Seizcou daeuj daengz, rumzliengz mbwn gvengq, dou bae daengz soujduh Baekging Denh- anhmwnz Gvangjcangz, sim’angq yangzyangz eu hwnj gij fwen Bouxcuengh raeuz, ciengq ok gij vuenyungz ndawsim dou lai bi yaek ciengq okdaeuj haenx, caen dwg sim hai sim sangj, angqyangz dangqmaz.

Ngoenzhaenx, gwn haeuxromh le, gou caeuq daeggo Suvuj caeuq beixsauj Cunhlanz doxyaeng, ngoenzneix mbouj bae diegwnq, cienmonz bae Denh’anhmwnz Gvangjcangz youzlangh baez ndeu, youq gizhaenx ciengqciengq gij fwen Bouxcuengh raeuz.

Denh’anhmwnz, dwg gij siengcingh guekcoj raeuz. 1949 nienz 10 nyied 1 hauh, Mauz cujsiz hwnj daengz gwnz laeuzsingz Denh’anhmwnz, yiengq daengx seiqgyaiq senhbu Cunghvaz Yinzminz Gunghozgoz laebbaenz. Aen Denh’anhmwnz hung- mbwk caeuq aen gvangjcangz hungmbwk gek gai doxmuengh, gyonjbaenz diuz sienq funggingj daegbied gyaeundei ronghlik ndeu. Denh’anhmwnz Gvangjcangz dwg aen dieg mbaw geizhoengz hajsing daih’it swnghwnj haenx, bae daengz Baekging, bouxlawz cungj siengj bae Denh’anhmwnz Gvangj- cangz yawjngonz funggingj, youq naj Denh’anh- mwnz ingjsiengq louzniemh. Dou bae ngoenzhaenx, dwg youq gozgingcez gaxgonq, Denh’anhmwnz Gvangjcangz caeux couh baij miz haujlai buenzva, va cingq angjhai, ndeiyawj raixcaix. Youq gwnz gvangjcangz, gyoengq bouxhek ndawguek rogguek, boux riengz boux haeujdaeuj, nauhyied dangqmaz. Youq seizneix bae daengz gvangjcangz youzyawj, caen mizyinx daegbied dahraix. Byaij youq gwnz gvangjcangz, yawjyawj aen Denh’anhmwnz hung- mbwk caeuq aen Baekging Yinzminz Daveidangz ngozfwd haenx, muenghyawj Yinzminz Yinghyungz Gijnenbeih, gyae’gyawj Mauz Cujsiz Gijnendangz caeuq Cungguek Guekgya Bozvuzgvanj, dou sim- angq yangzyangz. Youq dieggyang gvangjcangz, yawjraen gyoengq vunzhong cingq nyaengqfwdfwd hwnqguh aen dapva hung ndeu, gyoengqde dap gyaq hwnjdaeuj, baijbouh swxva, yaek ciepcoux laebguek 74 hopbi gozging daeujdaengz. Yawj daengz gijneix, dou daengx ndang raeujrub, roxnyinh lumjbaenz gij heiqfaenh gozgingcez caeux couh daeuj daengz lo, bouxboux ndawsim angqvauvau. Raen daengz gij cingzgingj dangqnaj, youh siengjhwnj gij ndwen- ngoenz gaxgonq, dou gag sim’angq mbouj dingz. Mboujguenj baenzlai lo, gou caeuq Suvuj ndwn youq gyang gvangjcangz, sim ndatfoedfoed, sikhaek fangjciuq Huz Sunghvaz ciengq gij 《Fwen Danq- haenh》haenx, bienqvuenh gij goswz haenx, couh youq gvangjcangz sing daemq ciengq hwnjdaeuj lo:

Daj namzguek daeuj daengz Denh’anhmwnz Gvangjcangz,

Sim’angq yangzyangz eu fwen hwnjdaeuj;

Angqciengq hungmbwk gungcanjdangj raeuz,

Youh hoh guekcoj hoenghhwd fouqgiengz.

从南疆来到天安门广场，

满怀激情把山歌唱；

歌唱伟大的共产党，

祝福祖国繁荣富强。

Dahraemxhoengz fanfoed yiengqcoh baihdoeng,

Vareux hai mboeng yiengqcoh daengngoenz;

Gak cuz beixnuengx riengz dangj byaij roen,

Moqnaj gij ndwenngoenz ndei fanhdaih.

奔腾的红水河向着东方，

木棉花开向着太阳；

各民族儿女紧跟党，

幸福的生活万年长。

Dou yied ciengq yied gikdoengh, yied ciengq yied mizyinx. Go Suvuj genyi naeuz, raeuz dwg vunz Bouxcuengh, daj Mbanjcuengh daeuj, wnggai yungh gij godiuh Vahcuengh raeuz daeuj biujdad gij swhsiengj gamjcingz raeuz, docih aen gungcanjdangj hungmbwk Cungguek raeuz, hohfuk aen guekcoj hungmbwk raeuz. Yienghneix songdou lumj henz mbouj miz vunz nei, sim’angq yangzyangz couh ciengq hwnj gij fwen Bouxcuengh daeuj.

Guh loq Cungguek caen ndei lai,

Gyo’angq seizdaih lingjhangzyinz(boux dawz- dox);

Ngoenzneix gyoengqcoiq daeuj daengz Ging,

Mbouj rox hai sing guhlawz angq(docih).

Dou cuengqsing angqciengq, lumj henz mbouj miz vunz nei. Ciengq ndaej cingq van seiz, boux guenj gvangjcangz haenx couh byaij gvaqdaeuj, dingq dou ciengq sat le, cix unqswnh cam: “Sou ciengq gij go neix, dwg yungh vah mbanjranz sou, dwg lwi?”

“Dwg ha.”

“Sou daj gizlawz daeuj?”

“Guengjsae.”

“Sou haxbaenh ciengq gij go haenx dwg yungh gij vah maz?”

“Vahcuengh.”

“Sou ndaej mbouj ndaej fanhoiz gij eiqsei hawj gou dingq?”

“Ndaej ha.”Gou sikhaek fanhoiz hawj de dingq lo. Ciep dwk, gou riu cam de: “Gij neiyungz neix miz vwndiz lwi?”

De riu naeuz: “Mbouj miz law.”

Doeklaeng de doiq dou naeuz: “Mbouj gvaq, daxau, gou caeuq sou naeuz, gvangjcangz guenjleix miz gvidingh, gyoengqvunz mbouj ndaej luenh youq gizneix ciengqgo bw.”

Gou miz di vueng, couh cam naeuz: “Aen gvangjcangz mbouj dwg giz dieg bouxminz ginzcung guh vwnzva yizloz hozdung ma, vihmaz mbouj ndaej ciengqgo ne?”

Boux de hoizdap naeuz:“Aen gvangjcangz neix, mbouj lumj gij vwnzva gvangjcangz gizwnq, gizneix miz gvidingh.”

“O! Doiq mbouj gvaq, dou mbouj rox. Dou boux vunzlaux bae daengz gvangjcangz gizlawz cungj yaek ciengqgo, gag guh gag angq, ciengq ok gij swhsiengj gamjcingz dou daeuj. Gizneix miz gvidingh, yienghneix couh ciuq gvidingh bae banh ba!”Dou caeuq de gangjgangj riuriu, bouxboux cungj aeu leix.

Boux gunghcoz yinzyenz haenx riunyumj boujcung naeuz: “Sou ndaej bae ndaw gunghyenz ciengq.”

Bae Denh’anhmwnz Gvangjcangz eu fwen, dwg gij simnyienh daengx ciuh vunz dou. Dou ngamq ciengq dwk mizyinx, couh heuh dou dingz, songdou miz di doeknaiq. Gvaq yaep ndeu le, dou couh cienj ndang bae daengz doiqnaj Baekging Yinzminz Daveidangz, youq gizhaenx dingzdingz yawjyawj, ingj geij mbaw siengq le, youh nyaenx mbouj ndaej caiq sing daemq di ciengq hwnjdaeuj lo.

Hwnzloq Cungguek gaiq bouxminz,

Lajmbanj ndawsingz siengj doxdoengz;

Vunzlai riengz dangj byaij diuzroen,

Raeuz dingh miz ngoenz baenz dahraix.

Baez neix, mbouj ok sing hung, mbouj angqwenj baenzlai, couh mbouj miz vunz daeuj naeuz dou lo. Dou eu liux youh eu haujlai hot fwen.

Siuq fuk Mancuengh hwnj Baekging,

Soengq hawj fukhwng boux yinxloh;

Bouxminz goengbuz vunz gyaezgyoh,

Gou ciengq diuzgo daeuj cienz cingz.

Daj Mbanjcuengh daengz Denh’anhmwnz,

Gyoengqraeuz sim mwn(angq) gyaez eu fwen;

Angqhoh guekcoj engq rongh swenz,

Byadah ciengxlwenx fanh bi cin.

Ciengq sat le, Dou doxyawj riu baez ndeu, sim- angq dwk gag gangjriu naeuz: “Ye! Raeuz daeuj daengz Denh’anhmwnz eu fwen gvaq lobo! Mbouj loek! Mbouj loek!”Gij saeh neix, bouxwnq yawj hwnjdaeuj, gojnaengz miz di ndei riu. Hoeng, dou mbouj guenj baenzlai. Gij simmuengh dou dwg, doenggvaq eu fwen daeuj biujdad gij gamjcingz duh dou, hawj vaiqlag caeuq vuenyungz lumj aen daengngoenz gyanghaet nei mbaekmbaek hwnj sang, hawj bingzan caeuq ndangcangq lumj daengngoenz ronghndwen nei caeuq raeuz moix boux vunz hwnzngoenz doxbuenx. Ngoenzneix, dou daeuj daengz Denh’anhmwnz Gvangjcangz eu fwen, yienznaeuz miz di “gag yaeuh cihgeij”, hoeng dou ndaej gag nai bonjfaenh, lajndang gag yaeuh cihgeij haisim, neix hix gig cungyau ha! Ndigah, dou bouxboux ndawsim angqyangz. Neix youq itdingh cingzdoh daeuj gangj, gij swhsiengj gingqgyaiq dou gig sang. “Mbouj deng fwj mbin goemq lwgda, Aenvih gou youq caengz ceiq sang.”Gangj vah lauxsaed, caeuq gij canghfwen wnq doxbeij hwnjdaeuj, dou suenq mingh ndei lai lo. Ndaej youq Denh’anhmwnz Gvangjcangz eu fwen, ciengq ok gij swhsiengj gamjcingz yo youq ndaw sim haenx, fanh bi mbouj bungz ha, baenzlawz mbouj sawj dou haisim angqyangz ne. Ngoenzhaenx, dou souhaeuj lailai, muenxcuk lailai. Neix dwg ciuhvunz dou ngoenz ceiq nanzlumz ndeu.

Dou sim’angq mbouj rox liux, byaijok Denh- anhmwnz Gvangjcangz le, youh bae daengz Cunghsanh Gunghyenz caeuq Gingjsanh Gunghyenz laebdaeb caiq eu fwen, hawj dou ndawsim angqlangh. Mbouj rox mbouj nyinh, mbwn fuengx lo, dou cij menhmenh lizhai gunghyenz. Dou boux guh fwen, gaenq miz aen sibgvenq “gyanghaet eu dwk daengngoenz hwnj, gyanghwnz eu daengz ronghndwen doek.”Youq gwnzroen dauqma diegyouq, ndaw gingsingz gaenq gizgiz daeng rongh caezcub, hoeng gij fwen dou lij eu caengz sat ne!

Ciuhvunz lumj bonj saw, geiqloeg ngoenzlwenz caeuq ngoenzneix. Ndwenngoenz lumj mbawveh, miuzveh liux guekcoj raeuz hojnanh ronghlwenq caeuq ngoenzndei daengzcog. Beijfwen caeuq sei, caemh lumj diuz roen raezrangh ndeu, danqhaenh liux gak cuz yinzminz doxgiet haenqguh gij cingzngeih naekna haenx. Dou dwg boux canghfwen ndawbiengz, yienznaeuz gij singfwen dou mbouj goksad rwenzswnh, hoeng dauq cix dwg gij sing goek sing nduj bouxminz, mbouj yungh saek yiengh gyagoeng. “Gwnzhaij hwnj ronghndwen, gyae’gyawj gungh ngoenzneix.”Gyoengqdou couh dwg yiengh- neix, youq gozgingcez gaxgonq ngoenz ndei ndeu, daeuj daengz aen dieg yiemzywd youh mbouj bingzciengz neix, ciengq ok gij fwen ndawsim, hohfuk guekcoj raeuz hoenghhwd fouqgiengz, hohfuk gak cuz bouxminz vuenyungz an’onj.

Haemhhaenx, gou loqfangzhwnz, loq raen gou youq Denh’anhmwnz Gvangjcangz yaengx hwnj aen boigim ndeu, angqciengq gij fwen Bouxcuengh……