Roennaj Gvangq Ndei Hwnjdin Moq——Daengx Lajmbwn Cimyawj

Caez Laeb “It Rangh It Loh” Ndei Saed Haeuj Mboengq Moq

10 nyied 18 hauh lajbyonghngoenz, Guekgya cujsiz Siz Ginbingz youq Yinzminz Daveidangz camgya aen yizsiz haimuq Gaiq Daihsam “It Rangh It Loh” Lai Guek Gapguh Gauhfungh Lundanz caemhcaiq yienjgangj《Hwnqguh Aen Seiqgyaiq Hailangh Bauyungz、Doxlienz Doxdoeng、Doengzcaez Hwngfat》, ngeuxyawj gij cingzciu 10 bi neix, cungjgez gij gingmienh baenzsaeh, lwnh vunzlai rox Cungguek aeu bet hangh hengzdoengh haeujcoengh caez laeb “it rangh it loh” ndei saed, vix dingh fuengyiengq moq“it rangh it loh”, guh’ok siengjmuengh moq, gyamiz rengznyoengx moq. Baez lundanz neix banh ndaej baenzndei, lumjseih youq gwnz gienj sawveh raezrang caez laeb “it rangh it loh” mai le mbat bit noengznwd ndeu, hix baenz le seiz dij geiq haeuj lizsij doinyoengx daengx seiqgyaiq hwngfat.

10 bi neix, caez laeb “it rangh it loh” mboujduenh guh haeujlaeg guh baenz caen, bu baenz diuz roen hung doxleih caemhhingz、mwnhoengh hwngfat. 10 bi neix, “it rangh it loh”cauhguh le aen bingzdaiz doxgap guhdoih hwngfat, okrengz coengh haujlai aen guekgya cingqcaih fazcanj haenx gyavaiq yamq bae coh yendaiva. 10 bi neix, caez laeb “it rangh it loh” dazhwnj vunz roengzcienz baenz fanh ik Meijyenz, ndaej guh 3000 lai aen hanghmoeg gapguh, vih doengh aen guekgya gapguh haenx cauh 42 fanh aen vihhong, hawj gyawj 4000 fanh vunz duetgungz. Cungguek caeuq doengh aen guekgya gapguh haenx ciep doiq canloz hwngfat, caemhyungh roenloh hwngfat, caemh veh dozsiengq moq hwngfat, yienfwngz byaij coh yendaiva.

Duenh banh lundanz neix, gak baih gungh guh baenz 458 hangh cwngzgoj, baudaengz《Aen Cawjcieng Baekging Gyalaeg Doxlienz Doxdoeng Doxgap》daengj doenghgij cawjcieng doxgap youqgaenj caeuq gij ndabaiz baenz cidu.

“Raeuz yaek miz rengzdingh caih maz gauxca sim cungj mbouj luenh, miz hoz dangrap doiq ndaej hwnj lizsij、yinzminz、seiqgyaiq, yienfwngz wngqdoiq gak cungj fungyiemj caeuq diuhcan daengx seiqgyaiq, cauh’ok coglaeng gyaeundei cixdwg huzbingz、hwngfat、doxgap、caemhhingz hawj daihlwg daihlan.”Siz Ginbingz gangj gij vah giendingh rengzrwd neix, vih raeuz baenzlawz doidoengh hongsaeh caez laeb“it rangh it loh”yamq onj bae gyae.

Yiengqcoh daengzcog, caez laeb“it rangh it loh”engq ndaej cauhmoq caeuq miz rengzdoengh, engq lai hailangh caeuq bauyungz, haigvangq hoenggan guhdoih hwngfat, gyalai rengznyoengx hungloet doinyoengx gak guek guh ndei saehnieb yendaiva, raiz ok bien faenzcieng moq cauhlaeb aen minghyinh caezcaemh vunz lajmbwn.

（bouxgicej Sinhvazse Hanz Liengz Cinz Sanh Suz Lieng）

（youq Sinhvazvangj genj aeu mbangj daeuj hoiz）