Vunz Mbanjsulingj cungj maij heuh de guh Goengsam, Goengsam miz sam daeg lwg.

Yahsam gvaqseiq bi haenx, lwglaux Naij Cinh cibsam bi, lwgngeih Naij San cib’it bi, lwgsaeq Naij Meij ngamq bet bi. Vihliux faenh caencingz haenx, Yahsam gvaqseiq le, Goengsam itcig mbouj hawj gyoengq lwg ra mehlaeng, de youh dang boh youh dang meh, ciengx sam daeg lwg majhung baenzvunz.

Gyoengq lwg de aeuyah baenzgya gvaqlaeng cungj youq ndawmbanj youq. Lwglaux Naij Cinh youq gaiq reih baihdoeng ndanggaeuq hwnq ranzmoq, lwgngeih Naij San youq baihsae henzroen hwnqranz guh seng’eiq faexliuh, lwgsaeq Naij Meij cix youq baihnamz hwnq ranzmoq youq. Ranzgaeuq Goengsam youq cungqgyang mbanj, liz gij ranz sam daeg lwg de cungj mbouj gyae, byaij roen aiq caet bet faencung baenzneix. Sam daeg lwg daj ranzgaeuq senj ok daeuj liux, Goengsam couh boux dog dawz ranzgaeuq.

Sam daeg lwg Goengsam cungj hauqswnh dangqmaz, gaxgonq cungj ciep Goengsam bae ranzmoq ndanggaeuq caemhgwn caemhyouq. Goengsam cug ranz cungj gwnyouq le song ndwen, yienznaeuz bouxlwg、lwgbawx、lansai、lanmbwk cungj hauqswnh de, hoeng, nanz le de caenh gag roxnyinh youq mbouj gvenq. Lumjbaenz gwnhaeux, mizseiz caeux mizseiz laeng, gak ranz rung byaek feihdauh gak mbouj doxdoengz, gyanghaemh yawj densi caiq caeuq lwglan ciengj daiz yawj. Goengsam naeuz, swhgeij mbouj suenq laux geijlai, lij guh ndaej saek di hong dwgrengz, ranzgaeuq cix youq gvenq lo, boux vunz dog siengj gwn caeux couh cawj caeux, siengj gwn laeng couh cawj laeng, soemj、van、haemz、mwnh、hamz、cwt, swhgeij seizbienh cawj, yawj densi hix mbouj miz vunz daeuj nyaux. Yienghneix de couh dauq buen ma ranzgaeuq gag youq. Saedsaeh, ndawhoz Goengsam cingcuj, de dwg mbouj siengj gaujcauj gij saedceij ranz lwglan.

Ranzgaeuq Goengsam caeuq ranz Goengliuz、Yahliuz caenh gek faj ciengz ndeu, gyoengqde doengzban, Goengliuz raen lai rox lai, gyaez caeuq vunz gangjgoj raixcaix, mboujguenj dwg gwnz- mbwn lajdieg, roxnaeuz vwnzyoz denyingj, gij ciuhgeq、gij ciuhneix、gij Cungguek、gij rogguek, Goengliuz cungj gangj ndaej daengz. Goengsam baez ndaejhoengq couh ra Goengliuz dwk geizciengh, dingq de gangjboq, songde lumjbaenz gangj ndaej engq dawzbanj, vah hix engq lai. Mboujlumj youq ranz lwg, daeglwg caeuxcaeux okbae guhhong, mbwnlaep coh dauq, sam donq haeux yaep caeux yaep laeng, doxcomz gangjgoj gak boux gak gangj, mbouj doxhaeuj saek di.

Sam daeg lwg Goengsam raen daxboh mbouj nyienh caeuq gyoengqde gwn youq, raen Goengsam bouxdog gag youq ranzgaeuq caemh mbouj gangj gijmaz lo. Gyoengqde moix ndwen hawj Goengsam haeux caeuq di cienz gvaq ndwenngoenz, Goengsam gwndaenj cungj mbouj hoj you. Boux vunz de gaenxriri, swhgeij caiq gag ndaem byaek. Baezbaez gvaq cieng gvaq ciet sam daeg lwg cungj ciengj bae heuh Goengsam daeuj ranz ndanggaeuq caemh gvaq ciet, gij ndwen- ngoenz Goengsam gvaq ndaej lij suenq mizyinx.

Seizgan lumj raemx lae, geij bi gvaqbae lo, yaepyet youh daengz haemhndaep bineix lo.

Haemhndaep ngoenz haenx, ranzranz nyaengq gwnz nyaengq laj, guh haeuxcaeuz haemhndaep, sam daeg lwg Goengsam caemh nyaengqfoedfoed. Ngoenz de gwn gvaq haeuxngaiz, Goengsam ngon go bae ra Goengliuz dwk geiz, couh caj gyoengqlwg daeuj ranzgaeuq heuh de bae gwncaeuz gvaq haemhndaep lo.

Caeuq Goengliuz dwk ndaej geij buenz geiz, youh doxgyaiz le doengh gij saeh gvaq cieng, deq de roxnyinh couh daengz banngoenz lo. Lwg Goengliuz Yahliuz daeuj heuh songde bae gwn caeuz haemhndaep. Hoeng sam daeg lwg Goengsam mbouj miz saek boux daeuj.

Goengsam dauqma ranzgaeuq ndanggaeuq, caj gyoengq lwg daeuj heuh de gwn caeuz, hoeng caj bae caj dauq, mbwn cungj yaek laep lo, cungj mbouj miz saek boux daeuj ranzgaeuq heuh de. Goengsam aeunaj, lwg mbouj daeuj heuh, de youh mbouj nyienh gag bae ranz lwg. Yienghneix de couh gag dwkfeiz guh haeuxcaeuz. Hoeng fwx haeux haemhndaep neix de gwn dwk mbouj angq saek di, lumj deng vunz baeuh doengj raemxgyoet ndeu nei, daj gyaeuj nit daengz din.

“Bingzseiz gyoengq lwg ciengj dwk ciep gou bae gvaq cieng, bineix haemhndaep baenzyiengh loma?” Goengsam ndoet amq laeuj ndeu, yawjyawj duzsiengq mehyah venj youq bangxciengz haenx, ngawh le haujlai nanz cungj siengj mbouj doeng. “Ndaek gyoengq lwg neix, gvaq cieng daiq boh ndanggaeuq cungj lumz la? Gou mbouj caeuq gyoengqsou gwn youq, dwg gou loek loma?” Goengsam yied ngeix yied mbouj mingzbeg, yied siengj yied hozndat.

Ngoenz coit, lwgnyez Mbanjsulingj cungj hwnq caeux, cug ranz bae hawj banlaux baiqcieng, neix dwg ndawmbanj aen fungsug gvaq cieng daj mwhgonq cienz roengzdaeuj de. Ngoenzde lwgnyez ceiq angq lo, aenvih bae hoh lawz baiqcieng, hoh de cungj fat dangz caeuq mak hawj, lij hawj hoengzbau.

Lwg Naij Meij caeuq song dah lwg Naij San caez daeuj daengz ranz lungzlaux Naij Cinh baiqcieng, gyoengq lwglan yienzbonj muengh hawj Daxgoeng baiqcieng le caiq ndaej aeu hoengzbau, hoeng mbouj raen Goengsam youq neix, couh cam lungzlaux: “Goeng gou ne?”

Naij Cinh dauq cam daeglwg Naij Meij：“Goeng mbouj dwg youq ranz doh mwngz gvaq cieng ma?” Lwg Naij Cinh baenqgyaeuj lwklwk. Naij Cinh youh yawj haeuj song dahlwg Naij San bae, songde hix ngauzgyaeuj lwklwk.

Baenzneix Naij Cinh moengx liux, caemj- cangj bae haemq song daeg nuengx, baez cam coh rox, aenvih bingzseiz daihgya cungj ciengj bae ciep daxboh daeuj gvaq cieng, Naij Meij gujlaih Goengsam youq ranz Naij Cinh gwncaeuz, Naij Cinh gujlaih Goengsam youq ranz Naij San, Naij San gujlaih Goengsam youq ranz Naij Cinh, sam daeg lwg Goengsam cungj yienghneix siengj, ndigah couh mbouj bae ranzgaeuq ra Goengsam lo. Laizlawz Goengsam bouxdog youq ranzgaeuq gag gwncaeuz.

Rox gij saeh neix le, sam daeg lwg Goengsam muengzyatyat doxyiu dingh ndei caez ma ranzgaeuq.