gou roxnaj haenx, dwg yah saucoz ndeu, de yiedcingz、simsoh、coengmingz youh siengj ndaej saeqnaeh. Bwn’gyaeuj de youh raez youh ndaem, youq laj daengngoenz yawj bae gig ngaeuzwenq, goknaj daengx bi hoengzsadsad, song da ronghrikrik, ndawda yienh’ok simndei caen- cingz. Ndang de maenhndei miz rengzhoengh, naj de hoengzmaeq cingsaenz gvaekgvaek, sing de goksat ndaej gujvuj sim vunz.

Geiqndaej mwh gou lij iq, baez daih’it yawjraen de, de couh doiq gou naeuz: Beixnuengx gizneix cungj heuh gou Cejsanhsanh, mwngz hix baenzneix heuh ba.

Roxnaj de dwg aenvih meh gou hix dwg Bouxmauznanz. Mwh siujhag cuengqgyaj, daxmeh mbouj ndaej vangq ciuqgoq gou, couh soengq gou ma diegseng. Cej- sanhsanh gizsaed dwg cejbiuj gou, caeuq gou dwg beixnuengx cin. Gou lij iq, de doiq gou gig miz naihsim, ciengzciengz daiq gou youq baih- henz, guh gaiq ndeigwn hawj gou: Faeg nohmou、daem duhnamh, gya faenj sagieng caeuq di gyu ndeu doxhoed; youh aeu daeuhfouhhau cuengq haeuj ndawbuenz yungh fwngz nu yungz bae, gya habliengh mbamoegsawz bae caeuq hoed; doeklaeng daek beuzgeng daeuh- fouhnaez cuengq youq ndawfwngz, aeu aen nohyienz cuengq youq baihgwnz, lumj cumh haeuxceizyienz nei bae cumh nohyienz, couh guh baenz gaiq ndeigwn cienzdoengj ndeu——daeuhfouhyienz.

Gwn daeuhfouhyienz liux, de daiq gou bae yawj doengh gomak ranz de ndaem haenx. Gaiq reih mbouj hung, liz ranz mbouj gyae, caenh gag geij go makgam daengj youq gizhaenx. Yienznaeuz miz noix, hoeng gogo maj ndaej mwncupcup. Deng ndwencaet bet, gwnzde gaenq baenz mak lo. Aen’aen mak luj raixcaix, venj youq gwnznyez, caeuq mbawheu doxdaengh, gig ndeiyawj. Cejsanhsanh naeuz, gij mak sah- dangzgiz dwg de gag sawq ndaem ho, naeng mbang, noh unq, feihdauh gig van le! Hoeng hoj ndaem baenz, sam bi cij dawz aen, youh deng nditndat fwn dumh dai le haujlai go mak, doeklaeng caenh lw geij go neix. De lij naeuz, vunz ndawsingz maij gwn mak sahdangzgiz dangqmaz, gai ndaej siu, hoeng mbouj miz gij fuengfap ndei bae ndaem mak ciengx mak, danghnaeuz miz banh- fap gaijgez couh ndei lo.

Majhung lo, gou noix miz gihvei ndaej dauqma diegseng, hix mbouj ndaej dauq raennaj Cejsanhsanh. Dwkdaengz bi’gvaq yawjraen sinh- vwnz gangj Vanzgyangh Mauznanz- cuz Swciyen daengx cuz ndaej duetgungz, ndaejnyi daxmeh caeuq caencik gangj gij saeh Danz Sanhnenz dah lwgsau neix, gou moengzloengz roxnyinh aen coh neix miz di sug ndeu, couh cam: “Danz Sanhnenz dwg byawz?”

Daxmeh naeuz: “Couhdwg Cej- sanhsanh ha! Mwh mwngz lij iq ciengzciengz caeuq de guhcaemz le! Seizneix de dwg bouxguhyiengh duetgungz lo, daiq le daengx mbanj bak lai vunz caemh ndaem makgam ne!”

Gou angq lai lo, cam daxmeh aeu le veizsin Cejsanhsanh, yawj- yawj geij bi neix de cungj guh gijmaz, cij daihgaiq rox di saeh de.

Bi 2014, daxboh Cejsanhsanh guhhong ngaiz sieng couh ndangcanz lo, vunz mbouj aeu de guhhong lo, de cix dauq ranz yietnaiq. Buz de caemh baenz bingh, yungh cienz cix lai. Mwh nwngq, ranz de cienzroen donq lo, gij ndwenngoenz haj boux vunz haeuj noix ok lai, hoj raixcaix.

Bi 2015, Vanzgyangh Mauz- nanzcuz Swciyen Cwngfuj lienzhab giyez, daiqlingx Mbanjcinzsangh daengj geij aen mbanj hojnanz haenx laebbaenz nungzyez swnghcanj hoz- cozse, caiq baiq conhgyah haeuj mbanj son baenzlawz ndaem doengh go huq ndaej canh ngaenz de. Gij vunz diuyenz saeqsim diucaz caz- yawj gij cingzgvang ranz Cej- sanhsanh, dingh ranz de baenz ranzhoj guh dangj laeb gaj. Caemh- caiq hawj boh de cienzbangbouj doiqhong, hawj buz de cienzboujdiep yw bingh, bangfuz nuengx de bae doegsaw, doengzseiz lij bihcunj aen hanghmoeg gaijcauh ranzvaih de.

Youq aen gien baengzyoux, de gangjvah cungj gig angqyangz: “Cwngfuj bang ranz gou haujlai, buz gou caeuq boh gou miz boujdiep lo! Nuengx gou ndaej bae doegsaw lo！Hozcozse guh hwnjdaeuj lo, dieggiek caemh laebbaenz lo, gij ndwen- ngoenz vuenyungz dou wnggai hix mbouj gyae loba?”

Doeklaeng, Cejsanhsanh cam- gya aen sonlienh dinfwngz nungzyez cwngfuj cujciz de. De baez daih’it ndaej daengx buenz、gohyoz bae hag baenzlawz ganqhoen、oemqbwnh、ganqmiuz、doekhoen daengj, hix hag rox yungh gisuz fatdad bae guh ndaej engq lai、guh ndaej engq ndei.

De geizheih doeklaeng hix mbouj lumz docih naeuz:“Cungj gangj cihsiz gaij ndaej mingh, youq aen seizdaih gohgi neix, bouxguhnaz dou hix yaek miz suciz sang, cij riengz ndaej hwnj aen seizdaih ndei neix. Gou mwhneix engqgya miz saenqsim ndaem ndei mak sah- dangzgiz lo. Docih aendangj caeuq cwngfuj bangcoh!” Youq ndaw gien baengzyoux, de daenj buh guhhong caeuq vunz sonlienh caemh naemq caemh hag, najriu najangq vuenyungz raeuh, mbaw doz neix hawj gou gamjdoengh.

De leihyungh gij lwgfaex mak- gam cwngfuj mienxngaenz fat haenx, aeu cienzbangbouj co le aen gihgi swnghcanj senhcin, youq gwnz ndoi fwz dangqnaj ranz ndaem mak sahdangzgiz. Miz le caizhag caeuq gisuz, mbouj geijlai nanz, go makgam baenz benq raemhfwdfwd、heusausau, rumz ci gvaqdaeuj, baenz manj baenz ndoi lumj raemxlangh yubyab.

Sam bi gvaqbae, mak ndaek aen ndaek ngauq, baenz lamz baenz ci rimfwdfwd, heiqhom mbin bae gyae’gyae. Cejsanhsanh canh ngaenz lo, hix gvaq ndaej vuenyungz angq- yangz. Doeklaeng de heuh vunz- mbanj daeuj caemh ndaem mak sahdangzgiz, son gyoengqde baenz- lawz ndaem mak. Gij gwndaenj vunz Mbanjcinzsangh yied gvaq yied ndei.

Youq aen gien baengzyoux, de faenyiengj le haujlai angqfaengz：“Seiqvunz cimz gvaq soemj haemz manh, caenh miz makgam ceiq van!” Sam bi neix daeuj, gij siengq makgam daj ndaem daengz cawznon, caiq daengz majhung baenz aen ndaw aen gien baengzyoux haenx, lumjbaenz geqgangj itloh byaij daeuj, de dwg baenzlawz dwgrengz caeuq buekguh. Mak sahdangzgiz daj aen mak iq heuoiq henjoiq bienq ndaej hung lumj gyaeqgaeq nei, henjrangrang. Daengx bya gij saek- henj saekloeg doxgyau haenx hix youq seiqvunz de louz roengz gij saek ndeiyawj ndeu.

Hoeng cingz ndei mbouj ndaej nanz. Bi 2020 gvaq cieng, ciengz bwtbingh sinhgvanh bauqfat. Dauq- cawq cungj haep singz, daengx guek dingj binghraq. Vunz Mbanjcinz- sangh yousim boebboeb, gyoengqde you gij mak sahdangzgiz bi haenx gai mbouj okbae, dwgrengz guh sam bi couh yaek dwk haeuj raemx bae mbouj ndaej saek gaiq ma lo.

Youq mwh ngaeuzngod neix, Cejsanhsanh gujli daihgya, mbouj youqgaenj, ciengz binghraq itdingh gvaq ndaej bae. Hoeng daengz le ndwencib, ciengz binghraq yienz- naeuz ndaej gungci mizyauq, hoeng lij mbouj rox mak sahdangzgiz yaek baenzlawz siu. Cejsanhsanh caemh hainduj simgip hwnjdaeuj, aenvih de fatdoengh daihgya ndaem mak sahdangzgiz, seizneix yawj daeuj gaenxguh hix mbouj ndaej cienz, ndawhoz de gig mbouj onj. Miz ngoenz ndeu, de yawjraen miz bouxguhnaz youq gwnz bingzdaiz densangh hung cigboq gai huq. De dumdeng mingzbeg, sikhaek hai aen hauh ndeu, youq baihgwnz cuengq baenz bya baenz ndoeng go makgam, aen’aen mak lumj daengloengz nei ndoj youq baihlaj mbawheu, laj gomak vunzmbanj riu dwk gig boeksaed youh simsoh……

Cib geij bi gvaqbae lo, Cej- sanhsanh gou geiqndaej haenx gaenq maj baenz Danz Sanhnenz “boux- guhyiengh maenhndei duetgungz”, ndwenngoenz youq gwnznaj de louz le riz, hawj de bienqbaenz boux- guhnaz genggiengz、gagsaenq、genh- ding、 senhcin seizdaih moq.

Diuz dungdai ceiq moq Cej- sanhsanh dwg de caeuq daxboh gen dog de youq gwnzbya caemh ndaem buek faexlwg moq sahdangzgiz, de sij daengz:“Gou gaxgonq ngeiz gvaq ndanggaeuq caeuq seiqvunz bingz- ciengz de, hoeng seizneix gou ra raen fuengyiengq lo. Dou bingz- ciengz, baengh song fwngz dwgrengz buekguh, dwk ok vuenyungz ndang- gaeuq, neix bonjfaenh couh mauh- gvaq bingzciengz. Vuenyungz dwg ndanggaeuq gag cauh okdaeuj de, gou gyo’mbaiq aen seizdaih baenaj neix, gou gyo’mbaiq aendangj vih yinzminz fuzvu neix, gou yaek yiengjsouh moix ngoenz haenqrengz buekguh.”

Gou lumjbaenz yawjraen gyanghaet Cejsanhsanh aemq gyaw mak sahdangzgiz rimradrad, yamq gvaq gij raiz mbawnywj henzroen, baetbaet mojlox mbaeu lumj sa ndaw ndoeng, yamq baenz yamq byaij daengz dingjbya, aeu song fwngz youq henz bak guh yiengh laxda eu naeuz:

“Beix ya nuengx le——

Euj nge goliux cap ndaw dangz,

Daeuhfouhyienz rang aen dem aen,

Buhmoq beixnuengx gwnz- ndang daenj,

Gouznyienh mak baenz ndaej rim cang,

Doengh go haeux a hom- fwdfwd.

Hei loz loz vei——”

Dahcej Sanhsanh