Ngoenzneix, daxboh daxmeh daiq gou bae ranz buz gou guhcaemz.

Ngamqngamq haeuj dou, gou couh yawjraen daxbuz gaem aen bingzcij cingq cung mbacij, gou geizheih cam:“Daxbuz, ndawranz miz lwgnyez lwi?” Daxbuz riu- nyumnyum naeuz:“Dwg ha, gou daiq mwngz bae yawjyawj.”Daxbuz cienq ndang byaij okbae, gou geizheih raixcaix, ganjgaenj riengz daxbuz daeuj daengz rienghyiengz. O! Yienzlaiz lwg- nyez daxbuz naeuz haenx dwg lwgyiengz iq ha!

Cij raen lwg yiengz hausak- sak ndeu youq ndaw riengh diuq hwnj diuq roengz, lumj aen giuznae iq ndeu ringxndi’ndi, ndawbak de “me me me”heuh mbouj dingz. Yawjraen dou gvaq- daeuj, de couh sikhaek diuqlinlin daeujdaengz henz gamx, ngiengx gyaeuj heuh “me me”, gij yiengh dwg iek le yaek gwn. “Daxbuz, hawj gou gueng.”Gou ganjgip daj ndaw fwngz daxbuz ciep gvaq aen bingzcij, lwgyiengz ganjvaiq iet hoz okdaeuj, gou siujsim aeu aen bingzcij iet daengz dangqnaj lwgyiengz, lwgyiengz haeb ndaej bakbingz couh cup, “gudu gudu” yaepyet bingz cijvaiz ndeu couh ndoet liux lo. Gou gikdoengh ndaej sim diuqdwtdwt, ha ha ha, caen dwg mizyinx raixcaix. “Lwgyiengz, gwn imq loba?” Gou sing unq cam. Cij raen lwgyiengz ngiengxgyaeuj yaep song lwgda hung luenzlulu de, bi gyaeuj bi rieng yawj gou, lumjbaenz naeuz:“Gou gwn imq lo!”Gou maeuq roengzdaeuj menhmenh lumh de, bwnyiengz hausaksak, unqnem- nem、raeuzrwdrwd, lumj lumh gyoeg faiq ndeu, hawj gou gyaez ndaej mbouj siengj cuengq fwngz, yiengz iq hix haep da lumj gig yiengjsouh nei.

Daxbuz riunyumnyum naeuz:“Lwg yiengz iq neix couh lumj mwngz mwh iq, mwh iq mwngz iek le couh daejnga’nga, bingzcij oet haeuj ndaw bak couh ndoet lumj gwnguk, gwn imq le couh angq ndaej fwngz foux ga dik, yienzhaeuh mbouj nanz couh ninz lo.” Dingq liux vah daxbuz, ndaw uk gou yet ok gij yiengh lwgyiengz gwn cij haenx, youh lienzsiengj daengz gij yiengh mwh iq swhgeij, nyaenx mbouj ndaej riuhaha hwnjdaeuj.

Lwgyiengz ranz daxbuz caen dwggyaez ya!

(Sinj Yizdungz/sij

Lij Yanghlenz/hoiz)