Bi 2012 ngoenz ndeu, gou bae ngaenzhangz gvihdaiz lingx sam cien maenz, ngaenz daengz fwngz le, couh swnhfwngz oet roengz daeh bae, cix bae nyaengq hong lo. Banhaemh ndaejhoengq seiz, gou geq ngaenz, raen miz mbaw bak maenz lingh yiengh ndeu. Gij saek mbaw neix donh ndeu saeklaeg, lingh donh saekdam, ndaejnaeuz mbaw ngaenz neix donh ndeu miz saek, lingh donh mbouj miz.

Geizheih lai lo, vihmaz miz mbaw’ngaenz baenz yienghneix ni? Gou yawj gwnz yawj laj: Ngaenzgyaj! Gou baenzneix naemj. Hoeng, gou youh moengz lo, ngaenzhangz vihmaz miz ngaenzgyaj riuzdoeng ni? Neix dwg famhfap nw!

O! Lauheiq dwg bouxguhhong ngaenzhangz guhfangz bw! Aiq dwg de mbouj siujsim soundaej saek mbaw ngaenzgyaj le, swnh seiz laeglemx dawz ngaenzgyaj oet haeuj ndaw ngaenz gou daeuj, dawz ngaenzcaen oet roengz daeh de bae, neix mbouj dwg vei bouxwnq leih bonjfaenh ma? Boux haenx baenzneix mbouj gangj saekdi cizyez daudwz, hab cawzhai!

Hwnzde, gou ninz mbouj baenz.

Ngoenz daihngeih banhaemh, gou dawz mbaw’ngaenz lingh yiengh neix cunz haeuj aengih swdung lingx ngaenz bae, caen dahraix, aengih mbouj nyinh de, cunz mbouj ndaej. Seizde gou duenhdingh mbaw neix caen dwg ngaenzgyaj lo.

Raq heiqfeiz ndeu fwt daj simdaeuz gou bongh hwnj conghhoz daeuj, dawz conghhoz nad ndaej manhsadsad, gou aj bak rauheiq hung geij mbat, raq heiqfeiz neix cij gyangq daemq.

Lingx ngaenz lingx ndaej ngaenzgyaj, byawz mbouj hozndat ni? Gou caemh ienqhoij dangseiz mbouj yawj ndei, seizneix cijnaengz gagnyinh boihseiz lo.

Gij ngaenz neix lingx daeuj yaek boiz vunz bw. Bide gou youq yienhsingz cawx ranz, seizhaenx cienzhong gou noix, ngamq gaeuq aenngoenz sawjyungh, nanz miz ngaenzrom. Bit daeuz ngaenz cawx ranz cienzbouh dwg ciq vunz, vih cawx ranz, gou dawz le haujlai nij, saedceij ranz gou haenq lumj gaenjyienz aengungnaq nei.

Bak maenz ndeu, doiq bouxmiz daeuj gangj, couh lumj youq gwnzndang duzvaiz loek bae gaenjbwn ndeu nei, mbouj in mbouj manh. Hoeng doiq gyoengq bouxhoj dou daeuj gangj, couh lumj youq gwnzndang gvej bae gaiqnoh he nei, in raixcaix. Mwhde, maenz ngaenz ndeu, gou siengj mbiq guh cib maenz daeuj yungh, bak maenz ngaenzgyaj neix hawj gou sim’in fouzbeij.

Dajneix gou ngeix daengz gij vunz ngaiz sonjhaih haenx.

Haenx dwg 90 nienzdaih co ngoenz ndeu, Baeuqsuzyiz mbanj dou dawz gaeq bae haw gai, maranz le cij rox sou ndaej mbaw 50 maenz ngaenzgyaj ndeu, de hozndat lairaeuh, youh sim’in gvaqbouh, loenghdwk geij ngoenz haenx de heujin、najfoeg. Seizhaenx gou lij coz, mbouj roxsoq, raen aennaj de mbiengj ndeu foeg luenzlulu, lumj oem aen gyaeqgaeq ndeu nei, miz di dwgriu, cix youq dangqnaj de naeuz: Sonjsaet 50 maenz couh baenz yienghneix, danghnaeuz sonjsaet 500 maenz, aeu mingh lubw? De naeuz: Lwgnyez mbouj rox maz ciqmon, coglawz mwngz danggya le couh rox lo.

Caemh dwg youq mwhde, miz vunz haeuj mbanj soucawx haeuxgok. Simjsam gou gai haeux ndaej 500 maenz, cix diem caedcaed bae. Gvaq le cib lai ngoenz, de dawz gij ngaenz neix bae hagdangz bauqmingz hawj song laeq lwg doegsaw, cij rox gij ngaenz neix miz song bak maenz dwg ngaenzgyaj, dangseiz de yaek ngunh bae. Lauxsae nai de naeuz, miz geijlai sien gyau geijlai gonq, gvaqlaeng caiq dawz daeuj bouj.

Seizhaenx saedceij vunzmbanj dou lij haemq hoj, haeux gaeuq gwn imq, hoeng mbouj miz cienzlw. Dingzlai vunzmbanj baengh gai haeux sawjyungh, hoeng hix mbouj ndaej gai lailai, mboujnex, haeux mbouj gaeuq gwn.

Song bak maenz doiq Simjsam daeuj gangj hung gvaq mbwn, sim’in yaek dai, de daejhwhw haeuj mbanj. Vunzmbanj cam de vihmaz daej? De dawz saeh lwnh vunzmbanj nyi.

Fangz daigaj neix!

Ndaek gyaeujgoenq neix!

Ndaek simrwix neix, sonj de cib ciuh bet ciuh bae.

Vunz guh mbwn raen, hawj de loemzciuh bae.

……

Vunzmbanj ndaq bouxsoucawx haenx.

20 sigij 90 nienzdaih seizhaenx, hawciengz gwnzde ngaenzgyaj riuzdoeng haemq daih, hawj vunz fuengz hix fuengz mbouj ndaej caez. Vunzmbanj baengh da yawj、 fwngz mo, nanzndaej nyinh’ok ngaenzcaen ngaenzgyaj, ndigah haujlai vunz deng sonjhaih. Caeklaiq, guekgya gipseiz aeu banhfap daeuj fadceih ngaenzgyaj, cij dawz de gaemhanh.

Simjsam vih song bak maenz neix baenzngoenz haeujaw, gongz naek cangz laeg, laebdaeb geij ngoenz mbouj ngah gwn mbouj maeh ninz, doeklaeng baenzbingh lo, vunz byom haujlai.

Ngoenz ndeu, Ausam yienh song bak maenz hawj Simjsam, naeuz neix dwg fangzsoucawx hawj dauq, gou bae gyaep de aeudauq lo.

Gij bingh Simjsam mbouj yw gag ndei.

Gizsaed, bouxsoucawx haenx dwg vunz gizlawz、dwg maz coh, mbouj miz byawz rox, Ausam rox bae gyawz gyaep de aeu ngaenz dauq? Song bak maenz neix dwg Ausam caeuq vunz ciq daeuj yaeuh Simjsam ndwi. Seizde, gou riu Simjsam naeuz, vunzlai dwg “yw daengz bingh cawz”, mwngz cix “ngaenz daengz bingh cawz”. Ausam dacaengz gou mbat ndeu, naeuz “gyong ndei mbouj roq, roq gyong naeuh”, vaiq deuz.

Geiqndaej densi naeuz gvaq, miz dah hagseng gauhcungh bizyez ndeu, ngaiz vunz yaeuh bae 4000 maenz ngaenzsaw(ngaenzsaw daihhag). Ranz dah neix youq mbanjiq ndawrungh, saedceij ranz de gungzhoj. Gij ngaenz neix dwg gij lwedhanh bohmeh de, de roxnyinh doiq mbouj gvaq bohmeh, cix gwn ywdoeg gag gaj, caeklaiq gouq ndaej dauq bw.

Yawj daengz neix, gou doengzcingz dah neix, hix haemz bouxguhyaeuh. Hoeng, gou siengj mbouj doeng, vihmaz baenzneix yawjmbaeu sengmingh? Ndawbiengz lij miz maz beij sengmingh youqgaenj dem? Dah neix baenzneix guh, vanghdangz!

Aiq dwg nanh youq ndang bouxwnq, raeuz mboujrox gij in de. Seizneix sonjhaih doek daengz ndang bonjfaenh, gou cij rox: Mwh ranzloh youh ngaiz fwn soemh, byawz cungj unqet, souh mbouj ndaej saekdi dwkceih.

Gou hix dwg yienghneix, vih mbaw ngaenzgyaj neix, cingsaenz yaek loemqlak bae.

Gou naih ngeix naih hozndat, naih ngeix naih sim’in: Mbouj ndaej yienghneix ngaiz vunz haep, gou aeu bae lwnh boux de nyi, haiq de baenzlawz gangj, couhcinj de mboujnyinh mbaw ngaenzgyaj neix, liengzsim de hix mboujonj.

Ngoenz daihsam, gou bae caeuq bouxguhhong ngaenzhangz naeuz: Ngoenzbonz gou caeuq mwngz lingx 3000 ngaenz, ndawde miz mbaw ngaenz lingh yiengh ndeu, lau dwg ngaenzgyaj nw?

Bouxde yawj le yawj, damhdingh dwk naeuz, mbaw neix dwg ngaenzcaen, mboujgvaq miz di daegbied, gou vuenh mbaw wnq hawj mwngz ba.

Liuh mbouj daengz de baenzneix ndeigangj, de gojyij mboujnyinh mbaw ngaenz neix, hoeng, de di ndeu mbouj lawq couh vuenh mbaw wnq hawj gou lo, seizde gou simsangj dangqmaz. Ngaenz daengz fwngz le, gou muengzmuengz ok dou ngaenzhangz, lau boux haenx fanjhoij.

Couhmoz, daeggvan daj yanghcin dauq yienh- singz, gou dawz saeh neix lwnh de nyi. De fwt saetdiuq hwnjdaeuj, swenj naeuz: “Ngaenzloeng- banj, haengjdingh dwg ngaenzloengbanj” .

Gou cam maz heuhguh “ngaenzloengbanj”?

De naeuz yaenq ngaenz seiz, dawz cihsaw yaenq loeng, roxnaeuz saek yaenq mbouj yinz daengjdaengj, gij ngaenz neix couh heuhguh “ngaenzloengbanj”.

Gou yaek rox mbouj rox.

Mwngz caen oenj! Mwngz rox mbaw “ngaenzloengbanj” ndeu dij geijlai cienz ma?

Dij geijlai?

Ciuhvunz mwngz gwn mbouj liux.

Cejdaihbauq!

Daeggvan aeu soujgih cazyawj, naeuz mwngz gag yawj, mbaw “ngaenzloengbanj” ndeu dij bak lai fanh.

Ndaw soujgih caen dwg yienghneix gangj dahraix. Gou bak aj loengqloengq yawj coh daeggvan.

Uk haeu uk naeuh mwngz, dawz bak lai fanh soengq hawj vunz ndwi, caen dwg “boux byoem raez ronghda dinj”, vaiqdi bae cam de aeu dauq!

Mbouj bae. Mbouj miznaj bae!

Youh mbouj heuh mwngz bae caeg bae ciengj, mizmaz saetnaj ni？

Youh mboujrox mbaw haenx dauqdaej dwg ngaenzgyaj roxnaeuz “ngaenzloengbanj”.

Mboujguenj dwg maz ngaenz, mwngz bae aeu dauq gonq.

Mbouj bae! Gij saeh “boekbonj bae boekbonj dauq” haenx gou guh mbouj ok.

Bak lai fanh bw, mwngz mbouj simdoengh ma?

Gou mbouj citgeiz. Mingh gou mbouj hab aeu cienzya!

Cib lai bi gvaqbae lo, baez dwen daengz mbaw ngaenz neix, daeggvan lij doeknaiq.

Seizneix dwg seizdaih moq, hix dwg vangjloz nienzdaih, gaicawx mbouj yungh ngaenz lo, naenx song sam mbat soujgih couh guhbaenz gaicawx, raeuz mboujyungh lau sou ndaej ngaenzgyaj lo, ngaenzgyaj gaenq mbouj miz hawciengz.

Gyo’mbaiq seizdaih moq!