauj hong minzcuz, gyavaiq hwnqguh Fuconh.

Mwh angqhoh laeb swciyen, Sw- cigih daiqbiujduenz lij faenbaenz 5 aen duenz, bae Fuconh lajmbanj、hag- dangz、yihyen、giyez caeuq gihgvanh danhvei, yawjngonz camnai gak cuz ganbu ginzcung.

(Cinz Vwnzvuj Loz Yiz daj 《Gvangjsih Yizbau》 aeu daeuj hoiz)