Mbwn ngamq rongh, loxlez sing dem sing, boqsanq gij fwjmok geujheux gwnz bya. Lij ndaejnyi gij sing vunz daej mboujduenh, lienz hoengheiq cungj bienq ndaej engqgya naekcaem.

Neix dwg Goengyangz aen Mbanj- myauz Mbanjyauhcingh haenx oksang lo. Dingh Yenz youq ndaw bungzmak de yawj dwk cingcing cujcuj, aen doih soengqsang ndawde lij miz haujlai Bouxcuengh ne. Dingh Yenz yawj dwk dadoek bae!

Dingh Yenz mbouj rox vunzlai Bouxcuengh laj dinbya caemh bae hawj goeng ien’gya neix soengqsang, de raen geizheih raixcaix. De damz naeuz: “Dai ndaej ndei! Couhdwg goengraq neix haih gou naengh lauz sam bi, hwz! Bemx lo!”

Dingh Yenz naengh youq laj go maklaeq de, yawjraen doengh goenq faex dauq didngez hwnjdaeuj, ndawsim de cix haemz Goengyangz dangqmaz.

Goengyangz dwg bohmbanj aen Mbanjmyauz Mbanjyauhcingh, youq ndawmbanj mingzmuengh gig daih, bouxhung bouxiq cungj dingq de liux. Bouxboux cungj rox, Mbanjyauhcingh youq laeng goengq bya ceiq sang ndawcin, laj dinbya lij miz aen mbanj Bouxcuengh ndeu heuhguh Mbanjbingzmanz. Daj Mbanjyauhcingh byaij daengz Mbanj- bingzmanz cij yungh buenq aen cungdaeuz, hoeng song aen mbanj neix coengzlaiz mbouj baedauq gvaq.

Gaiq dieg maklaeq Dingh Yenz couh youq giz gapgyaiq Mbanjyauhcingh caeuq Mbanjbingzmanz. Daxboh Dingh Yenz heuhguh Dingh Vang, 1990 nienz de youq giz gapgyaiq haifwz aiq miz 50 moux baedauq, youq diegbya neix ndaem maklaeq. Dingh Vang siengj aeu gaiq reih caeuq de gapgyaiq haenx, gaiq de youh bingz youh biz. De couh famhgyaiq youq dieggyaiq Mbanjyauhcingh haifwz. Ciuhgoeng Goengyangz daj Gveicouh senj daeuj, bonjlaiz diegreih couh gig noix lo, banneix caiq deng Dingh Vang Bouxcuengh neix daeuj ciemq, de rox le, ndawhoz naeuz neix mbouj dwg hangz Bouxmyauz dou ma. Goengyangz doq oknaj daeuj byah Dingh Vang, hoeng Dingh Vang aeu ndaeng baez “hwzhwz”, doiq Goengyangz naeuz: “Mwngz suenq ndaek maz? Sou cungj dwg daj giz gyae senj daeuj, bak lai bi gaxgonq neix couhdwg diegreih Mbanjbingzmanz dou.” Gangj sat le de aeu fwngz bae nyoengx, Goengyangz baez soenx couh laemx youq gwnznamh.

Goengyangz ma daengz ranz le, lij hozbongz dangqmaz, de nyaenx mbouj roengz gaemz heiq neix, couh naeuz gyoengq vunzmbanj nyi. Vunzlai boux- boux cungj hozndat dangqmaz, hoeng hix mbouj miz maz banhfap, gangj daengz daej bae, doengh gij Bouxcuengh laj dinbya vunz lai rengz hung, hoenx mbouj gvaq a.

Couh hauhneix, 50 lai moux diegbya Dingh Vang haifwz de, bide couh majok doengh go haeuxyangz mwncupcup. De youq ndawreih dap diengz, caiq ciengx le geij duz gaeq. Ngoenzngoenz daengngoenz roengz bya, mbwn laep le, ndawdiengz de couh hwnj hoenzngeungeu, mizseiz lij ndaej mup daengz gij feihrang nohgaeq. Dingh Vang naengh youq bakdiengz gag gangj gag damz:“Roek bi haem, gij ngaenzhangz saekheu gou couh canh ngaenz lo, haha, haha……”

Vunzmbanj Mbanjyauhcingh baez byaij gvaq henzreih Dingh Vang, ndawhoz cungj haemz Dingh Vang lumj maz neix, siengj euj de guh song bae. Ngvanh gijmaz couh daeuj gijmaz, miz haemh ndeu, Dingh Vang bae ranz beixnuengx gwnlaeuj, dingjlingz couhdwg hwnz de, 50 lai moux haeuxyangz duh Dingh Vang haemh ndeu couh conj deng vunz raemj seuq lo. Dingh Vang ma raen le daejww, gaenlaeng doq gaem caxnat bae Mbanjyauhcingh ra boux vunz raemj gij haeuxyangz de. Hoeng Dingh Vang boux ndeu baenzlawz hoenx ndaej gvaq vunzlai Mbanjyauhcingh, gyoengqde bouxboux fwngz gaem faexgyaengh yaek hoenx Dingh Vang. Dingh Vang raen le mbouj gamj doenghfwngz, doq dauqma ndaw- mbanj ra 20 lai boux vunz bae Mbanjyauhcingh. Song bang vunz neix couh yaek hoenx hwnjdaeuj lo. Couh youq bande, Goengyangz byaij okdaeuj, gvih youq dangqnaj Dingh Vang naeuz: “Neix dwg hauxseng ndawmbanj dou loek lo, Goengyangz gou nyienh boiz gij goem mwngz, daj ngoenz doxbae mbouj caiq miz cungj saeh neix lo.” Gaenlaeng Goengyangz aeu 5000 maenz ngaenz de rom le haujlai bi haenx hawj Dingh Vang, bingz le ciengz doxhoenx hung neix.

Coenz vah “raemxcingj mbouj famh raemxdah” gaenq bienqbaenz vahmieng Mbanjyauhcingh caeuq Mbanjbingzmanz lo. Dingh Vang lij ndaem gaiq reih duh de, ndawreih conj ndaem gomaklaeq liux. Geij bi neix, song aen mbanj couh yienghneix mbouj doxfamh, youq ndei youq dinghrwgrwg. Vangz Gozbauj dwg vunz Mbanjyauhcingh, miz ngoenz ndeu, 10 lai duz yiengz de caegcaeg ndonjhaeuj reih maklaeq duh Dingh Vang bae. Bouxlwg Dingh Vang heuhguh Dingh Yenz, de raen cib geij duz yiengz ndonj haeujdaeuj le, doq gaemh yiengz euj raek gij ga yiengz liux, vit youq ndawreih. Vangz Gozbauj dauqcawq ra gij yiengz de, ra daengz reih maklaeq Dingh Yenz, yawjraen gij yiengz bonjfaenh cungj mbouj miz saek duz ndaej cangh lo. De doq ra geu faexgyaengh miz mij lai raez ndeu, lumj fatbag neix roemx haeuj ndawdiengz Dingh Yenz bae, yaek ra de bauqcaeuz. Dingjlingz ngoenzde, Dingh Yenz cingq- ngamj roengz ndoi bae. Vangz Gozbauj ra mbouj raen Dingh Yenz, couh buet ma ranz aeu gawqcaizyouz raemjrak doengh go maklaeq Dingh Yenz.

（caengz sat）