（ciep geiz gonq）De ngamq raemj ndaej dingz ndeu, Dingh Yenz couh dauqma lo. Dingh Yenz raen Vangz Gozbauj raemj go maklaeq bonjfaenh, doq bongh bae caeuq Vangz Gozbauj doxfwd. Caj Goengyangz ganj daengz seiz, Vangz Gozbauj deng duep dwk mbouj ndaej hwnq lo. Goengyangz huj dwk naj hoengz naj nding, fwngz de saeuj dwk yinx haeuj Dingh Yenz bae, naeuz: “Gou yaek hawj mwngz bae naengh lauz!” De cigsoh bauqgingj, gaenlaeng caiq heuh vunz ram Vangz Gozbauj bae yawj canghyw. Ngoenzde, Dingh Yenz couh deng gungh’anh gaemh bae lo, doeklaeng ngaiz buenq naengh sam bi lauz.

Daj bande bae, Goengyangz ngoenz- ngoenz cungj naemj yienghlawz gaij gij ngaekngeu lai bi neix. Gyanghwnz vunz conj ninz caem lo, de fonj bae fonj dauq baenzlawz cungj ninz mbouj ndaek, angqnaengz hwnjdaeuj cit ien. Seizde aen swiz daj gwnzcongz doek roengz namh daeuj, Goengyangz gaeuzhwet gip swiz, raen miz mbaw doz ndeu youq baihnaj de. Mbaw doz neix dwg bi’gvaq Goengyangz guh bouxdaibyauj bae ndaw- cunh haihoih, ndawcunh fat hawj, aeu ma le de couh itcig cuengq youq laj swiz. De sijsaeq yawj mbaw doz, dwg mbaw veh lwnh faplwd. Yawj sat le de doq bongx ndaek gagoek bonjfaenh, ngoenz daih- ngeih couh gipgip muengzmuengz bae swhfazsoj lo.

Luz Lungz dwg boux sojcangj swh- fazsoj, de raix cenj caz ndat ndeu hawj Goengyangz gonq. Goengyangz couh dawz gij simsaeh lai bi neix naeuz hawj de nyi, muengh de ndaej bae Mbanj- yauhcingh son’gyauq senhconz faplwd, gaij gij aen’ienq caeuq ngaekngeu lai bi neix.

Luz sojcangj gietdingh youq aen singhgiz gaxlaeng bae Mbanjyauhcingh son’gyauq senhconz faplwd. Swhfazsoj ndawcin sauhgonq ngamq daeuj daeg- mbauq lienhguh ndeu, heuhguh Suh Lieng, boux hauxseng neix ngamq daj Gvangjsih Cwngfaz Yozyen bizyez. Luz sojcangj dajsuenq hawj Suh Lieng gaen bae, hag engq lai doxgaiq.

Goengyangz da baez gyaep Suh Lieng, naeuz: “Gou yawj mwngz najsug, lumjnaeuz raen mwngz gvaq.”

Suh Lieng hannaeuz: “Gou dwg vunz Mbanjbingzmanz, gou roxnaj Goengyangz mwngz bw.”

“O, mwngz couhdwg daeglwg Suh Sanh ma? Cungj baenzlai hung la?”

“Dwg ha, dwg ha.” Suh Lieng han sohsangh.

Goengyangz rag aekbuh Luz sojcangj ok rogdou bae naeuz:“Luz sojcangj a, daegmbauq neix dwg vunz Mbanj- bingzmanz ne, de caemh bae, mbouj daiq hab ba? Raeuz baenzlawz yienghneix ien’gya roen gaeb ne!”

Luz sojcangj riu dwk han: “Yienznaeuz de dwg vunz Mbanj- bingzmanz, hoeng de mbouj miz yawjmbieng ne, mbouj dwg bae senhconz faplwd ma, mwngz cuengqsim la!”

Dieg hwnjdangz couh nda youq ndawranz Goengyangz. Dahlwg Goeng- yangz heuhguh Yangz Fanz, de roxnaeuz ngoenzcog ndawcin daeuj hai dangzgoq senhconz faplwd, de dajsenq cix sauq ranz baet daengq, bonjfaenh caemh dajcang dwk youh gyaeu youh sau.

Suh Lieng hwnj dangzgoq senhconz faplwd sat haemh daihsam de, Yangz Fanz caegcaeg doiq de naeuz: “Gou soengq mwngz roengz bya bae.” Suh Lieng caemh haengj hawj Yangz fanz soengq de, song- de  boux byaij gonq boux byaij laeng, byaij baenz song aen lai cungdaeuz.

Couh yienghneix, Suh Lieng caeuq Yangz fanz doxgyaez lo, doeklaeng couh ciengzseiz ndaej yawjraen songde dox- caeuq youq.

Miz ngoenz ndeu, daxbaj caeuq daxsimj Suh Lieng dawz doxgaiq daeuj ranz Goengyangz camyah lo. Vunz ndawmbanj rox le, ngeixlwnh gig daih. Daegbied dwg daxmeh Yangz Fanz, dai cungj mbouj nyienh hawj songde baenz- gya, caenh Goengyangz naengh youq laj goreiz bakdou cit ien “doekboep doekboep”, mbouj gangj saek coenz vah.

“Boh Dahfanz a! Mwngz hauhlawz gangj coenz vah ndeu ba, gij saeh neix, langh mwngz han hawj, vunzmbanj aiq ndaq dwk daemj ndok bae a!” Daxmeh Yangz Fanz ndaenq lumj maz nei.

Goengyangz ndekndak gyaeujien, byaij haeuj ndawrug naeuz:“Songde baenzgya gou hawj lo, baezneix aeu guh dwk najrongh haq okbae.”

“Boh Dahfanz a! Mwngz mbouj ndaej yienghneix guh a!” Daxmeh Yangz Fanz gangj sat daejnga’nga.

“Mwngz rox gijmaz? Ndawhoz gou cingcing cujcuj.” Goengyangz sou le gij doxgaiq daxbaj Suh Lieng, nda daiz hainduj gwnhaeux.

Yaep ndeu sam bi couh gvaq lo, Dingh Yenz caemh ndaej cuengq ma ranz lo. Daj Dingh Yenz bae naenghlauz le, boh de Dingh Vang ndang cungj mbouj daiq ndei lo, conj dwg youq ndawranz. Mbat neix Dingh Yenz ma le, lijdwg bae guenj geijcib moux ndoeng maklaeq de. Ban Dingh Yenz yawj gyoengqvunz soengq Goengyangz oksang seiz, daegnuengx laeglemx daeujdaengz baihlaeng de, bongx gau ndeu naeuz: “Beix a, mwngz guhmaz mbouj bae soengq Goengyangz oksang ne? Ngoenzbonz de dwg vihliux gouq daxmeh raeuz coh ngaiz dai o.”

“Mwngz naeuz gijmaz? De gouq meh raeuz?”

“Dwg a, ngoenzbonz meh raeuz youq ndawreih mbaet haeuxyangz, miz duz mouduenh cak duet aengap le, fatloengz fatbag roemx gvaqdaeuj, buet vang rongj soh, yaek bongh deng daxmeh raeuz seiz, Goengyangz yawjraen le couh laengz youq baihnaj meh raeuz. Duz mouduenh couh haeb dai Goengyangz, yakdoeg dangqmaz. Mwngz ngoenzngoenz youq gwnzbya, mbouj rox saek gaiq, vaiq bae soengq de lo.”

Dingh Yenz buet bae vaiqvit, raemxda rihbyoegbyoeg. Seizde hix fwn iq doek foenxfoenx, rwed mbaeq gyoengq- vunz soengqsang.

（sat）