Youq ndaw Vahcuengh, lauxgeng youh heuh guh lauxdoengz, “guhgeng” roxnaeuz “guhdoengz” couhdwg song boux roxnaeuz geij boux doih doxndei caemh bi seng de nyinh guh beixnuengx. Boh gou lij youq seiz, caeuq haujlai vunz guhdoengz, gyoengq lauxdoengz de miz Bouxgun hix miz siujsoq minzcuz. Daxboh caeuq gyoengq lauxdoengz de doxndei doxgyaez, ciengzseiz doxcoengh.

Daxboh ciengzseiz caeuq dou gangj daengz boux lauxdoengz daih- it de nyinh haenx. Seizhaenx dwg ngeihcib sigij roekcib nienzdaih cogeiz, daxboh gauj hwnj aen cunghyoz ndawyienh. Bande daj ndawranz daengz ndawyienh lij caengz doeng goengloh, conj deng byaij aeu, daxboh yaek gaen maxbang byaij song ngoenz buenq coh ndaej daengz ndawyienh, yienghhaenx couh miz song haemh yaek youq rog gvaq hwnz. Ndei couh ndei youq mbangj aen mbanj henz roen lainoix cungj miz gij doengzhag daxboh, sojlaiz gaugau baehag doegsaw caeuq cuengqgyaj maranz, de cungj mbouj heiq mbouj miz dieg gwnyouq. Boh gou caeuq boux doengzhag ndeu doxndei raixcaix, bouxde dwg Bouxgun, song boux neix youq duenh ndwenngoenz doegsaw dwgrengz de couh doxndei lumj beixnuengx nei. Songde caemh bi caemh ndwen seng, gaenlaeng le daxboh couh caeuq boux doengzhag neix guhdoengz, song beixnuengx gamjcingz maenh gvaq diet bae lo. Yienghneix, aen ranz lauxdoengz couh baenz diegyouq mbouj bae ngaenz daxboh lo. Ciuq daxboh lwnh, bohdoengz mehdoengz doiq de gig ndei, baezbaez bae laeng ranz, gyoengqde cungj aeu doxgaiq ceiq ndei、cawj byaek ndei daih de, beijgangj nohlab、gyaeqgaeq doengh cungj bingzseiz gyoengqde mbouj sij gwn haenx. Bibi mehdoengz Bouxgun cungj guh doiq haizbaengz ndeu hawj daxboh, gouh haiz de buenx daxboh byaij gvaq goengq dem goengq bya sang, dangh gvaq diuz dem diuz dah gvangq, hawj daxboh engq miz rengz byaij roen, hix hawj daxboh rox gij caencingz vunz caeuq vunz. Boh gou caeuq boux lauxdoengz neix guhdoih bae doegsaw, youq ndawhag cix ninz cungj mbonqdiet song caengz de, boux ndeu ninz mbonq gwnz, boux ndeu ninz mbonq laj, gaiq buh songde caemh ciengzseiz doxvuenh daenj. Gyoengqde gij saeh angqguh de doxdoengz, sojlaiz songde sim doxlienz doxnem, doengzcaez yied yamq yied gyae.

Daxboh ciengzseiz naeuz, gyauyoux couh yaek gyausim, couh yaek doxcoengh, langh mwngz ciengzseiz bae coengh bouxwnq, baengzyoux couh gag daeuj lo, roen hix yied byaij yied gvangq lo. Daxboh yienghneix naeuz, caemh dwg yienghneix guh. Ngeihcib sigij caetcib nienzdaih, ranghdieg Yinznamz diep ranzcoj dou miz haujlai mbanj reih naz rengx liux, mbangj aen mbanj rengx lai le soucingz mbouj ndei, vunzlai deng iek. Mbanj dou youq duenh baihlaj diuz dah, doenghgij reih naz mbouj deng rengx baenzlai, haeuxliengz yienznaeuz soucingz noix di ndeu, hoeng lij gaeuq gwn. Haujlai vunz Yinznamz aenvih caivueng louz mbanj banh biengz, daeuj daengz ndawmbanj dou, vunzmbanj dou simndei, raen vunz Yinznamz deuz- nanh daeuj couh bang gyoengqde. Hoeng bande baengh goengfaen gwnhaeux, doenghgij haeuxliengz vunzmbanj faen ndaej de cawzliux gaeuq bonjfaenh gwn, gaiq lw de gaenq gig noix lo, ndawsim siengj coengh mbouj gvaq bonjfaenh goengrengz mbouj gaeuq a. Boh gou yawj raen le, ndawhoz hix gip raixcaix. Yienznaeuz Guengjsae caeuq Yinznamz dwg song aen swngj(gih), hoeng baenzlawz gangj conj dwg caemh diuz dah ndeu gwnraemx, cungj cingz caemhrag caemhcoj caemhgoek neix engqgya hawj daxboh siengj coengh gyoengqde lo. Daxboh dwg boux ganbu daihdoih, de gietdingh haicang fat haeux, faen gij haeux lw ndawdoih hawj gyoengq vunz Yinznamz daeuj ra gwn de. Haujlai vunz ndaej haeux gouqmingh le cungj daej dwk gyo’mbaiq, mbangj boux lij gvih roengz namh docih bae. Baezbaez raen yiengh- neix, daxboh cungj nai caeuq gujli gyoengqde, daengq gyoengqde doxcaez dingj roengzbae couh miz maqmuengh lo. Gyoengq vunzmbanj cungj nyinhnaeuz daxboh guh ndaej deng、guh ndaej ndei, yienghneix daxboh caemh okmingz liux, haujlai lauxdoengz daxboh aenvih boh gou cungj singqheiq neix nyienh caeuq de guh lauxdoengz. Daengz banneix le, caenh dou daengz baih Yinznamz dep henzmbanj dou bae, mbatmbat naeuz bonjfaenh dwg duh lwg bouxlawz, doengh bouxgeq cungj dwen naeuz boh gou gaxgonq guh gvaq gij saeh ndei neix, naeuz byawz caeuq byawz dwg lauxdoengz daxboh, caiq naeuz bi lawz ndwen lawz gyoengqde lij bae gvaq ranz dou. Gyoengqde gangj gij saeh neix lumj ngoenzlwenz ngamq bae laeng gou ma gvaq neix, gou dingq sat gamjdoengh dangqmaz.

Miz hoj couh raen caencingz. Ban boh gou bingh seiz, gyoengq lauxdoengz de mbouj dwg daeuj yawj de, couhdwg aeu ngaenz hawj daxboh bae yw bingh. Miz boux lauxdoengz ndeu bonjfaenh ndaej ngaenzhong noix, hoeng de fat ngaenzhong le lij aeu sambak maenz ngaenz okdaeuj hawj boh gou bae yw bingh. Geij bi gonq, gou roebraen de, siengj aeu ngaenz boiz de, de baenzlawz cungj mbouj aeu. Daxboh bae seiz, miz boux lauxdoengz ndeu lij gaj mou daeuj caeqbaiq, gij vah- diuqniemh de sij ok songde geijlai doxndei doxcoengh, caiq sij daxboh bae le de geijlai sim’in caeuq doeknaiq.

Daxboh gvaqbae miz ngeihcib bet bi lo, hoeng de caeuq gyoengq lauxdoengz de doxndei doxcoengh mboujcaih youq daih duh de, gij cingzngeih gyoengqde lumj raemx- dah raezrangrang、bongh baenaj mbouj rox gak, itloh lae daengz daih dou daeuj. Haujlai bi gax- gonq, gou bae Yinznamz Vwnzsanh, gvaq yienhsingz Funingz seiz, daeg- eiq bae yawj boux bohdoengz guh gingjcaz ndeu, yienznaeuz daxboh dajsienq cix mbouj youq lo, hoeng boux bohdoengz de cungjlij dawz gou dangguh lwgdoengz, caiq hawj gyoengq lwg de caeuq gou doxnyinh. Haemh de, dou caemhdaiz gwn haeuxcaeuz, gij laeuj de cenj dem cenj gwn roengzbae liux, bohdoengz miz di fiz ndeu, de youq henzdaiz gangj le haujlai saeh doenghbaez de caeuq daxboh hawj dou nyi. Mwh gangjgoj, gou raen ndawda de raemxda aengq dwk, couh yaek loenq lo. Bohdoengz ngoemj ndang roengzdaeuj aeu genbuh menhmenh uet raemxda, cang guh angq riu, daengq dou naeuz, daih vunz de gaenq doxrux byaij gvaqdaeuj lo, daih laeng sou itdingh aeu fwngz yien fwngz doxcaeuq doxcoengh byaij gvaq gij rumzrumz fwnfwn baihnaj…… Gaenlaeng bohdoengz yaengx cenjlaeuj hwnjdaeuj, doenghcingz naeuz:“Haujlai sim- muengh cungj youq cenj laeuj neix la, sou bonjfaenh gag menhmenh bae cimz lo, daeuj, gyoengq lwgnyez, ndumqndak cenj laeuj neix!”

Gij laeujhau dwg laeuj Yinz- namz Funingz, dohsoq gig sang, geij cenj roengz dungx, hawj gou lwed hwngq bae, aen ndang aen sim gou raeujruprup. Gou gag ngeiz, banneix daxboh youq gwnzmbwn caemh aiq angq dangqmaz ba.