Gyoengqsou rox doenghgo doih ceiq ndei gou dwg go gijmaz lwi? Deng la, mwngz duenz gig deng lo, couh dwg gonohlai dwggyaez neix. Gonohlai mbouj dwg miz noh caen, de dwg gij coh doenghgo. Aenvih gonohlai raemx lai mbaw gawh, yawj hwnjdaeuj lumj miz noh nei.

Gaiq yiengh gonohlai cien yiengh fanh yiengh, dwggyaez dangqmaz. Gonohlai mbangj cungj bizbwdbwd, ndeimaij raixcaix; mbangj cungj maj sangsang bae, lumj doengh dahsien de youh gyaeu youh sau; mbangj cungj youh daemq youh biz, lumj ndaw gojgaeq gangj cungj vunz daemq de nei; mbangj cungj youh sang youh noengq, lumj baenz doengh baenz doengh laeuz sangvidvid nei. Gyoengq de mbangj lumj lwg’it hoengz, mbangj lumj lwg’it heu, hawj vunz yawj le myaiz rihngangqngangq, hoeng gyoengqde mbouj baenz gwn bw.

Gij yiengh mbaw gonohlai caemh ndeigyaez, miz mbangj mbaw youh saeq youh raez, lumj doenghceh ngveih godaengngoenz caengz gyaet gvaq nei; miz mbangj mbaw youh mbaep youh bingz, lumj bingj gyaeqgaeq nei benjmbetmbet; lij miz mbangj mbaw youh bingz youh luenz, gwnz gyaeuj de lij hwnj geu oen iq ndeu, mizyinx raixcaix.

Gaiq saek gonohlai daegbied lumjmaz. Haujlai gonohlai gij mbaw de cungj dwg saek heuoiq, gaenlaeng coh menhmenh bienqbaenz saek hoengzmaeq, lij miz mbangj saek haemq noix raen, couhdwg mbaw saekheu cingh roxnaeuz saek hoengz- maeq cingh.

Daxmeh naeuz gou nyi, mingh gonohlai gig ak, bat gonohlai ndeu ndaej cek liux dauq ndaem baenz haujlai bat.

Biengz raeuz ndaw doengh lijmiz haujlai doenghgo lumj gonohlai yienghneix daegdiemj mingzyienj、saek lai, mwngz lij rox gijlawz dem?

(Vei Ciuhyenz/sij

Veiz Munglingz/hoiz)