Daxmeh gou okhaq seiz, goengda heuh boux canghfaex ndaw mbanj doq aen habroi ndeu hawj de buenxndang okhaq.

Aen habroi neix raez ngeihcib goengfaen, gvangq caeuq laeg cungjdwg cib goengfaen, aeu benj gofog daeuj guh baenz, benj gofog mbaeu, mbouj gaujngiengz(bienqyiengh) youh mbouj miz duzmoed dwk.

Daxmeh okhaq ngoenzhaenx, goengda heuh goengnax daeuj, dawz fag roi ndeu、aen gingqiq ndeu、fag cim ndeu、aen loekmae ndeu、diuz cimngaenz ndeu cuengq youq ndaw habroi, aeu baengznding dawz habroi suek ndei le coq roengz aen daeh’aemq he bae, daxmeh roengz- lae(okdou) seiz, hawj ndawgya boux lwgnyez ndeu aemq aen habroi caeuq daxmeh guhdoih daeuj ranzgvan.

Daj ciuhlaux roengzdaeuj, dieg dou mbouj- lwnh ranz gungzhoj roxnaeuz ranz fouqmiz, lwgmbwk okhaq lailai noixnoix cungj aeu bwh miz di doxgaiq he buenxhaq. Daxmeh okhaq seiz, gij doxgaiq buenxde okhaq couh miz: Song aen gvihfaex、 song aen siengfaex、 aen daiz- faex ndeu、 aen daiz gwnhaeux ndeu caeuq seiq aen daengqmienh(daengqraez), lijmiz song fan denz、song fan riep、cib geij doiq haizbaengz dem.

Gij doxgaiq neix heuh bouxgya bouxhoh daeuj dawz bae, doxgaiq hab ram couh song boux doxram, hab gwed couh boux ndeu gag gwed, hab aemq couh boux ndeu aemq. Boux dawz gij doxgaiq neix cungj ndaej di ngaenz sinhoj ndeu, lumj song boux ram gvih couh ndaej boux haj gak ngaenz, boux gwed congz couh ndaej maenz ngaenz he, seizhaenx boux aemq habroi couh ndaej song gak ngaenz.

Doxgaiq dawz daengz ranzgvan, couh caih ranzgvan baenzlawz sawjyungh cungj ndaej, cijmiz aen habroi bouxwnq mbouj ndaej yungh.

Daxmeh dawz aen habroi cuengq youq gyaeujninz, haethaemh ndaej hoengq couh dawz gij doxgaiq ndaw habroi okdaeuj yungh. Aen gingqiq aeu daeuj yawj ngaeuz, aen roi aeu daeuj roigyaeuj, fag cim aeu daeuj nyib buhvaq, saenj ngaenz aeu daeuj cab byoem. Gij doxgaiq neix yienghyiengh miz yungh, hoeng ceiq miz yungh couh dwg saenj ngaenz cab byoem haenx, saenj ngaenz neix dwg bauj, dwg yw.

Doenghbaez vunz gyaeujngunh daraiz, nohndat fatae, daxmeh couh dumq aen gyaeq- gaeq ndeu, dawz gyaeqhau bok okdaeuj, cuengq daengz gwnz baengzriep bae, dawz saenj ngaenz con daengz gyang gyaeqhau, suek ndei, swnh gyaeqhau lij ndat, yaengyaeng youq gwnz najbyak, gwnz bakaek, gwnzmbaq caeuq baihlaeng bouxbingh cat bae cat dauq, cat daengz gyaeqhau soiq bae. Yienghneix baez guh bouxbingh couh ndei lo. Ndigah, saenj ngaenz neix dwg gienh doxgaiq mehmbwk okhaq noix mbouj ndaej ndeu. Daengz seiz seng lwg baenzgya, cungj miz baez he yungh daengz.

Haq bae ranzvunz, hongrap hongfwngz cungj mbouj noix, daxmeh ciemhciemh noix yungh daengz aen habroi, hoeng roekcib lai bi gvaqbae, gij doxgaiq buenx daxmeh okhaq haenx caeux couh coq gvaq gizlawz bae liux lo, gienh he cungj ra mbouj raen ngaeuz gvaq, cijmiz aen habroi neix, itcig cuengq youq gyaeujninz daxmeh, de baenzlawz hix mbouj hawj vunz vut bae.

Daxmeh dwg ngeihcib sigij roekcib nienz- daih okhaq, seizhaenx baengh goengfaen gwn- haeux. Goengfaen, couh dwg ngoenz bae guh- hong ndaej geijlai faen goengfaen, dingqgangj seizhaenx bouxgeq ngoenz hong ndeu ndaej cibngeih faen goengfaen, lwgnyez ngoenz ndaej roek faen goengfaen. Ranzranz miz bonj bouh’iq geiq goengfaen ndeu, ndaw doih baij miz song daengz sam boux bau geiq goengfaen. Gyoengqvunz banngoenz okbae guhhong, ban- haemh doxcomz daengz ranz ndaw doih bae geiq goengfaen.

Daxmeh seng gou le, daxgoeng couh faengya, hawj ranz gou gag youq gag gwn. Daxmeh gek song bi couh seng boux lwg ndeu, cib bi ndawde, de seng、ciengx dou haj beixnuengx, yienznaeuz yienghneix, daxmeh bi daengz haemh hix mbouj noix geijlai ngoenz mbouj bae guhhong, ndaw ranz couh daxmeh caeuq daxboh song boux vunz guhhong aeu goengfaen, ciengx swhgeij youh ciengx haj boux lwg, goengfaen couh dwg ngaenz, goengfaen couh dwg mingh, daxmeh dawz bonj saw geiq goengfaen yo daengz ndaw habroi bae, it ngoenz it yawj, it ngoenz it suenq, hoeng mboujguenj baenzlawz yawj, baenzlawz suenq, bi daengz haemh goengfaen hix lai mbouj gvaq doengh- boux.

Gaen goengfaen gwnhaeux, couh dwg goengfaen geijlai couh faen ndaej geijlai haeux, goengfaen ndaej noix, faen haeux couh ndaej noix, ndaw ranz vunz lai goengfaen noix, mbouj miz haeuxgwn baenzlawz guh, yienghneix couh deng okngaenz gyau hawj ndaw doih cij ndaej lingx haeux. Goengfaen caeuq lingx haeux doxca lai, ranz dou bibi deng gyau ngaenz, seizhaenx mbouj miz souhaeuj, ranz gou bienqbaenz bibi yiemq ngaenz ndaw doih.

Couh yienghneix, daj faengya gag gwn hwnj, ndaw habroi daxmeh moix bi couh lai miz mbawdan yiemq ngaenz ndeu.

Faen reihnaz daengz ranz, gag boux gag raeq, ranz gou faen ndaej haj moux reihnaz、duz cwzdaeg ndeu caeuq song duz yiengzmeh. Daxboh daxmeh angq ndaej haemz mbouj ndaej ngoenzhwnz cungj daengz ndaw reih bae guhhong, ganq gij reih ndaw doih faen ndaej haenx, gyoengqde youh hwnj bya bae haifwz, cijaeu miz namh gyoengqde couh ndaem doenghgo, song bi gvaq bae, ranz gou haeux gaeuq gwn lij lw dihe dem, mizseiz daxmeh dawz haeux bae haw gai aeu ngaenz cawx di noh byaek, mizseiz daxboh dawz haeux bae ngauzlaeuj gwn, gyonj daeuj gangj, ndaw ranz miz haeux le, naemj baenzlawz guh couh baenzde guh. Seizhaenx ndaw ranz lij ndaej ciengx saek duzmou gaj gvaqcieng dem.

“Bouxndei cix dai, boux ngajnyai cix lix.” Coenz vah bouxgeq neix caen mbouj loeng, caengz gvaq ndaej geijlai ngoenzndei, daxboh gou couh baenzbingh dai bae lo, bihaenx daxmeh ngamq ndaej seiqcib ngeih bi.

Gak ranz gak cae reih raeq naz, gak boux gak ndaem haeux ndaem duh, hix dwg gak ranz gak hawj guekgya gyau haeuxliengz (goengliengz). Bi daengz seizsou, vunzmbanj couh gibseiz dawz haeux dak sauj, gibseiz dawz haeuxliengz bae gyau.

Ranz gou bi deng gyau bak lingz geij gaen haeuxliengz, bi daih’it gyau haeuxliengz seiz gou cibhaj bi, daxmeh rap bak gaen mbouj ndaej, deng song boux rap bae, daengz ngoenz bae gyau haeuxliengz, gou couh rap samcib lai gaen, daxmeh rap caetcib lai gaen.

Gyau haeuxliengz aeu dawz daengz gwnzhaw bae, mbanj gou liz gwnzhaw cib lai goengleix, seizhaenx mbouj doeng goengloh, mbouj miz ci hwnjroengz, aeu byaijdin song aen lai cung cij ndaej daengz haw. Daengz seiz gyau haeuxliengz, ndaw mbanj couh miz geij boux roxnaeuz cib geij boux doxhanh guhdoih dawz haeux bae gyau.

Bi daih’it bae gyau haeuxliengz ngoenz- haenx, dou mehlwg caeuxcaeux couh hwnq- daeuj, cang haeux roengz daeh couh caeuq vunzlai guhdoih okdou, caet bet nyied mbwn- heiq ndit ndat lumj feiz, dawz rap byaij youq gwnz roen, bouxboux hanh rih hanh roenx. Lij ndei, vunzlai guhdoih byaij, miz gangj miz riu, banngaiz gvaq le couh daengz haw lo.

Giz dieg gyau haeuxliengz vunz ndaet- nywdnywd, boux daeuj gyau haeuxliengz baiz baenz geij hangz raezrwgrwg, dou cuengq rap haeux roengzdaeuj baizdoih, baez di baez di yaengyaeng coh giz caengh haeux gyaenh bae.

Seizneix daengngoenz cingq dingjgyaeuj, ndat lumj yaek remj vunz nei, bakdou giz caengh haeux cuengq miz aen doengj raemx ndeu, ndaw doengj miz raemxgoenj hawj vunzlai gej hozhawq, miz daxmeh baizdoih, gou nanz mbouj nanz couh bae daek raemx hawj daxmeh gej hozhawq, mizseiz hix daek hawj vunzmbanj dem, soengq hawj boux neix youh soengq hawj boux haenx, nyaengqdidi. Aen daengngoenz gwnzgyaeuj coh baihsae ngeng di seiz cij ndaej daengz dou caengh haeuxliengz.

（caengz sat）