（ciep geiz gonq）

Caengh haeux sat le, boux caengh haeux gau bonj bouh’iq he hawj daxmeh, bonj bouh neix heuhguh bouh “gyau haeuxliengz”, gwnz bouh raiz miz mingzcoh bouxcawjranz, ndaw bouh raiz miz bi lawz ngoenz lawz gyau haeux geijlai gaen.

Haemhhaenx dauq daengz ranz le, daxmeh couh dawz bonj bouh “gyau haeuxliengz” neix yo daengz ndaw habroi bae, doiq dou geij beixnuengx naeuz:“Sou gaej doengh gij bouh ndaw rabroi neix o, ra mbouj raen raeuz couh deng bae gyau baez ngeih, yienghneix gij haeux raeuz couh mbouj gaeuq gwn gvaq bi lo.”

Aenvih cimz gvaq dungxiek, seizhaenx mbouj lau mbouj miz buhvaq daenj, ngamq lau mbouj miz haeux gwn, dingq daxmeh baenzneix gangj, dou engq mbouj gamj doengh aen habroi daxmeh. Daj bihaenx hwnj, ndaw habroi daxmeh bibi couh lai miz bonj bouh gyau haeuxliengz ndeu.

Doengh bi haicin le, daxmeh couh yien cwz okbae cae reih ndaemhaeux, dou geij beix- nuengx boux ndaej guh gijmaz couh guh gijmaz, ndaemhaeux seiz, gou cuengq ceh、daeg nuengxngeih dwk bwnh、 nuengx sam nuengx seiq lumx namh, cungj dwg bouxboux miz hong guh, doengzcaez bang daxmeh dajndaem, mbouj ndaej youq hoengq, sinhoj dwg sinhoj, hoeng mizrengz guh.

Seizhah, haeuxyangz sou sat le, daxmeh couh fan reih ndaem duhhenj, seizhaenx duhhenj gai baenzngaenz, daxmeh dwg ndaw mbanj boux daih’it ndaem duhhenj, vunzmbanj raen daxmeh ndaem duhhenj ndaej ngaenz, gvaqlaeng bouxboux cungj ndaem lo, duhhenj dajsou daengz ranz, fad aeu naed, daksauj couh miz lauxbanj daengz ndaw mbanj sou, miz bi gaen caet、bet gak ngaenz, miz bi gaen ndaej maenz ngaenz.

Yahdaiq rox guh daeuhfouh, daxmeh caengz okhaq seiz couh gaen yahdaiq guh gvaq daeuhfouh. Daxmeh naeuz gai duhhenj mbouj ndaej ngaenz, guh daeuhfouh gai, ndaej canh maenz gwnz maenz laj, daeuhfouh gai ndaej ngaenz, gij nyaq daeuhfouh lij ndaej aeu daeuj ciengxmou. Couh yienghneix, daxmeh couh bwh doxgaiq doenghfwngz guh daeuhfouh. Ranz gou dwg ndaw mbanj boux daih’it guh daeuhfouh.

Seizhaenx nohmou noix, daeuhfouh ndei gai, banringz gvaq daeuhfouh baez guh okdaeuj, vunzmbanj couh daeuj cawx, mizseiz mbanj gyawj lij miz vunz daeuj cawx dem, ngoenz guh geijlai gaen cungj mbouj gaeuq gai. Guh daeuhfouh hong lai, mboujdwg naeuz guh couh guh, daxmeh baeg lai, ngoenz cij ndaej guh ngeihcib lai gaen duh, daeuhfouh ngoenzngoenz ndaej gai liux couh baenz. Daj guh daeuhfouh le, ranz gou nanz mbouj nanz couh ndaej gai mou aeu ngaenz dem.

Faen reih seiz, ranz gou faen ndaej song duz yiengzmeh haenx, bibi roengzlwg, bibi miz yiengz gai lo, geij bi roengzdaeuj, ranz gou haeux gaeuq gwn, ngaenz gaeuq yungh, daxmeh naeuz: “Gwn imq daenj raeuj lij mbouj ndaej ndeindei gvaqciuh, sou aeu bae doegsaw cij ndaej, bouxlawz mbouj doegsaw, daengzcog couh dwg guh hongreih hongnaz hix guh mbouj baenz.”

Mwhhaenx, lajmbanj mbouj miz geijlai boux nyienh soengq lwg haeujhag, bouxgeq cungj muengh lwgmbwk lwgsai vaiqdi ndaej bang ndaw ranz guhhong, daegbied dwg doeg sat siujyoz le, couh mbouj miz geijlai boux bae doegsaw, it dwg hagdangz liz ranz gyae, ngeih dwg ndaw ranz hong lai. Dou geij beixnuengx cungj dingq vah, bouxboux cungj haeujhag doegsaw.

Daxmeh conz miz di ngaenz, de couh cingj bouxcangh guhranz daeuj, dawz ranzgaeuq doemq bae lingh guh ranzmoq. Guh ranz hong lai boux ndeu ganq mbouj gvaqdaeuj, de couh cingj vunzmbanj daeuj bang, seizhaenx cingj vunz banghong mbouj yungh ngoenz hawj geijlai ngaenz, cij aeu banngoenz miz haeux miz byaek ciengx gwn, banhaemh gwncaeuz miz di noh he dakdaih couh baenz, boux bang boux, miz mwngz miz gou, daxmeh ndaej hoengq hix ciengzciengz bae bang vunzmbanj guhhong.

Daeg nuengxngeih gou gauj ndaej daihhag, daxmeh dawz aen habroi okdaeuj, daj ndaw habroi yut aeu geij mbaw ngaenz ndenq hawj daegnuengx naeuz:“Neix dwg ngaenzci caeuq ngaenz lingzyungh, daengz hagdangz le aeu ndeindei hagsib.”

Daegnuengx bae lo, daxmeh yo aen habroi hwnj, daengq naeuz:“Sou gaej doengh aen habroi o, ndawde miz di ngaenz, gaeuq sou doegsaw, gaeuq ranz raeuz doenghngoenz sawj- yungh.”

Daxmeh baez miz souhaeuj couh dawz ngaenz yo daengz ndaw habroi bae, yaek yungh ngaenz couh daj ndaw habroi aeu okdaeuj. Geij lai bi gvaqbae, dou cungj mbouj gamj doengh aen habroi daxmeh.

Miz ngoenz ndeu, daxmeh baehaw le, gou laeglemx dawz aen habroi okdaeuj, dajsuenq yawj ndawde miz geijlai ngaenz. Gou rag hai aen fa habroi, ndaw habroi baihgwnz cuengq miz ciengq baengzhoengz he, dawz ciengq baengz- hoengz deuz couh raen miz song sam mbaw ngaenz caeuq bonj bouh conzngaenz ndeu, ndaw bouh geiq miz hajbak samcib bet maenz. Gou gig doeksaet, seizhaenx gai duzmou he ceiqlai hix ndaej bak lai maenz ngaenz、boux dang lauxsae roxnaeuz boux dangdaeuz ndwen hix cij ndaej ngeihcib lai samcib maenz ngaenz. Daxmeh gaenq miz baenzlai ngaenz lo, raen daengz gijneix, gou nyinhnaeuz ranz gou fatcaiz lo, angq ndaej geij hwnz ninz mbouj ndaek bae.

Meh mbwn baez bienq, saeh’angq couh gienh ciep gienh gyonj daeuj. Faen reih daengz ranz mbouj geijnanz, vunz lajmbanj couh boux rag boux okrog bae dajgoeng lo, gou dwg ndaw mbanj boux doeg gvaq gauhcungh ndeu, vunz yaek aeu gou youq ndaw mbanj sonsaw, ndwen hajcib bet maenz, guh mbouj guh, gou gaem mbouj dawz cawjeiq. Daxmeh naeuz: “Dang lauxsae sonsaw, dwg gienh saeh miznaj ndeu, ngaenz noix di cix noix, raemxrij lij ndaej lae baenz dah, mwngz lij dwg youq ranz sonsaw ba.”

Seizneix naemjnaemj, danghnaeuz seiz- haenx gou couh okbae dajgoeng, mbouj rox miz mbouj miz ngoenzneix. Seizneix, dou geij beixnuengx bouxboux miz hong guh, bouxboux baenzgya baenzdangq, ranzranz miz gwn miz daenj. Daxmeh hix ciemh ngoenz ciemh geq lo.

Dou geij beixnuengx cungj youq ndawsingz miz ranz an’gya. Daxmeh mbouj caiq guh reihnaz, de hix dawz gij dinfwngz guh daeuhfouh haenx son hawj vunz ndaw mbanj, laemxsim daengz ndaw singz caeuq dou youq, maij youq ranz lawz couh bae ranzde.

Miz ngoenz ndeu, daxmeh naeuz caeuq dou gwn youq mbouj fuengbienh、 mbouj swyouz, naemj gag gwn gag youq, dou dingq de, hawj de gag gwn gag youq.

Dou geij beixnuengx bouxboux ok di ngaenz, cawx aen ranziq ndeu hawj daxmeh. Binghsiengh、gunghdiuz、caijden、sahfaz、daiz- daengq cungj cawx hawj de, ndaw ranz yienghyiengh moqsaksak, denzmbinj、buhvaq、haizmauh、vanj dawh gij doxgaiq gaeuq hab soengq vunz couh soengq vunz, hab vut bae couh vut bae cungj mbouj hawj de caiq yungh.

Buen haeuj ranzmoq ngoenzhaenx, daxmeh dawz aen habroi gab youq lajeiq, couh lumj lau aen de doek bae nei, gou naemj bang de dawz hix dawz mbouj ndaej.

Daeujdaengz ranzmoq, daxmeh lijdwg ciuqyiengh dawz aen habroi cuengq youq gyaeujninz de, gou naeuz:“Meh, mwngz yaek yungh siengnaeng、siengdiet、sienglij roxnaeuz siengdoengz dou bae cawx hawj mwngz, aen habroi neix gaeuq lai lo, yakyawj lai ni, baenz vut bae mbouj yungh lo.”

Daxmeh naeuz: “Couh dwg sienggim gou hix mbouj aeu, gou couh yungh aen habroi neix.”

Mbouj rox dwg seizneix doxgaiq daiq lai roxnaeuz gij doxgaiq ndaw habroi daxmeh doiq dou daeuj gangj gaenq mboujmiz gijmaz citgeiz, geijcib bi daeuj, dou mbouj miz bouxlawz bae doengh aen habroi daxmeh, engq mboujmiz bouxlawz hai gvaq aen habroi daxmeh.

Daxmeh gvaq betcib sam bi ngoenzseng haemhhaenx, lwglwg lanlan cungj daeujdaengz caez, yaek gwncaeuz seiz, daxmeh dawz aen habroi okdaeuj naeuz: “Aen habroi neix buenx gou ciuhvunz he lo, miz saekngoenz gou dai le, sou aeu hawj boux he bang gou yo ndei.”

Daxmeh gangjsat, hai habroi hawj daihgya yawj, gyoengq lwgnyez mbouj citgeiz, bouxboux aiq yawj mbouj yawj, dou geij beixnuengx roxnyinh geizheih lai, bouxboux cuengq gij hong gyangfwngz, cung daengz doiqnaj daxmeh bae yawj habroi. Cijraen ndaw habroi yo miz cib geij bonj bouh geiq goengfaen、 cib geij bonj bouh gyau haeuxliengz caeuq mbaw gaj yihbauj ndeu、mbaw gaj sebauj ndeu、 mbaw gaj ngaenzhangz ndeu.