Siz Ginbingz Youq Mwh Cunghgung Cunghyangh Cwngcigiz Baez Daihgouj Cizdij Hagsib Daegbied Gangj Daengz

Hawj Vunz Seizseiz Laemxsim Nyinh Cunghvaz Minzcuz Ranz Vunz Ndeu

Coihawj Gij Hong Minzcuz Dangj Raeuz Seizdaih Moq Hwngfat Ndei Saed

Sinhvazse Baekging 10 nyied 28 hauh dienh Cunghgung Cungh- yangh Cwngcigiz 10 nyied 27 hauh lajbyonghngoenz guh baez daihgouj cizdij hagsib cienmonz hag hawj vunz seizseiz laemxsim nyinh Cunghvaz Minzcuz ranz vunz ndeu. Cunghgung Cunghyangh cungjsuhgi Siz Ginbingz youq mwh cujciz hagsib cix daegbied gangj daengz, hawj vunz seizseiz laemxsim nyinh Cunghvaz Minzcuz ranz vunz ndeu, couh dwg yaek dazyinx gak cuz yinzminz laebmaenh aen leixniemh ranz ndeu fuk hux doxcaemh、ndei yak doxcaemh、dai lix doxcaemh、minghyinh doxcaemh. Cienzmienh gvancez gij baijbouh Ngeihcib Daih Dangj raeuz, cinj- deng bae gaemdawz gij daegdiemj mboengq moq gvendaengz hong minzcuz Dangj raeuz, aeu hawj vunz seizseiz laemxsim nyinh Cunghvaz Minzcuz ranz vunz ndeu guh diuz sienqmeh hong minzcuz Dangj raeuz caeuq gak gaiq hong dieg minzcuz, mboujduenh gyarengz caeuq gaijndei gij hong minzcuz Dangj raeuz, netsaed coihawj saehnieb gak cuz caezhoz baenaj, coihawj gij hong minzcuz Dangj raeuz seizdaih moq hwngfat ndei saed.

Cunghgoz Sevei Gohyozyen Minzcuzyoz Caeuq Yinzleiyoz Yenz- giusoj sojcangj Vangz Yenzcungh gangjgej le aen vwndiz neix, daezok gij genyi guhhong. Gyoengq dungzci Cunghyangh Cwngcigiz nyinhcaen dingqaeu gangjgej, caemhcaiq guh daujlun.

Siz Ginbingz daegbied gangj daengz, Ngeihcib Daih Dangj raeuz gvaqlaeng, daengx guek gak cuz yinzminz yamq hwnj diuz roen moq baengh yiengh yendaiva Cungguek bae cienzmienh doinyoengx hongsaeh hungmbwk hwnqguh guekak、 fukhwng minzcuz, gij hong minzcuz Dangj raeuz bungzdaengz hingzseiq caeuq yinvu moq. Cienzmienh hwnqbaenz aen guekak sevei cujyi yendaiva, aen minzcuz lawz cungj mbouj ndaej noix. Raeuz yaek haenqrengz coihawj gak minzcuz doengzdoih caezhoz buek- guh, gietcomz gij rengz hungdaih bae hwnqguh guekak、fukhwng minzcuz; yaek cienzmienh guhdaengz gak minzcuz doengzcaez mwnhoengh hwngfat, hawj gak cuz yinzminz baengh hwnqguh guekak、fukhwng minzcuz cix doengzcaez raen najrongh lwenqda hungmbwk.

Siz Ginbingz vixok, yaek coihawj gak minzcuz lailai doxcunz doxhag doxgyaux, baengh Cunghvaz Minzcuz daih doxgiet coicaenh yiengh yendaiva Cungguek. Hwnqguh guekak、fukhwng minzcuz guh baenaj, bietdingh dwg gak minzcuz lailai doxcunz doxhag doxgyaux guh baenaj, bietdingh dwg gak minzcuz doengzdoih caezhoz buek- guh、doengzcaez mwnhoengh hwngfat guh baenaj. Itdingh yaengx sang fan geiz Cunghvaz Minzcuz daih doxgiet, aeu doidoengh gak minzcuz vih cienzmienh hwnqguh aen guekgya sevei cujyi yendaiva bae doengzcaez buekguh, dangqguh aen yinvu youq- gaenj gij hong minzcuz Dangj raeuz youq gwnz roen moq.

Siz Ginbingz daegbied gangj daengz, yaek gangj ndei gij gojgaeq Cunghvaz Minzcuz, haenqrengz lwnh doh vunzlai rox nyinh Cunghvaz Minzcuz ranz vunz ndeu. Yaek haenqrengz lwnh doh vunzlai rox gij lizsij Cunghvaz Minzcuz, haenqrengz lwnh doh vunzlai rox gij lijlun Cunghvaz Minzcuz ranz vunz ndeu, haenqrengz lwnh doh vunzlai rox Dangj raeuz youq seizdaih moq guh hong minzcuz aeundaej yiengh cwngzciu hab geiq haeuj lizsij, haenqrengz lwnh doh vunzlai rox Cunghvaz Minzcuz caeuq seiqgyaiq gak guek yinzminz yienfwngz cauhlaeb aen minghyinh caezcaemh vunz lajmbwn coglaeng gyaeundei.

（youq《Yinzminz Yizbau》genj aeu mbangj daeuj hoiz）