Sai:

Gou cam mwngz biujmoq,

Byaij loh bae lawz ma,

Mienhmauh mwngz mbouj ca,

Mwngz baenzgya rox nauq.

Mbwk:

Gou ndaej samcib bi,

Lij gwn youq ranzmeh,

Ciuhvunz baenzlai geq,

Caeuq bohmeh doengz gwn.

Sai:

Lijiq mwngz cix haq,

Gangj vahgyaj yaeuh gou,

Goeng mwngz biz lumj mou,

Mwngz laih gou mbouj rox.

Mbwk:

Bouxde biz lumj mou,

Dwg go gou ndaw mbanj,

Lau mwngz mbouj daihdamj,

Mbouj gamj daeuj lienh raeuz.

Sai:

Boux miz ngaenz miz cienz,

Mwngz cij senj caemh mbanj,

Gou hoj gya caiq gyanq,

Miz damj hix nanz caemz.

Mbwk:

Boux fatcaiz baenz meiz(miz),

Mbouj dwg seiz ndeu fat,

Ndaem ciengx mbouj gonqgat,

Vunz yaek fat mbouj nanz.

Sai:

Youzlangh baenzneix hung,

Mbouj bungz youx saek dangq(baez),

Lajdeih baenzlai gvangq,

Nanz ndaej gangj caensim.

Mbwk:

Guh hong reih hong naz,

Rox ngoenz maz ndaej vangq,

Cib monz gou cungj dangq(guh),

Mbouj ndaej vangq daeuj youz.

Sai:

Gwn saek duix aemjdaeq,

Raeq baenzlai guh maz,

Ngoenzcog baez laepda,

Ma hix mbouj haeuj neb(henz).

Mbwk:

Mbouj raeq reih raeq naz,

Gwn gijmaz le go,

Gij mwngz caen mbouj rox,

Luenh gyoj yienghneix vah.

Sai:

Guh hong mbouj yietnaiq,

Haujlai vunz ce mingh,

Gou naeuz mwngz mbouj dingq,

Lau yienqmingh saek ngoenz.

Mbwk:

Dang it boux noengzmaenz,

Caen sinhoj dahraix,

Haet haemh cungj deng vaij,

Gwn imq caiq okdou.

Sai:

Mwngz ngeix goeng ngeix gvan,

Dou ranz mbouj gamj ok,

Mbouj gangj youq baihrog,

Ok haw mbouj raen ngaeuz,

Mbwk:

Guh hong reih hong naz,

Mbwn mazsaj(romh) cix ganq,

Gwnz ndang hoij rim hanh,

Ganq lumj feiz remj din.

Sai:

Mwngz ndiep goeng ndiep gvan,

Youq ranz din mbouj sangj,

Bakbak naeuz mbouj vangq(hoengq),

Gvanbaz gangj mbouj dingz.

Mbwk:

Guh hong reih hong naz,

Mbwn mazsaj(romh) bae doengh,

Ngoenzhaw caeuq ngoenzhoengq,

Ndwn ndawdoengh linlin.

Sai:

Guh hoj lai maz mwngz,

Yaek gwn geijlai gvangq,

Ngoenzcog bingh mbouj sangj(doengh),

Yienqdanq vunz mbouj raen.

Mbwk:

Mbouj guh cix mbouj ndaej,

Saedceij bae yanyan,

Lij coz raeuz aeu ganq,

Bang bohmeh canh(conz) ngaenz.

Hab:

Dou daengq gyoengq vunzdoih,

Lij noix aeu gaenxhong,

Naemj mbouj daenj buhfong,

Gaenxhong cij fatcaiz.

Hab:

Dou naeuz gyoengq vunzlai,

Saimbwk cungj aeu gaenx,

Naemj lai miz gwndaenj,

Gaenx guh cij vuenyungz.