（ciep geizgonq）

“Lij lauxsae, mwngz wnggai dauqbae lo. Dou seizneix rox gag ra cienz lo. Mwngz hix mbouj yungh bang dou baenzlai lo.”Daegvaz nyinhcaen naeuz, lau Lij Danh mbouj saenq, vanzlij iet song fajfwngz hwnj daw haenx hawj de yawj.

Daegnuengx hix ngaekgyaeuj mbouj dingz, iet doiq fwngz okdaeuj lo. Cij miz Dahlanz yupyup suk song fwngz gvaq baihlaeng bae.

“Dahlanz iqet, mbouj yungh bae bang guhhong loba? ” Lij Danh riu cam, de ceiq haengj daeuq dah’iq neix lo.

“Gou hix bae……”Dahlanz nyaeuq najbyak menhmenh iet song fwngz ndaemndat haenx hai ok- daeuj——miz geij aen lwgfwngz cungj hwnj bop youh muz dek lo, ndawde lij hoengzgywggywg……Dahlanz“sw”sup gaemz heiq ndeu, nyaenx in dwk.

Lij Danh sim’in dwk bungj hwnj song fwngz iq de, youh got de ndaetndet bae, ndaw sim lumj raemxhaij foekfan mbouj dingz.

Roek

Seizgan baez yaepda couh gvaq ndaej geij bi lo, Lij Danh dang banhcujyin son yijvwnz cungj son- gyauq miz gingniemh, fuengfap ndei, sonhag cingzcik gig ndei, dwg lauxsae goetganq hagdangz, lingjdauj lai baez anbaiz de son roek nienzgaep. Haujlai hagseng cungj gauj hwnj cunghyoz ndei bae, Daegvaz hix gaujhwnj gauhcungh lo, lij miz daegnuengx caeuq dahnuengx gaen Lij Danh doegsaw.

Youq mwh daeglwg Lij Danh yaek hwnj hagdangz, gvan de Cau Veih aenvih guh hong gig ndei, miz sawmaeg lai, sij faenzcieng maenh’ak, dang lauxsae mbouj geij nanz couh ndaej diuh hwnj yienh cwngfuj bae guhhong lo.

Gyoengq beixnuengx rox le, cungj heuh Cau Veih siengj banhfap diuh Lij Danh bae ndaw yienh sonsaw, ranz vunz ndeu caez youq cij ndei.

Lij Danh caegcaeg naeuz gvan de: “Hangznieb mbouj doxdoengz guh hong mbouj ityiengh, mwngz seizneix ngamq miz gizlaebdin, camh mbouj luenhgyaux guh saeh, mwngz onjsim lai hagsib, nyinhcaen guhhong gonq, gou daiq lwg youq gizneix doeg siujyoz gig yungzheih, gizyawz caj mwngz gvaqlaeng ndwn ndaej maenh le caiq dajsuenq ba.”

Gizsaed, yienznaeuz yah de mbouj gangj okbak, Cau Veih hix rox dungxsaej yah “ngawz” neix——de siengj son geij beixnuengx Daegvaz “ok caeg” caiq guh dajsuenq. Gvan- baz doengzsim, Cau Veih hix vih de cang “ngawz ” lo.

Aenvih de rox, yah “ngawz” neix, beij swhgeij maenh’ak youh hung- mbwk lai lo. Daj aen singz hung henzhaij gyaeundei haenx haq gvaq- daeuj, gaen de haeuj ndaw ndoeng Sizvandasanh gwn haemz gwn hoj cib lai bi, caenhsim sonsaw, cauhfuk lwglan Mbanjcuengh. Hagseng caeuq gyahcangj gingq de, doengzsaeh lingj- dauj haenh de……yienznaeuz sinhoj di, hoeng hix dwg gij gyaciz seiqvunz ceiq gyaeu. De sim’in yah de, hix ciengxlwenx daemxcengj yah de.

Saeh neix hawj gyoengq doengz- saeh rox le, hagdangz lumj dawz “cadan” nei, daihgya cungj gangj- nyaengnyaeng.

Hagdangz miz haujlai doengzsaeh siengj diuhdoengh youh hoj ra monzloh haenx hozhaenz youh da- nding; gyoengq baengzyoux de hix bouxboux gienq de gaem ndei seizgei, mbouj guh vunzngawz, mienxndaej saet bae gihvei couh hojsik lai lo.

Engq miz boux baklai haenx vab naeuz: “Aiq dwg gvan de lingh miz yah’oiq, mbouj caeuz de gap, yaek nauh doxliz loba? Caen dwg vunz- ngawz.”

Lij Danh cij riuriu, mbouj dapvah, aenvih ndaw sim de gag miz aen gingq ronghsagsag ndeu.

Caet

Lij Danh baenzbaenz cungj aeu bang ranz Daegvaz lij miz aen yienzaen daegbied ndeu, aenvih ranz Daegvaz ginglig caeuq ranz de miz di doxlumj.

Rangh dieg neix dwg Sizvan- dasanh, ndawde haujlai mbanj cungj comz miz beixnuengx gak minzcuz. Daxboh Daegvaz dwg vunz Boux- cuengh, daxmeh dwg vunz Yauzcuz. Gaxgonq, aenvih gak minzcuz fungsug sibgvenq mbouj doxdoengz, caiq gyahwnj gak minzcuz gangj funghgen maezsaenq, gak cuz beixnuengx cungj noix doxaeu baenzranz.

Bohmeh Daegvaz baenzgya le, vih ndoj gij vah rwix haenx couh an ranz youq byonghbya bae. Gyoengq lwgnyez laebdaeb okseng, gij ndwen- ngoenz gyoengqde hix ngoenz beij ngoenz ndei lo. Hoeng, daxboh Daeg- vaz baenz bingh gvaqseiq lo, ranz de geij boux couh mbouj miz baengh lo. Ndigah, gij saeh ranz Daegvaz couh engq yiendoengh sim de lo.

Aenvih gij ginglig neix, caeuq ranz Lij Danh ca mbouj geijlai, gij gamjcingz bohmeh de hix dwg aen goj gyaeundei daeg Bouxgun caeuq dah Ginghcuz……

Geiq ndaej seiz lij iq, daxboh Lij Danh caeuxcaeux couh hai ruz ok haij bae dwk bya. De couh caeuq daxmeh、daeggo caez youq gwnz sadan guh- caemz, gip saehaij. Mwh daengngoenz menhmenh roengz din mbwn caeuq henzhaij, gij fwjhaemh lai saek lai yiengh, gyaeundei raixcaix, moix daengz seizneix, de couh haengj doq ci hoihaij doq ciengq go “Hoihaij iq, ci didi, daxboh dingq le vaiqvaiq dauq……”, mbouj geij nanz, daxboh caen dauqma lo. Gij saedceij haenx haengjheiq youh vuenyungz.

Hoeng, miz ngoenz ndeu, gwnz- mbwn yied daeuj yied ndaem lo, go ciengq liux sam haj lwnz, daengx ranz vunz cungj iet hoz raezrangrang muengh coh daihhaij, cij raen raemx langh fanndungndung, mbouj raen aen ngaeuz daxboh.

Cigdaengz gyanghwnz, auseiq naeuz daxmeh, daxboh mbouj caiq dauqma，ciengxlwenx biek daxmeh caeuq geij beixnuengx de bae lo……

Bet

Seizgan gvaq ndaej gig vaiq, baez yaepda, Daegvaz swhfan dayoz yaek bizyez lo. De ndaej bae daengz aen hagdangz ndaw singz henzhaij haenx lienhguh. De gig haengj aen hagdangz gyaeundei neix. Neix aiq dwg aenvih seiz lij iq Lij lauxsae gangj gij goj daihhaij ba, hawj de daj iq couh siengjgyaez daihhaij. De caen muengh ndaej youq aen singz gyaeundei neix haenqrengz guhhong, vih seiqvunz bonjfaenh guh gij cingzcik naekna. Danghnaeuz ndaej youq gizneix sonsaw, caen dwg gienh saeh miznaj ndeu, aenvih daj de roxsoq hwnj, lij caengz dingq naeuz miz daihhagseng Sizvandasanh youq singz henzhaij gunghcoz gvaq bw, danghnaeuz saeh neix dwg caen, hix suenq saedyienh aen maqmuengh daxboh lo.

Lij Danh naeuz:“Daegvaz, dieg haenx couh dwg ranzmbanj gou lo. Danghnaeuz mwngz siengj louz youq gizhaenx couh bae doxciengj aeu ndaej binqyungh, son gij lwglan dou vei. ” “Deng lo, Seizneix, boh’au Cau Veih hix youq gizhaenx hwnjban lo. Aenvih de nyaengq lai, ciengzseiz mbouj ndaejhoengq dauqma, dangh- naeuz mwngz hix ndaej youq gizhaenx guhhong, sou couh guhdoih caemh gwn ba, boh’au haengjdingh ciuqgoq ndei mwngz. ”

Daegvaz fwt singj gvaqdaeuj, siengj daengz swhgeij wngdang guh gijmaz cij deng.

De dwk denva hawj Cau Veih:“Boh’au, gou raen aen hagdangz ndaw si neix cingq ciu lauxsae bw. Lij lauxsae gaenq youq Mbanjcuengh raeuz fouzsei okrengz cib lai bi lo, mwngz siengj banhfap gangjfug de gvaq ndaw si daeuj vei, yienghneix ndaej gyawj ranz meh de ba, youh ndaej ciuqgoq boh lwg mwngz, vanzlij ndaej laebdaeb guh sonhag dem, caen dwg guh baez ndaej lai yiengh ne.”

Cau Veih han:“Hehe, gyo’mbaiq mwngz naeuz gij siusik ndei neix hawj dou. Hoeng, Lij lauxsae mwngz dwg boux ngawz, nanz gangj ndaej doeng bw.”

“Saeh neix raeuz caez okrengz couh baenz!” Daegvaz riuhehe naeuz.

Lienhguh sat le, Daegvaz couh dauqma ndaw yienh camgya doxciengj aeu ndaej binqyungh, haeuj aen hagdangz ranzmbanj Sizvandasanh neix daeuj lo. Daegvaz lumj vaizlwg ngamq seng nei, haenqrengz buekguh, mbouj yaemhywx saekdi. Geij bi seizgan, de gig vaiq couh maj baenz boux caixhangz sonhag ndeu, caemh- caiq ndaej cingzcik gig lai dem.

Lij Danh lauxsae raen de caen ciep dawz diuz “faexcieplig” sonsaw neix le, cij onjsim bae aen hagdangz henzhaij gyaeundei haenx.

Doeklaeng, aenvih Daegvaz mauhgvaq doengzloih, youh ndaej daezswng dang yaucangj aen hagdangz neix. De vanzlij daiq gyoengq lauxsae aeu hagdangz banh baenz aen hag- dangz sonhag ceiq ak ndaw yangh dem.

Geij ngoenz gonq ciet fungsou, Daegvaz angqfwngfwng cingj Lij lauxsae daengx ranzvunz caez daeuj gvaq ciet. Aenvih bi neix youq Sizvandasanh nazmbaeklae Bwzmaj guh hozdung angqhoh fungsou, dingj- lingz youh miz Bouxcuengh caeuq Yauzcuz banh vwnhlij dem.

Ngoenzhaenx, gyoengq beix- nuengx gak minzcuz cungj daenj buh gyaqciq minzcuz bonjfaenh, angqangq yangzyangz doxcomz youq naz- mbaeklae neix ciengqgo、diuqfoux、gwn mougangq caeuq ngaiznaengj hajsaek……（sat）