Bi’gvaq dauqranz gvaqcieng, byaij daengz najranz, roxnyinh ndawranz caemrwgrwg. Dax- meh boux ndeu youq ranz, ndaejhoengq saek seiz de cungj gyaez yawj densi gaijmbwq. Seizneix ndawranz mbouj nyi densi yiengj, roxnaeuz daxmeh nyaengq bae guh maz hong lo. Lwg sim niemh meh, gou sibgvenq baez haeuj dou couh heuh meh.

“O, rox mwngz ngoenzneix dauq, gou gaenq bwh ndei byaek noh lo, roengz rek cawj couh ndaej. Raen mwngz caengz dauq, gou caemz doujyinh yaep ndeu gonq.” Daxmeh riu naeuz.

“A, meh ha, mwngz hix gaen hwnj seizdaih, rox caemz doujyinh lo.” Gou muengh coh daxmeh, gig doeksaet.

“Mboengqgonq daegnuengx mwngz dauq- ranz, naeuz soujgih bouxgeq mbouj ndaej dwk sibinz, cawx aen cinwngz soujgih neix hawj gou, caemh son gou baenzlawz yungh.” Daxmeh riunyum naeuz.

Daxmeh roekcib geij bi lo, yienznaeuz doegsaw mbouj lai, rox yungh cinwngz soujgih caen mbouj yungzheih ne.

Ngeihcib sigij betcib nienzdaih cogeiz, gou lij iq, caengz haeuj hagdangz doegsaw, ngoenz- naengz mbouj rox guh maz, hix guh mbouj ndaej maz, daengx ngoenz caeuq gyoengq nyezdoih guhcaemz.

Seizhaenx, ranzranz cungj hojndoq, gyoengq lwgnyez mbouj miz lingzdaeuz gwn, hix mbouj miz maz doxgaiq guhcaemz. Dou lwgnyez ngoenznaengz doxgyaep guhcaemz gaeuq le, youh guh yahndoj roxnaeuz diuqgak, guh gijneix nanz le hix mbwq.

Seizhaenx, ceiq hawj vunz vaiqvued couh dwg yawj denyingj lo. Cijaeu bakdou hagdangz diep haijbau cuengq denyingj, ndaw mbanj couh goenj hwnjdaeuj lo, laux nyaeq cungj angq.

Rox haemhneix cuengq denyingj, daxmeh caeuxcaeux couh cawj caeuz hawj gou caeuq daegnuengx gwn. Gwn imq caemxndang le, ndaw cauhcangz hagdangz singgo goksad hix daj ndaw lahbah cienz daeuj lo. Daxmeh gaem aen daeng moizyouz he, yien gen gou, aemq daegnuengx bae coh hagdangz lo.

Daengz ndaw cauhcangz hagdangz le, daxmeh doiq gou naeuz:“Mwngz guenj ndei daegnuengx, gou dauqranz lij nyaengq di hong, denyingj sanqciengz gou couh daeuj coux sou.”

Seizhaenx gou ngamq ndaej seiq bi, daegnuengx ndaej bi lai, lumj dou baenzneix iq, boux cuengq denyingj cungj mbouj heuh aeu cienz cawxbiuq. Youq ndaw cauhcangz, gou caeuq gyoengq lwgnyez doxgyaep guh’angq, nauhyied dangqmaz. Mbouj rox bouxlawz naeuz, yaek daengz seizgan cuengq denyingj lo, raeuz baeranz aeu daengq daeuj naengh yawj. Dingq bouxwnq baenzneix naeuz, gou fwt geiq hwnj dou song cejnuengx caemh mbouj miz daengq naengh, couh heuh daegnuengx baeranz aeu daengq daeuj.

Daegnuengx seizhaenx ngamq rox gangjvah, byaijloh caengz onj geijlai, de naeuz de mbouj nyienh bae. Gou naeuz:“Danghnaeuz mwngz mbouj dingq gou gangj, gou mbouj gyaez mwngz lo.” Daegnuengx dingq le, couh lumhlaep baeranz lo.

Mbouj nanz, daxmeh youh aemq daeg- nuengx daeujdaengz ndaw cauhcangz hagdangz. Daxmeh baez raen gou couh ndaq:“Gou caeuxcaeux daiq sou daeuj gizneix, bae gyawz rox mwngz youh heuh daegnuengx baeranz aeu daengq, baenzlai vunz soengz yawj denyingj, cungj raemh caez lo, sou daemqdetdet iqetet, naengh daengq yawj ndaej raen ha. Caiqnaeuz daegnuengx byaijloh cungj mbouj onj, de riuj hwnj aen daengq ha?”

Daxmeh cuengq daegnuengx roengzdaeuj, baenqndang yaek dauqranz seiz, youh naeuz:“Mbwn baenzneix laep, caen mbouj rox daeg- nuengx baenzlawz byaij gvaq henz hagdangz diuz giuzfaex iq haenx, baenzlawz raih gvaq gij lohrin gumzgamx haenx. Danghnaeuz daegnuengx miz maz saeh, raeuz baenzlawz gvaq.”

Seizhaenx bae coh hagdangz diuz loh haenx miz diuz mieng hung he, cijmiz haj roek diuz faexcoengz gaq hwnjbae, baihgwnz bu namh. Ranz gou youq laj dinbya, bae coh ranz dwg diuz lohrin sang daemq mboep doed mbouj bingz he, danghnaeuz haemhhaenx daegnuengx miz maz loekcak, gou ciuhneix caen mbouj rox baenzlawz gvaq. Hoeng laeq lwgnyez ngamq ndaej seiq bi he baelawz rox gijneix ne? Gvaqlaeng vunzwnq daeuj cuengq denyingj, daxmeh lijdwg soengq song cejnuengx bae, hoeng gou cix rox henhoh daegnuengx lo, mbouj luenh heuh de guh saeh lo.

Daengz nienzgeij haeujhag seiz, ndaw mbanj mbangj ranz gaenq cawx ndaej densi lo. Seizhaenx dwg cibseiq conq densigih ndaemhau, couh dwg aen bingzmuq iqet neix, ciuyinx dou gyoengq lwgnyez caeuq gyoengq bouxlaux bae comzyawj. Ranz miz densi haenx hix ndeigangj, cijaeu miz vunz daeujdaengz, mboujlwnh boux ndeu roxnaeuz geij boux, lwgnyez roxnaeuz bouxlaux, cungj riuhoho hai densi hawj dou yawj.

Doengxhaemh, gyoengqvunz comz daeuj yawj densi ndaetfwdfwd, lwgnyez naengh baih- naj, bouxlaux naengh baihlaeng. Bouxlaux guh- hong ngamq haeuj ranz, mbangj boux rubrab ndoet song gaemz souh haeuxyangz le, goq mbouj ndaej daengxndang haeu hanh haeu soemj， cagaenj buet daeuj yawj densi. Mbangj bouxlaux mienh yawj densi mienh cit ien, yaepyet， heiq hanh、heiq ien sanq doh daengx aen ranz, hoeng bouxboux cungj goq mbouj ndaej gijneix, song da cimyawj densi, cungj lau loeng gvaq saek aen gingqdaeuz.

Miz densi yawj lo, vunzwnq lij daeuj hagdangz cuengq denyingj. Gyoengqvunz yawj densi le, youh bae yawj denyingj, song yiengh mbouj doxnguh. Seizhaenx dou hung di lo, aeu cawx mbaw biuq song gak ngaenz cijndaej haeujbae yawj denyingj. Bouxlaux cawx biuq, hix ndaej daiq boux lwgnyez he haeujbae, dangh- naeuz song boux lwgnyez caez cawx mbaw biuq ndeu, hix ndaej haeujbae yawj.

Dou lwgnyez gyawz miz ngaenz cawx biuq yawj denyingj, hix mbouj gamj cam bouxlaux aeu, gig lau cam mbouj ndaej ngaenz cixbah, lij deng fok geij coenz dem. Dou gyoengq lwgnyez ndwn youq bakdou hagdangz, da muengh gyoengqvunz boux youh boux daj henzndang dou yied haeuj ndaw cauhcangz bae.

Gizsaed dou lwgnyez yawj denyingj cijdwg yawj nauhyied, yawj ndaw denyingj gij vunz haenx hoenx bae hoenx dauq, cungj mbouj rox maz eiqsei. Boux gai biuq mbouj hawj dou haeujbae yawj denyingj, hawj dou youq baihrog gaux, ciuyinx gyoengq bouxlaux daeuj yawj denyingj.

Ndwenngoenz ciemh bae, ranzranz cungj cawx ndaej densi, gyoengqvunz mbouj yungh caenx youq giz ndeu yawj densi lo, cungj youq ranz swhgeij yawj. Ciep dwk gwnz hawciengz youh miz yingjdez daengjdaengj gak cungj denswj doenghyiengh gai, gyoengqvunz siengj yawj maz denyingj densi, couh cawx mbaw dieb ma cuengq, danghnaeuz mbouj nyaengq maz hong, daengx ngoenz yawj cungj ndaej. Miz gij denswj doenghyiengh neix le, gyoengqvunz yawj denyingj ciemh noix, doeklaeng caiq hix mbouj raen boux cuengq denyingj daeuj ndaw cauhcangz hagdangz cuengq denyingj lo.

Ndwenngoenz bongh baenaj, ngeihcib sigij goujcib nienzdaih, ciengz raen gyoengqvunz gyaeujvaq cungj raek aen doenghyiengh he beij aen habfeiz loq hung di he, heuh BB gih. Cij aeu miz vunz dwk dienhvah daeuj, gwnz bingzmuq aen BB gih couh yienh’ok dienhvah hauhmax, couh bae ra gunghgung dienhvah caiq naenx gvaqbae.

Doengh gij lauxbanj hung haenx mbouj yungh BB gih, gyoengqde riuj aen daehnaeng hung he, ndawde coux aen dienhvah hung he, heuh dagohda. Dagohda lumj ndaek cienfeiz yienghhaenx hung, mizdi naek, yiengh mbouj gvai, hoeng seizhaenx miz aen neix yungh sawj vunz hozhaenz, aen neix seizhaenx gig bengz, mbouj miz geijlai boux cawx ndaej hwnj.

Seiqgyaiq bienq ndaej hawj vunz da yawj mbouj gib, gyoengqvunz cungj yungh hwnj soujgih lo. Soujgih mbaeu youh giuj, seizbienh cuengq ndaw daehbuh, hoeng gunghnwngz mbouj lai, cij ndaej dwk ciep dienhvah, fat saenqsik.

Lajmbanj gyoengqvunz bae baihrog daj- goeng. Youq rog nanz le, gyoengqvunz cungj gig niemh mbanjranz, niemh gij vunzcaen mbanjranz, nanz mbouj nanz couh dwk dienhvah cazcam ndaw ranz cingzgvang. Miz vunz naemj: Danghnaeuz miz cungj soujgih he dwk dienhvah song mbiengj cungj ndaej raennaj couh ndei lo.

Mbouj nanz, caen caux cinwngz soujgih okdaeuj lo. Gyoengqvunz mboujlwnh youq gyawz, mboujlwnh gyae gyawj, dwk sibinz dienhvah couh doxraen lo.

Cinwngz soujgih mbouj bengz, bouxboux cawx ndaej hwnj. Miz cinwngz soujgih gaemh ndaw fwngz, gyoengqvunz siengj yawj maz couh yawj maz, lajbiengz maz saeh cungj rox caez.

Ngeixhwnj gaxgonq yawj denyingj, naemj- hwnj seizneix gyoengqvunz yungh hwnj cinwngz soujgih, aen ndeu yungh lai yiengh, gaxgonq seizneix doxbeij, hawj vunz ngeix mbouj caenh. Seizdaih yied bienq yied ndei, gyoengqvunz ngoenz beij ngoenz vuenyungz.