8 nyied 31 hauh, daengx diuz Nanzningz daengz Gvei- yangz gauhsuz dietloh haidoeng daehyinh, daengz neix, Gvangj- sih 14 aen si laeb gih cienz- mienh saedyienh “aen’aen doeng gauhdez doenghci”. Gvei Nanz Gauhdez henz roen miz Bouxcuengh、Mauznanzcuz、Yauzcuz daengj 30 lai aen siujsoq minzcuz comzyouq, diuz gauhdez neix hwnqbaenz haidoeng yaek hawj henz roen beixnuengx gak cuz gyavaiq yamqdin byaij coh yendaiva, coihawj gak minzcuz doxcunz doxhag doxgyaux, couqmaenh gij eiqsik caezcaemh Cunghvaz Minzcuz.

Nanzningz daengz Gvei- yangz youz yienzlaiz 5 diemj lai cung sukdinj daengz 3 diemj cung baedauq, daengx diuz Gvei Nanz Gauhdez 482 goengleix, ndawde duenh Gvangjsih raez 282 goengleix， laeb miz 7 aen camh, faenbied dwg: Vanzgyangh、Hozciz Sae、Yungjanh Cin、Duh’anh、Maj- sanh Yen、Nanzningz Baek、Nanzningz Doeng, cawz Nanz- ningz Doeng le gizyawz cungj dwg camh moq.

Gvei Nanz Gauhdez dwg diuz gauhsuz dietloh ceiq lai diemjcung hai 350 goengleix doxbaedauq Gvangj- sih caeuq Gveicouh, hix dwg diuzroen vuenyungz、 baenzmiz、lienzsim henz roen beixnuengx gak cuz, Gvei Nanz Gauhdez 2017 nienz 12 nyied haigoeng hwnqguh 5 bi lai doxdaeuj, gyoengq boux hwnqguh hwnz ngoenz buekguh, henz roen beixnuengx gak cuz muengh hwnj muengh roengz, gyoengq- vunz ndaw rungh gvaq garoen hoj baenzlawz, seizneix gauhdez haidoeng couh angqyangz baenzlawz. 31 hauh ngoenz- haenx, Nanzningz Doeng、Nanzningz Baek、 Duh’anh、Hozciz Sae、Vanzgyangh 5 aen camh cungj guh gij yienghsaeh angqhoh haidoeng gauhdez, gyoengq beixnuengx gak cuz daenj buhvaq moqsag ciengq go diuq foux angqcoux gauhdez daeuj daengz. Boux dem boux najriu najhai、 hot dem hot fwen angqfwdfwd、 aen dem aen foux riengjret cungj gangj ok ginghci Gvangjsih hwngfat、vwnzva mwnhoengh、minzcuz doxgiet.

（Gvangjsih Minzcuz Bau cenzmeizdij baudaujcuj）