Daeuhfouhyienz mboujdan dwg gijgwn feih, engq dwg hamz miz cungj eiqsei ndei ndeu. Vunzraeuz maij gyonjcomz guhdoih, doxhuz doxndei. Baez daengz ngoenzciet laujcaz, vunz Bouxcuengh noix mbouj ndaej gij byaek bingzciengz habsim habbak neix——daeuhfouhyienz.

Miz geij caengz eiqsei, daih’it daeuhfouhyienz dwg gijgwn ndei, gwn le cuengqsim; daihngeih dwg “hamh” daeuhfouhyienz, hamh ndei noh singj- sien, vunzlai maij gwn, yinx gwn. “Hamh” youq ndaw, aeu daeuhfouh guh naeng, duk hwnjdaeuj, cien song mbiengj henjliemliem, rangfwtfwt hawj vunz myaiz rih bae, haeb gaemz ndeu, sien gwn naeng caiq gwn daengz hamh, boux bakgvai de, gwn gaemz ndeu couh rox gij daeuhfouhyienz ranz neix baenz mbouj baenz, hamh aeu gijmaz guh, oet geijlai noh. Habbak, hab swhgeij, baezlaeng caiq daeuj gizneix cawx, aen bouq daeuhfouh vunzlai haenhndei, boux cienz boux riuz doh mbanj.

Mwh lij iq ranz gungz, yaek gwn saek baez daeuhfouhyienz, caen mbouj yungzheih. Gaiq dieg gag louz ndeu dwg aen nienzdaih de hawj nungzminz ngeix daengz ceiq sim raeuj. Gaiq dieg gag louz ranz gou youq Rinlajbo, ndwensam ndaem haeuxyangz, seb ndaem byaekhau、lwgmanh、gocoeng goho, ndwenngux ndaem lwgduh, laebcou gaxgonq ndaem lwgmaenz, seizdoeng ndaem lauxbaeg, bi daengz haemh cungj maj rim gohaeux goduh. Gaiq dieg gag louz de, goduh maj baenz, ndaej sou sam hajcib gaen duhhenj. Daxmeh bingzciengz mbaet- yungh, cietiq gwn byaek daeuhfouh, ciet hung guh daeuhfouhyienz.

Guh byaek daeuhfouh yaek aeu mba duh, vax song gaem duhhenj raix roengz ndaw rum bae daem. “Buekrengz caij rumdoiq” dwg hong naek dwgrengz, din aeu vaiq aeu yunghrengz caij rumdoiq, gyaeuj rumdoiq ndiengq hwnjdaeuj, “ciciu” sing ndeu, menhmenh yo din, “bung” sing ndeu, gyaeuj rumdoiq doek roengz ndaw rum bae, hwnjhwnj roengzroengz, caj daengz duhhenj deng daem baenz mba. Mbaduh dwk roengz ndaw rek raemx gyoet bae gyaux yinz, hai feiz iq cawj. Mbaet di byaekgat, dox soiq, gya di raemxsoemj, daxmeh mizseiz lij gya di bya nyauh iq ndeu, roxnaeuz gemq soiq, cungj byaek daeuhfouh neix, rang doh mbanj bae. Ranznden naeuz: Guh byaek daeuhfouh lij dwk youz, dwg mbouj dwg fatcaiz lai?

Duk daeuhfouhyienz bouh ceiq doeklaeng, dwg song angjfwngz gop daeuhfouhyienz menhmenh fan geij baez, gij dungcoz “dwk” neix dwg gyajcang, fwngz mbaeu maezvunz, baenzneix guh dwg hawj aen daeuh- fouhyienz netnwt、luenzlu、wenjdup. Mizmbangj mehmbwk, baenzlawz cungj guh mbouj baenz dwk daeuh- fouhyienz bouh neix, aen daeuh- fouhyienz guh okdaeuj, baenz ndaek unqnemnem, dwk roengz rek bae le, naeng dek hamh laeuh, sanq baenz rek mwzmad ndeu.

Guh daeuhfouh caen dwg gij hong aeu miz naihhoz dahraix, daxmeh guh daeuhfouh vaiq menh habdoh, mbouj gaenj mbouj gip. Miz coenz vah ndeu naeuz: Sim gip gwn mbouj ndaej daeuhfouh ndat. Coenz neix gangj ndaej deng, sim gip hix guh mbouj baenz daeuhfouh ndei.

Muh giengh dwg guh daeuhfouh bouh youqgaenj ndeu, guh nanz youh dwgrengz. Baenq muh mbouj ndaej vaiq, aeu muh yinz, lwgduh aeu baenz sieg baenz sieg dwk haeujbae. Muh gien ndeu, dwk sieg ndeu, baenzneix baenq ha, dwk ha, haj roek gaen duhhenj muh baenz giengh, yaek muh song diemj cung baedauq. Coemh cauq raemxgoenj ndeu, raemx dwg raemxmboq haetromh rap ma, raemx- goenj caeuq gienghduh yienghyiengh ciemq dingz ndeu. Raix roengz ndaw daehbaengz bae nyaenj, giengh caeuq nyaq faen okdaeuj, raix raemxsiggau roengz ndaw raemxduh bae, neix heuhguh “diemjluk”. “Diemjluk” dwg guh daeuhfouh cungj gisuz youqgaenj ndeu, daeuhfouh guh baenz mbouj baenz caeuq oiq roxnaeuz geq couh yawj bouh gisuz neix. Ndaw raemxluk cujyau hamz miz doenghyiengh vayoz luzvameij、liuzsonhgai, doengh gijneix ndaej hawj naed danbwzciz gyonj- baenz ndaek faensanq neix gig vaiq gietndaek, cuengq ce song diemj cung le, couh baenz gang daeuhfouh hausaksak ndeu. Daek vanj ndeu, gya dangz, baenz daeuhfouhcuk diemzswb ceiq singjsien. Seizneix, daxmeh hawj bouxboux daek vanj ndeu, dou gwn le dajbak caepcaep, lij yaek aeu dem!

Daek daeuhfaeuhcuk haeuj ndaw gyaqfaex gaenq bu baengz haenx, mbaw baengz seiq gak laeb haeuj cungqgyang bae, goemq benjfaex, aeu doxgaiq naek daenz, dinghyiengh song diemj cung, daeuhfouh guhbaenz ndeindup.

Daeuhfouh guhbaenz daeuhfouh- yienz, dwg daeuhfouh bienq yiengh bienq ndei. Gaiq daeuhfouh nyaenj soiq nyauj saeq, cuengq haeuj ndaw swx laeuh bae ndik raemx. Daxmeh cawx “hajroujgaeq” bienzngeiz、noh- buru、nohmbonq、nohbakcax doengh gijneix, cauj cien le ndaej haj caeuq gemq. Gemq dox soiq, gyaeujcoeng mbawho ronq saeq, vanq gyu, gyaux haeuxnaengj duk ndei, cien song mbiengj henjgywggywg. Daeuhfouh- yienz dwk hamh gemqhaj caeuq ngaiz, dou bouxboux gwn ndaej vansubsub, ndaw bak rangfwtfwt.

Miz bi ndeu ciet bet nyied cibngux, daxmeh guh samcib aen daeuhfouhyienz, daxmeh caeuq gyoengq lwgnyez gungh caet boux vunz, gwn le cibcaet aen. Daxmeh sim’angq raixcaix: Haemhcog ranz gou lij miz noh gwn, gwn daeuh- fouhyienz baez dem. Seizhaenx daxboh youq Sanhmeij Siujyoz, ranz liz hag- dangz ngeih samcib leix, ma ranz baez ndeu yaek byaij byongh ngoenz. Daxboh ndaeng raeh lumj moednding, byonghhwnz sawqmwh maranz, gwet farek baez yawj, miz baenz rek daeuhfouhyienz, lij miz buenq vanj haeux, goq mbouj ndaej baenzlai, daxboh bauzbi bauzboeg gwn liux seuqsat.

Doeklaeng gienh saeh neix daxmeh raemh bae raemh dauq: Daxboh sou baez ndeu ndaej gwn cibsam aen daeuhfouhyienz, gwn hoj liux lo, bouxboux lumj de, daengx aen Lingqlajrin cungj deng gwn dwk gya baih bae.

Mwh daxboh youq Cinghdanz Siujyoz, buenq ndwen mbouj miz haeux gwn, gwn byaekcwx, henx naengfaex, ndwnj haeuxraemz, ndang byom naj heu, genga foeggawh, yaek daisadsad. Miz dah hagseng ndeu raen le, lwnh daxboh de nyi, daxboh de dwg boux ganbu camhhaeux, simndei soengq song gaen duhhenj daeuj, heuh daxboh cawj gwn. Gvaq song ngoenz le, daxboh ndaej roengz mbonq byaij loh lo. Song gaen duhhenj gouq diuzmingh daxboh gou.

Goenggiuh dwg vunz mbanj nden dou, aen goj “daeuhfouh dwg diuz- mingh gou” dwg de caux gonq. Miz ngoenz ndeu, miz ranz ndeu guh ranz moq hwnj liengz, cingj vunzmbanj bang guh hong, mbouj miz ngaenz- hong, dan miz ngaiz gwn, mwh haeuj daiz, rek daeuhfouh hausaksak ndeu caeuq nohmou, Goenggiuh baez haeuj daiz couh nip gaiq nohsamcaengz ndeu, boux naengh henz bang de nip gaiq daeuhfouh ndeu, naeuz: “Mwngz nip loeng lo, daeuhfouh dwg diuz mingh mwngz ha!” “Deng ha, daeuh- fouh dwg diuz mingh gou, hoeng raen miz noh, gou lienz mingh cungj mbouj aeu dem lo!” Gyoengqvunz henz daiz cungj riuhaha.

Seizneix daeuhfouh ranzranz cungj miz gwn, yienznaeuz mbouj dwg ngoenzngoenz cungj aeu miz, hoeng sam haj ngoenz mbouj cawj di daeuhfouh ndeu, couh roxnyinh aendungx youq mbouj baenz, bak citcamcam. Gijgwn aeu lwgduh guh baenz miz gauhdanbwz caeuq gak cungj yingzyangj, miz vunz naeuz duhhenj dwg “cungj lwgduh ceiq ndei” “noh ndaw naz” “cijvaiz cangqheiq”, cungj mbouj gvaqbouh saekdi.

Daeuhfouhyienz Mehbei Gai Vwnhbingz dwg “daeuhfouhyienz cuengqsim” dauqcawq mizmingz, de mbouj lumj doengh bi de daxmeh gou guh hamh daeuhfouh mbouj sij dwk noh, caenh cab gij noh bienzngeiz cabsoiq, cix dwg haetromh bahlaz cawx nohsamcaengz, youq gizde dox hamh, doq cien doq gai, boux vunz ndeu ngoenz ndaej duk baenz cien aen, de guh gij daeuhfouhyienz haenx habbak ndeigwn, bouxboux haenh- ndei, vunzlai cungj maij gwn.

Daeuhfouh aeu noh guh hamh, doxgyonj doxcomz. Ranzranz cungj ndaej gwn daeuhfouhyienz cuengqsim, neix mbouj dwg gij ndwenngoenz vuenyungz beksingq simmuengh bw?