Ngeix daengz gou ndanggaeuq,

Mboujrox miz vuenyungz,

Yiuq roengzdaeuj a mbwn,

Guh vunz mbouj baenz ciuh.

Gou caeuq vunz caemh bi,

Vunz baenzgya miz dangq,

Vunz bae youx guh’angq,

Gou youzlangh hix nanz.

Bohmeh dai bae laj,

Baengh mehbaj ranzgwnz,

Miz gijmaz ndei gwn,

Swnh fwngz ndenq gvaqdaeuj.

Bohmeh dai roengz namh,

Mbouj gamj bae ra vunz,

Dungx iek mbouj miz gwn,

Cam vunz hix saetlaex.

Bohmeh dai bae laj,

Lumj duzbyaj daeuj bag,

Daej fuz fa fuz fag,

Youq gaklaenz lele.

Bohmeh dai bae liux,

Bouxlawz yiuq daengz raeuz,

Ngeix lai gik simdaeuz,

Mbouj nyienh youq lajdeih.

Ok baenzneix doxbae,

Ra bouxlawz daeuj goq,

Ranz caiq hoj cix hoj,

Miz giz ndoj hix baenz.

Ok baenzneix doxbae,

Bouxlawz daeuj ciengx mingh.

Bohmeh moek gwnz lingq,

Mbouj rox dingq rox hoiz.

Mwh bohmeh ndang ndei,

Gou lijmeiz(miz) ngoenz angq,

Bohmeh dai roengz namh,

Gij angq youq gizlawz?

Mehmbwn a mehmbwn,

Guh vunz mbouj baenz ciuh,

Lix hix da hojyiuq,

Mbouj baenz ciuh baenzlawz.

Gyanghwnz ninz mbouj ndaek,

Guh caeg hwnqdaeuj ndwn,

Ciuhneix mbouj doengz vunz,

Dai bae mbwn cix suenq.

Gyanghwnz ninz mbouj ndaek,

Haet haemh ngeix lailai,

Langh baenz cwz baenz vaiz,

Nyienh dai bae ciengx namh.

Dai cij ndaej lumz hoj,

Dai cij rox lumz haemz,

Dai bae youq lajyaem,

Ndaej gaem fwngz bohmeh.

Gwnzbiengz mbouj miz daengq,

Naengh mbouj miz giz ing,

Boux vunz dog yingying,

Daej da nding da gawh.

Mbouj gwn dungx hix iek,

Gwn dungx cieglinlin,

Gwn haeux lumj gwn rin,

Sim in lumj mid heh.

Sam ngoenz cij gwn naed,

Caet ngoenz cij gwn can,

Youq mbouj onj mbouj an,

Dai fanz hoz mbouj goenq.

Mehmbwn vaiq daeuj sou,

Gou yaek bae lajdeih,

Gou dai bae lumz heiq,

Fanh seiq mbouj dauqlaeng.(9)