It

“Bub!”sing he, miz gaiq rin hung lumj muh nei, daj lajdin Daegvaz dekhai doek roengz laj datbya bae. De fwt singjsag gvaqdaeuj, sou yamqdin lumj dawz fangz haenx dauqma.

“Daegvaz!”Lij Danh lauxsae yieplau dangqmaz, doq hemq doq daj baihlaeng rag dauq de.

“Cawzliux lix caeuq dai, saeh lawz cungj dwg saeh iq.”Lij Danh nai Daegvaz naeuz,“Diuz roen seiqvunz raezrangrang, mwngz aeu dingj gvaq- bae, mbouj ndaej hawj daxboh mwngz saetmuengh.”

Daegvaz geiq hwnj daxboh gaenq biek bae, raemxda youh rim gvaengz lo.

Siengj daengz daxboh yaek bae seiz, dwg de buenx youq henz congz, raen yiengh daxboh ngaiz bingh in nyoegnyamx haenx, sawj de sim’in dangqmaz. De gouz mehmbwn, muengh hawj daxboh ndangcangq dauqma, de nyienh vih daxboh souh gij coih neix, daxboh dwg diuz saeuliengz dingj ranz, baez gengz ranz couh doemq. Hoeng, daxboh vanzlij vut daxmeh byomnyieg caeuq geij beixnuengx de bae lo.

De cuengq da yawj gyoengq bya gizgyae onj lumj Daisanh haenx, ndaw sim cij menhmenh dingh roengz- daeuj……

Daegvaz mbouj siengj hawj lauxsae yousim, couh naeuz:“Lij lauxsae, geij ngoenz neix, gou ngoenz- ngoenz ngawh dwk siengsim lai, naeuz gvaq daxmeh le, couh luqlawq daengz gizneix byaijbyaij hane.”

De naeuz Lij Danh: De ndwn youq gwnz bya, cungj roxnyinh daxboh hix ndwn youq henz ndang. Gaxgonq lij iq seiz, de baez bungz daengz gij saeh vei roxnaeuz saeh simfanz, daxboh cungj haengj daiq de daengz laengbya neix gangjgoj, vanzlij gujli de doiq gyoengq bya daihsing hemq geij sing raezraez, hemq gij simfanz okdaeuj liux bae.

Gyoengq bya hung caen lumj goenglaux unqswnh nei dap de, roixroix hoizyaem haenx mbouj dingz mbouj duenh, youh hung youh raez, sawj vunz sim sangj dangqmaz. Dieg neix couh dwg gizdieg de caeuq daxboh ceiq haengj bae guhcaemz lo.

“Haxbaenh lumj fangzhwnz okda raen daxboh mbin bae naj, gou lau de doek roengz dat bae, cij siengj rag de dauqma……” Daegvaz mbouj eiqsei naeuz,“Caeklaiq mwngz heuh gou, lij caenhrengz rag gou dauqma.”

Lij Danh lauxsae cang guh soengswt riunyumj bekbek aen mbaq Daegvaz nai de.

Ngeih

Lij Danh ceiq gvansim boux hagseng neix. Aenvih boh de gaenq fatbingh song bi lai lo. Vahsug naeuz “lwg ranz gungz danggya caeux”, lwg neix caeuxcaeux couh dawz rapnaek ndaw ranz lo. Lij Danh youq gwnz hagsib caeuq swnghhoz cungj bang de mbouj noix. Vihneix lij ngaiz gyoengqvunz lwnh de dwg “vunz- ngawz”. Doiq “vunzngawz” aen vamingz neix de caeux couh dingq gvenq lo, lai baez dem youh baenzlawz yiengh?

De dwg dahsau singz hung henz- haij, aenvih daegyoux de Cau Veih bizyez faenboiq dauq daengz Mbanj- cuengh swhgeij neix, de couh gaen gvaqdaeuj lo.

Baenzgya gaxgonq, Lij Danh hix gaen de daeuj guhcaemz gvaq, raen gizneix dwg dieg gungx, banci cungj mbouj miz lai bouh, seiqlengq cungj dwg ranzvax, banngoenz rap raemx gwn, banhaemh diemj youzdaeng, miz haujlai bouxcoz gwn mbouj roengz gij haemzhoj neix cungj laebdaeb diuh deuz lo, ndigah gizneix noix lauxsae dangqmaz.

Mwhhaenx gyoengq bouxcoz cungj haengj ok Gvangjdungh gij singz hung haenx bae dajgoeng, it ra ndaej cienz lai, ngeih raen seiqmienh lai, byawz haengj louz youq ndaw gungx neix muengh goengqbya ne? Mwh gyoengqvunz raen dah neix dwg vunz ndaw singz, sangseuq youh baenzsau, hix gaen haeuj ndaw bya daeuj dajsuenq an’gya, cungj youq baih- laeng caemhlwnh de doegsaw vaih uk lo.

Lij Danh ndaw sim hix fanfoed gvaq, mbiengj ndeu dwg ranz meh ndaw singz henzhaij, mbiengj ndeu youh dwg daegyoux……

Daegyoux de Cau Veih hix gienq de siengj ndei cij gietdingh, de mbouj nyaenxsim hawj dahyoux hojguh.

Hoeng, mwh de yawj raen gyoengq lwgnyez gij yiengh maq- muengh hagsib haenx, de caiq hix mbouj nyaenx sim biek bae. De caen gietdingh doekrag louz youq Mbanj- cuengh caeuq daegyoux caez sonsaw lo. Daj mwh haenx hwnj, gyoengqvunz engq duenhdingh de dwg “vunz- ngawz” lo.

Sam

“Lij lauxsae, gou aiq mbouj ndaej hwnj hag lo, gou aeu ciuqgoq daxmeh, lij aeu hwnj bya gvej youz bae gai, ra ngaenz hawj daegnuengx caeuq dahnuengx doegsaw cijndaej.” Daegvaz baez uet raemxda, najbyak nyaeuqnyat naeuz.

Lij Danh yawj ndaej sim’in, geij bi neix daeuj de rox gij haemzhoj de. Aenvih Daegvaz dwg hagseng ban de, gaenq son de geij bi lo, seizneix doeg roek nienzgaep.

Daegvaz cingjgyaj geij ngoenz. Hoeng gyajgeiz gaenq gvaqbae song sam ngoenz lo, lij caengz raen de daeuj hwnjhag. Lij Danh sim mbouj onj, de couh anbaiz seizgan bae cunz ranz Daegvaz.

Ranz Daegvaz liz hagdangz gwnz haw miz ngeihcib lai goengleix, dap banci ngeihcib goengleix le, lij aeu byaij lohbya sam seiq goengleix, caiq benz hwnj byonghbya dem cij daengz mbanj de, aen mbanj neix gaenh mbanj Yauzcuz, dingq gangj gak mbanj fungsug cungj mbouj dox- doengz.

Daengz ranz Daegvaz le, daxmeh de naeuz Lij Danh, Daegvaz gaenq daengz laengbya bae byaijbyaij, doeklaeng, couh dwg bungqdaengz saeh haidaeuz haenx lo.

Ginggvaq buenqngoenz doxgangj, de dauqdaej gienq ndaej Daegvaz bae hagdangz doegsaw lo. Caeuq meh Daegvaz doxbiek le, song de couh itheij dauqma hagdangz.

Mwhhaenx cingq dwg ndwen seizdoeng, gaenq daengz banhaemh, okdaeuj dap ci duenh roen haenx, aeu ginggvaq goengq bya youh sang youh mwn ndeu. Daegvaz naeuz lauxsae nyi, rangh ndoeng neix mizseiz miz duznuem okdoengh, miz baez he de hwnj bya gvej iengbek dauqranz seiz raen gvaq. Ngoenzhaenx guj dwg okdaeuj ra gwn, nyouq daengz heiq vunzloih, youh ndonj haeuj ndaw ndoeng bae lo.

De daezsingj lauxsae aeu vaiqdi byaij ok benq ndoengfaex deihmaed neix. Lij Danh dingq dwk daengx ndang hwnj naenggaeq. Aenvih de daj iq maj youq henzhaij, cij raen gvenq aen haij youq laj ndit gvangqyubyub, ronghsagsag, lij caengz raen duznuem hung ndaw ndoeng gvaq. Seizneix de cij rox Sizvandasanh dwg rangh dieg saenzmaed ndeu.

Seiq

Aeu gij vah gyoengq vunz daeuj gangj, vih Daegvaz boux hagseng neix, Lij Danh youh guh saeh “ngawz” lo. Daj haenx hwnj, de dawz geij bak maenz cienzgoeng swhgeij faen baenz geij faenh, faenh ndeu bang ranz Daegvaz, faenh ndeu guh cienz gwndaenj, faenh ndeu louz youq bwh di geiq hawj daxmeh de. Mboujdan bang Daegvaz geij beixnuengx gwndaenj, vanzlij lumj daxgux nei ciuqgoq gyoengqde dem.

Geij lwgnyez neix vah mbouj lai, doegsaw gig haeujsim, bouxboux cungj dwg ndaw ban ceiq maenhndei. Gyoengqde mboujdan hagsib ndei, lij bang son gyoengq doengzhag dem, hawj gyoengq lauxsae haenh mbouj dingz, gyoengq lauxsae lij haenh Lij Danh: Lij caengz gag ciengx lwg, dauq bang ciengx lwg vunz baenz gvai. De dingq le hix riuhaha, gig vuenheij, de gag rox, baenzlawz gwn haemzhoj hix dij lo.

Moix daengz ngoenz singhgiz, Daegvaz baema cungj daiq geij daegnuengx. Ma ranz le, de couh rap raemx hawj daxmeh, raemj fwnz, bwh ndei gij doxgaiq gwndaenj, caiq daiq nuengx hwnj bya bae gvej iengbek gai cienz bangbouj ngoenznaengz yungh, Aenvih de rox, de aeu baengh bya gwn bya, mbouj ndaej lienzlih Lij lauxsae baenzlai.

Haj

Mwh youq hagdangz youq, moix daengz banhaemh, Daegvaz geij beixnuengx cungj haengj dingq Lij lauxsae gangj gij goj daihhaij. Gyoengqde caengz ndaej byaij ok Sizvandasanh, engq mbouj caengz raen gvaq daihhaij, gij goj Lij lauxsae lumj dujfwj saenzgeiz nei, daiq gyoengqde mbin hwnj gwnz mbwn lamzyubyub bae, sawj gyoengqde yawj raen aen haij gvangqlanghlangh, sadan henjgywggywg, gij saehaij lai cungj lai yiengh……haenx dwg aen singz gyaeundei ndeu.

Lij Danh moix baez gangj sat le, cungj laeglemx uet raemxda.

“Lij lauxsae, daxmeh gou naeuz, ranzmbanj dwg rag, gizsaed mwngz wnggai youq aen singz henzhaij dang lauxsae cij deng.”Dahlanz dwg dah- nuengx Daegvaz, ngamq doeg ngeih nienzgaep, de gvaivetvet doiq Lij Danh naeuz.

“Lwgngawz mwngz, danghnaeuz gou mbouj gvaqdaeuj, couh mbouj roxnaj sou geij beixnuengx lo!” Lij Danh riu naeuz.

（caengz sat）