Ciet baiqfaex youh heuh “ciet caeqfaex” “ciet caeqcoj”, dwg aenciet gyoengq Gwzlaujcuz Lungzlinz Gak Cuz Swciyen, moix bi youq ndwen- cieng cibseiq caeuq bet nyied cibngux guh ciet. Ngoenz ndwencieng cibseiq baiq doengh gofaex gomak, ngoenz bet nyied cibngux baiq “faexcoj”, couhdwg baiq cojgoeng.

Ngoenz ndwencieng cibseiq, gak ranz couh song vunz guh cuj ndeu, dawz haeuxnaengj、laeujhaeux、noh cug、ceijhoengz、bauqbemx daengj doxgaiq, youq laeng ranz naj ranz、laeng mbanj naj mbanj baiqfaex, baiq doenghgo faexmak roxnaeuz faexcaizliuh sangngau haenx. Baez baiq- faex, youq dangqnaj gofaex cuengq bauq gonq, yiengh le boux ndeu gaem caxfwnz nyaeg nga faex sam mbat, boux ndeu hawj bak cax gwnzgo “gueng” gaiq noh caeuq gaem haeuxnaengj ndeu, caiq byoq gaemz laeuj ndeu hwnjbae. Nyaeg baez faex ndeu, song vunz couh doxcam doxdap gij vah ndei caeuq gofaex mizgven haenx. Lumjbaenz “aenmak hung mbouj hung——hung” “aenmak van mbouj van——van”“aenmak loenq mbouj loenq——mbouj loenq” “gofaex maj mbouj maj——maj” “gofaex sang mbouj sang——sang” “gofaex laemx mbouj laemx——mbouj laemx” daengj. Baiq sat le, caiq lumx faex ndai nywj.

Ngoenz bet nyied cibngux caeq faex dwg daengx mbanj caez guh. Ndawde Dwzngoz Yangh Mozgih Cunh baiq “faex cojgoeng” guh ndaej ceiq nauhyied. Youq ngoenz haenx, gyoengqde dwen goengdaek cojgoeng、gouz fuk、ndaem faex、hoh ndoeng, gangj gij lizsij Gwzlaujcuz senjdieg haenx. Go faexcinghgangh dwg gofaex cojgoeng Gwzlauj- cuz, go de caeuq gij lizsij vueddoengh senjdieg Gwzlaujcuz mizgven. Gwzlaujcuz miz hotfwen ndeu yienghneix ciengq:

Yinznanz roengzma diuz dah ndeu,

Gizneix riuz bae gizde louz;

Ciuhgonq Gwzlauj mbouj dieg youq,

Senj ranz Gveiqcou daeuj Guengjsae.

Cienznaeuz Mingz laeng Cingh co, cojgoeng Gwzlaujcuz vih ndoj hoenxciengq, youz “ranzdaih” (gij ban ceiq sang haenx, lajneix doengz) Gwzlauj- cuz daiq aen lozyieng caeuq lingzveih cojgeq bae gonq, byaij gvaq gyawz, couh aeu mbawfaex geiqhauh, vih gyoengqvunz yinx fuengyiengq. “Ranzdaih” bin gvaq bya youh bya, byaij gvaq mbanj youh mbanj, hix mbouj rox byaij le geijlai nanz, couh daengz gaiq deihfueng ndeu. Gizneix bya heu raemx saw, “nywj haj cik raez, faex haj cik sang, coemh go samvengqlueg ndaej ndaem reih, vat gumz ndaej ndaem naz, miz raemx miz nywj ciengx doenghduz, ndaem faex engq ndaej gwn”. “Ranzdaih” baez dajdingq, cij rox de daeuj daengz le seizneix Lungzlinz Gak Cuz Swciyen Dwzngoz Yangh Mozgih Cunh Mbanjyacungh.

Vunzmbanj simhoengz dakdaih bouxhek Gwzlaujcuz neix, raen de mbouj miz ranz youq, couh beuj aenfungh bonjfaenh hawj de. Yienghneix “ranzdaih” gamjgik dahraix, de doekdingh youq neix an ranz. Hoeng de raen rugding nda miz gij lingzveih cojcoeng bouxcawj le, couh you lo: Gij lingzveih cojgoeng bonjfaenh dawz daeuj haenx yaek nda youq gyawz ni? Danghnaeuz gij lingzveih cojgoeng bonjfaenh caeuq gij bouxcawj caez cuengq giz ndeu, mbouj hab fungsug saekdi. Gij saeh neix “ranzdaih” dingh mbouj roengzdaeuj, couh mbwq- yaeng’yaeng byaij ok mbanj. Seiz yaek daengz bakmbanj, raen song go faex cinghgangh geqgoemq sohswd, ndangfaex youh genq youh co hung, fwnrumz rengz hix ci mbouj laemx; nga faex mwncupcup, gij ndit hix dak mbouj daengz laj. “Ranzdaih” yied ngonz yied haengj, nyaenx mbouj ndaej cuengq sing ciengq:

Faex cinghgangh ha faex cinghgangh,

Rag laeg mwn sang baex raemh ndei;

Baex ndit baex fwn youh baex cai,

Gwzlauj baizveih miz dieg cuengq.

“Ranzdaih” ra caxfouj daeuj, youq gwnz song go faex cinghgangh gak vat congh ndeu, cuengq gij lingzveih cojgoeng haeuj conghfaex bae, baiq go faex cinghgangh baenz faex cojgoeng. Gaxgonq vunz- ndawfuengz faen mbiengj ra “ranzdaih”, ngeix mbouj daengz gij geiqhauh aeu mbawfaex guh ndei haenx deng doenghduz gwn liux lo, gyoengqde cijndei gag ra deihfueng an ranz. Gvaq le haujlai nanz, gyoengqvunz ndawfuengz sanq youq Lungzlinz gak dieg haenx cij damqdingq daengz “ranzdaih” youq gyawz. Yienghneix, moix bi bet nyied cibngux, gyoengqde cungj yaek aeu geij boux daibyauj daeuj daengz Mozgih Cunh gvaq ciet baiqfaex, buiz cojgoeng.

Caeq go faex cojgoeng dwg “ranzdaih” guh- daeuz. Itbuen aeu ceijhoengz suk fwed、ga gaeq caeuq sim vaiz ndei le, faenbied soengq haeuj conghfaex cojgoeng bae, caiq yungh ngaenzceij fung ndei conghfaex. “Ranzdaih” gvih yiengq faex cojgoeng bae gouz fuk, dwk laeuj、cuengq bauq、gwnhaeux. Cojgoeng caeq sat le youh dawz aen sim vaiz faen hawj gak ranz gak hoh. Gwzlaujcuz miz fwen yienghneix eu:“Da caengh fagcaengh diemj doiq diemj, gaengaen liengxliengx cungj goengbingz; mbouj saenq bae laj faexcoj cim, faen aen sim vaiz hawj beixnuengx.” Ngoenz baiqfaex de, gyoengq- vunz vanzlij iu gyoengq Bouxcuengh、Myauzcuz、Bouxgun daengj seiq henz mbanj daeuj doxcomz.

Youq ndaw siengjfap Gwzlaujcuz, miz faex cij miz raemx, miz raemx cijndaej dajndaem、gvaq ndwenngoenz. Ciet baiqfaex yienh’ok le vunz Gwzlaujcuz son daihlaeng mbouj lumz cojgoeng, rox gamjaen, daejyienh gij siengjfap aeueiq swhyienz、henhoh ndoengfaex、haeujsim henhoh minzcuz doxndei、 caeuq swhyienz doxhuz caezyouq.